[Yaxaren do Saanaaba]
12
Taagumansa xoore bange kanxotten ŋa :
N da yaxare yogo ya wari,
kiyen gaa rondini a yi xoyi yiraamu,
xason wa a taanun wure,
toore wa a yinmen ŋa,
saanu tanmi do fillo gaa a yi.
2 Yaxare ke nuxunten ya ni,
jalan da a bunu,
a wa xaarunu tooxen maxa*.
3 Ken noqu su,
taagumanse tana bange kanxotten ŋa :
saanaaba xoore ya ni,
a wa dunbunu xo yinbinxore.
Yinmu ɲeri do bennu tanmi wa a yi.
Toore wa yinme su kanma.
4 A xoqen da saanun taxandi sikkanden sella bakka kanxotten ŋa,
na i yerendi ɲiiɲen kanma.
Saanaaba ke tugunten wa katta yaxarin jalante ke yi,
kuudo a ga na saare tan,
i na a renmen toni.
5 Yaxaren saare ti yugo yi,
renme ke be gaa riini jamaanen su kanda ti mexendokkon ŋa*.
A ga saare noqu be,
renmen jafati segene katta Alla yi i tunkantaaxaaden kanma.
6 Yaxaren wuru nan daga dingira be Alla ga da moxosirondi a da gunjuran ŋa nan xaso,
kuudo i na a yigandi wujune do kamo filli do tandume bito noxo.
7 Fitinan sigi kanxotten ŋa.
Minkayilu* do i maliikanun do Saanaaban da me kita.
Saanaaban do i kuranlenmon wa kaara.
8 Xa,
a ma niyindi :
dingira ntaxa i maxa kanxotten ŋa.
9 A sedi katta ɲiiɲen ŋa,
Saman xoore,
ken ga ni gannin samaqe*,
a ya toxon ni Ibiliisa do Seetaane,
duna muuman sankundaana,
a do i kuranlenmon sedi katta ɲiiɲen ŋa.
10 N da sefexan xote mugu kanxotten ŋa,
a ga ti :
« Kisiyen do senben do o Alla mareyen biren ya n ri keeta.
Kisindaana sugandinten kanda biren ya n ri.
Baawo ke be ga ɲi o waaxinun jalagini o Alla jon ŋa wuron do kiye,
i da a sedi katta ɲiiɲen ŋa.
11 Xa o waaxinun da a ni ti Jaxanlenmen foren joqen ŋa,
do i ga seede ti daale ke be yi,
i ma bireyen faso kallen ŋa.
12 Ken kuŋa,
kanmun do i taaxaano,
xa sewo !
Xa ɲiiɲedunko do geejidunko,
bone da axakun xooro.
Baawo Ibiliisa da a tu nan ti waxati lamaane ya n toxo i da.
A butunta xooren faayi ga yanqa katta axa yi. »
13 Saanaaban ga da a tu ti i sedi katta ɲiiɲen ŋa,
yaxare ke be ga da ren yugon saara,
a da a songa du kaane.
14 Xa luuxu xoore kanpon filli kini yaxaren ŋa*,
a nan kanpi katta gunjuran ŋa,
nan laato bakka Saanaaba ke yi.
Noqu ke be ga sugandi a da,
a na ɲa non ŋa,
i na a yigandi siino sikki do taxande noxon ŋa*.
15 Ken noqu,
Saanaaba ke da ji xoore goxi,
an tini fanŋen ya ni,
nan dulla do yaxaren batten ŋa ma a na daga do woyen ŋa.
16 Saanaaban ga da fanŋe ke be goxi,
ɲiiɲen da i raqen wuɲi na a su mini,
kuudo na yaxaren deema.
17 Ken buttu buren saabu da,
yaxare ke bonsonŋun fo wo fo ga tigiti Alla ɲaamarindixannun ŋa,
nan tigiti Isa Alimasiiwu seedeyen ŋa,
Saanaaba ke daga kun gaja*.
18 Ken falle,
a daga sigi geeji seyiŋen kanma.