[Seedon filli]
11
Ken falle,
i da xensendifo yogo kini in ŋa,
a gaa xo solle,
nan ti in da :
« Giri !
An na Allanbatika ke do sadaxindinoqu ke xense*.
Ku be gaa batini a noxon ŋa,
an na kun xa jaate.
2 Xa,
Allanbatika ke gallinbera,
ken wara.
Maxa non xense,
baawo ken kini samunto ku ya yi,
i na ri danpi-danpi debi sennen ŋa tannaxate do xasu filli.
3 Ma in ga da in seedon filli xayi riini.
I na seedannaaxun kiɲandi wujune do kamo filli do tandume bito noxon ŋa.
Booto xason wa rondini i ya,
ken gaa i sunoyen koyini. »
4 Jayituunatinŋu ku filli* be do lanpanu ku filli be siginton gaa ɲiiɲen kaman jon ŋa,
seedaano ku ni i ya yi.
5 Xonne be ga na ti i wa fo bure ɲaana i ya,
yinben wa bakka i raqun ŋa,
na ken xonne xurumindi*.
Tonŋu,
sere be gaa fo buren ɲaana i ya,
a kaman kara moxon nan xawa ɲaana kundu ya yi.
6 Raniyen wa i maxa i ra ga kanmun teqe,
kanme su ra nta texeene i xayifaaraaxu ke biton ŋa*.
Raniyen wa i maxa i ra ga jin su yillana foren* ŋa,
i ra wa ɲiiɲen katta ti taawoonen ŋa,
waxati su ga n liŋi i da.
7 Xa i ga na duguta seedannaaxun kiɲanden ŋa,
Daaba ke be gaa segene bakka Jahannaba kun jupen ŋa,
a na xenu i ya,
na i ni,
na i kari.
8 I furun na toxo saqa deben bera xooren ŋa,
i ga da i kamanen genge do sallibinsollen ŋa noqu ke be yinme yi.
I na ken debi xoore ya xilli Sodoomu walla Misira*.
9 Jamaanen su,
fonlaqen su,
xannen su,
do xabiilan su seren wa riini i furun faayi bito sikki do taxande.
I nta duŋeene sere na i bulu xa mene.
10 Ɲiiɲen seron na ɲaxali ti i kallen ŋa.
I na a ɲa ɲaxan ŋa,
ma i ga da musundaadun kini me yi,
na a sababun ɲa ku xayifaaru filli ga da i tooro moxo be.
11 Xa,
biton sikki do taxanden ga na tinme,
yonkin na giri Alla yi nan ro i ya,
i na giri.
Sere su ga na i wari,
a su na kanu moxo buru.
12 Xayifaaru ku filli na sefexan xote yogo mugu gilli kanmun ŋa nan ti i da :
« Xa sege riini yere !
» I xonnon na i segenton wari tabullen noxon ŋa.
13 Ken noqu su,
ɲiiɲen na saralle,
saralleyi xote.
Deben taxandi tanmunden na guruje,
wujunu ɲeri sere yonkin na toxo a yi.
Kuttun yonkinun na kanu moxo buru,
i na darontaaxun saaga kanmun Alla yi.
14 Bono fillanden dangi,
sikkandin xa riyinten faayi,
a nta hari dallana.
[Buutu ɲerunden timinde]
15 Maliikan ɲerunden ga da i buutun timi,
xan wuruginte yogo mugi kanxotten ŋa,
a ga ti :
« Duna tunkaaxun ɲa o kaman do i Kisindaanan Sugandinten ya fo yi keeta.
A na mare ma abada*. »
16 Tanpille ke do xirisu ku naxati be taaxunton gaa i tunkantaaxaadun kanma Alla jon ŋa,
i sujudi Alla jon ŋa na a batu.
17 I wa tini :
« O da an tiiga,
Kamane Alla,
Senbenton Senbente,
an wa du yi saasa,
an wa du yi nan xaso,
baawo an da an senbe xooren koyi,
na mareyen jopa.
18 Xabiilanun su butu,
xa an butten biren ya n ri.
Furun kiitibiren ya n ri.
An komon tugandi biren ya n ri,
kun ga ni xayifaarun ŋa,
A do sere sennu,
ku be ga kanu an ŋa,
seri darun do seri maxayanqanto.
Ku be gaa ɲiiɲen bonondini,
i xa bonondibiren ya n ri. »
19 Allanbatikan raqen wuɲi kanxotten ŋa kuŋa,
laayidunwaxanden¤ bange.
Ɲelunqeyen bange,
manqanxannun mugi,
ken do kanmen direxannu,
ɲiiɲen saralle,
kafiini maramalli baraxate.