[Jaxanlenmen do i jama]
14
Ken falle,
n yaaxen wa Jaxanlenmen siginten ŋa Siwoona giden kanma,
a toxon do a faaba toxon safanten gaa kamen do tannaxaten do wujunu naxati sere* ke be taŋon ŋa,
i wa sikki do a batten ŋa*.
2 N da xan xoore mugu gilli kanmun ŋa,
a gaa xo ji xoore direye,
xo kandireyi xote.
N ga da xanne ke mugu,
a wa xo ganbaritimaanon gaa ganbaritimiini.
3 I wa suugu kurunba suugunu tunkantaaxaaden jon ŋa,
tagefo ŋalinto ku naxati do xirisu ku jon ŋa.
Sere su ra nta suuge ke seerana,
a ga ma ɲa kame ke do tannaxate ke do wujunun naxati be ga maxawase bakka ɲiiɲedunkoonun ŋa.
4 I ma du sobindi ti yaxarun ŋa,
baawo i dutanganton ya ni.
Jaxanlenmen ga daga noqu su yi,
i wa do a yi.
I fina ya n maxawase bakka ɲiiɲedunkoonun ŋa Alla do Jaxanlenmen da.
5 I ma gaare ko abada,
jalagindira su nta i ya.
[Kiiten xibaaren konŋe]
6 Ken falle,
n yaaxen wa maliika yogo yi toolono kanxotten ŋa.
Abadanxibaari liŋen wa a raqen ŋa katta ɲiiɲedunkoonun ŋa,
xabiilan su,
fonlaqen su,
xannen su,
jamaanen su.
7 A xan xooren wa tini :
« Xa kanu Alla yi,
xa na a daro,
baawo a kiiten biren ri.
Xa da kanmun do ɲiiɲen do geejin do jinyaaxon tagandaanan batu. »
8 Maliikan fillande sukke a yi nan ti :
« A kare !
Baabila kare,
debi xoore !
Debe ke da i jeeniyi haqi danginte minindi xabiilan su yi*ma i gaa mandene. »
9 Maliikan sikkande sukke i ya,
a xan xooren wa tini :
« Sere wo sere ga da Daaban do i sawuran batu,
a maaran ga ro a kaman taŋe ma a kitten ŋa,
10 Alla wa i buttu xooren reesendolon guujini i jiranxollen noxon ŋa,
na a kini ken kaman ŋa ti a na mini*.
Ji su nta walaxiini a yi.
An na yanganxate tinbiritin do yinben noxon ŋa maliikan sennun do Jaxanlenmen jon ŋa.
11 I yanganxatan yinbintiiden na sege ma abada*.
Ku be ga da Daaban do i sawuran batu,
a toxon maaran gaa i ya,
tuumayen nta i da kiye,
a nta i da wuro. »
12 Sere sennu beenu ga tigiti Alla ɲaamarindixannun ŋa,
nan toŋondi ti Isa yi,
i muɲi biren ni ken bire ya yi.
13 N yille xanne tana mukku kanmun ŋa nan ti :
« A safa nan ti :
gelli waca,
wulluliŋontaaxun wa seron da,
ku be ga kara kamanen killen kanma !
» Alla Fanka Sennen ya n jaabi ti :
« Tonŋu !
I n bogu tanpiyen ŋa,
i n tuuma,
baawo i gollun wa do i batten ŋa. »
[Ɲiiɲen sanjaane]
14 N yille faayindini,
n yaaxen wa xaba xullen ŋa,
fo yogo taaxunten wa a kanma xo haadamarenme*.
Kanŋen tooren wa a yinmen ŋa,
xedu liŋe wa a kitten ŋa.
15 Ken falle,
maliika tana bogu Allanbatikan ŋa,
a xiribe ke be taaxunten gaa xaba ke kanma ti :
« Fate ti an xedon ŋa,
fate biren kiɲe,
baawo ɲiiɲen soxanfoonun moyi. »
16 Ke be taaxunten ga xaban kanma,
a da i xedon wara katta ɲiiɲen ŋa,
ɲiiɲen fate.
17 Ken falle,
maliika tana bogu kanmun Allanbatikan ŋa.
Xedo liŋe wa a xa kitten ŋa.
18 Maliika tana yille bakka sadaxindinoqun ŋa.
Niyiyen wa a maxa yinben kanma.
A xaaru xedu liŋen ga ke be maxa ti :
« An xedu liŋen wara katta ɲiiɲen ŋa,
an na a reesekonbonun kutu,
baawo i moyi.* »
19 Maliikan da i xedon wara katta ɲiiɲen ŋa,
a da reesekonbonun kutu na i sedi reesebollinoqu xooren noxon ŋa,
ken gaa Alla butten koyini.*
20 I da reesenu ku bolli bollindinoqun ŋa deben falle.
Foren bogu reesebollinoqun ŋa,
nan wuru beran kanma,
a wa kamo sikki kilometara me bakka.
A jufoyen kiɲe ma siinun xarabun ŋa.