[Daaba be gaa bakka geeji]
13
Ken falle,
n da Daaba yogo wari segene bakka geejin ŋa.
Yinmu ɲeri do bennu tanmi wa Daaba ke yi,
toore wa benne su yi,
Alla bexundi digaamun safanton wa yinmu ku yi.
2 Daaba ke wa xo jaagaabe,
a taanun wa xo ginbitaanu,
a raqen wa xo jarintaraqe.
Saanaaban da i senbe do i fankan do i mareyi xooren xaliifa a yi.
3 Joogiyi xoore wa a yinmu ku du baananbe yi,
an tini xoyi a kalla ya.
Xa ken joogiyi xoore selle.
Ɲiiɲen su kaawafi,
i sukke do Daaba ke yi.
4 I sujudi Saanaaba ke da,
baawo a da a mareyen kini Daaba ke yi.
I sujudi Daaba ke xa da nan ti :
« Ko do ke Daaba n baana,
ko n katta xenne a yi ? »
5 Ɲaamariyen kini Daaba ke yi,
a na du jakki,
na Alla xa bexu.
Senben kini a yi,
a na i liŋun dabari tannaxate do xasu filli noxo.
6 A xenu Alla bexunden ŋa,
na a tilliisen bexu,
taaxuran gaa ku be xa maxa kanmun ŋa,
na i xa bexu.
7 Mareyen kini a yi a na Alla seri sennun gaja na i ni.
Mareyen kini a yi fonlaqen su kanma,
jamaanun su kanma,
xannun su kanma,
xabiilan su kanma.
8 Jaxanlenme ke be ga sadaxi gelli duna joŋaarun ŋa,
ŋalinto ku kitaaben ni a ya maxa.
Ɲiiɲedunkon fo wo fo toxon safanten ga ma ɲi ken kitaabe noxon ŋa,
a su sujudi Daaba ke da.
9 Taro gaa sere be yi,
a na ken terinka de :
10 Sere be ga n xawa ɲaana kome,
a na ɲa kome.
Sere be ga n xawa kalla ti jaraxon ŋa,
jaraxon na a kari*.
Alla komo sennun muɲiyen do i saxiiraaxun biren ya faayi ke.
[Daaba be gaa bakka ɲiiɲen ŋa]
11 Ken falle,
n da daaba tana wari segene bakka ɲiiɲen ŋa.
Bennu filli wa a yi xo jaxanlenme,
xa a wa guurunbene xo saman xoore.
12 A wa i gollen su dabarini Daaba fana ke jon ŋa,
ti Daaba fana ke yinme fankan ŋa.
Joogiyi xooren ɲi ken Daaba ya yinmen ŋa,
a ga selle,
Daaba fillandi ke da ɲiiɲen do i taaxaanon waajibi i na Daaba fana ke batu.
13 Fillande ke da kaawafi xooro dabari,
a da hari yinben girindi kanmun ŋa na a yanqandi ɲiiɲen ŋa a su jon ŋa.
14 Fanka ke be ga kini a yi ti a na kaawafiinun dabari Daaba fana ke jon ŋa,
a da ɲiiɲen taaxaanon sankundi ti ken ya yi.
A ti i na sawura yogo dabari Daaba fana ke da,
jaraxon ga da ke sufa i yinmen ŋa,
a ga bire,
kuudo i na a daro ti a yi.
15 I da a ɲaamari,
a na yonkin ro Daaba fana ke sawuran ŋa,
a na sefe.
Sere wo sere ga ma sawura ke batu,
a na a kaman kari.
16 Seri darun do seri maxayanqanto,
bannan do misikiine,
komen do hoore,
Daaba fillande ke da i waajibi,
i su na maaran ro i kitti tayu ma i taŋon ŋa.
17 Sere su ra nta fo gaagana,
an ra nta fo xobono,
ke maara ga nta an ŋa,
ken ga ni :
Daaban toxo,
ma jaatirenmu be wure gaa genme a toxon ŋa.
18 Yere ni fontuwaaxun biren ya yi,
haqile gaa sere be yi,
a na Daaba fana ke ku jaatirenmu wure ko,
baawo serantoxon ya jaatirenmu ni.
Jaatirenmu ku ni :
kamo tunmi do tandume do tunmu ya yi.