[Taawooni lagarun ɲeri]
15
N da taagumanse tana wari kanmun ŋa,
a xoore,
kaawafi su xenpa :
taawooni lagaru ɲeri wa maliikanu ɲeri maxa,
Alla na i butten tinmandini ti kun ya yi.
2 Ken falle,
n da geeji ɲelunqante wari,
a muuman su yinbe.
Ku be ga da Daaban niyi,
na a sawuran niyi,
na jaatirenmu be gaa genme a toxon ŋa niyi,
i wa sikki geeji ke kanma.
Allanganbarun wa i kittun ŋa.
3 I wa Alla kome Muusa do Jaxanlenmen suugen* suugunu nan ti :
« An gollun xooron ya ni,
kaawafin ya ni,
Kamane Alla,
Senbenton Senbente !
An killun ni tonŋun ya yi,
i teleŋonto,
jamaanun tunka !
4 Kamane,
ko na du yi,
a ga ma ɲi kanna an toxon ŋa na a daro ?
Baawo an baane ya senne ni.
Jamaanun su wa riini,
i na sujudi an jon ŋa,
baawo an golli teleŋonton bange.* »
5 Ken falle,
n da Allanbatika xooren raqen wuɲinten wari kanxotten ŋa,
genmanlenmaaxun tilliise¤.
6 Taawoonun ɲeri ga maliikanu ku ɲeri be maxa,
i bogu Allanbatikan ŋa,
leeninyiran xullun wa rondini i ya ma i ga toxo ɲelunqene.
I gijinmun yetunton wa ti kanŋen duusiitaaden ŋa.
7 Tagefo ŋalinto ku naxati du baananbe da kanjiranxollo ɲeri kini maliikanu ku ɲeri yi.
Alla ke be ŋalinten ga ni ma abada,
kanjiranxollo ku fakkan wa ti a butten ŋa.*
8 Alla nooron do a senben tiiden da Allanbatikan faga kuŋa.*
Sere xa su ra nta roono Allanbatikan noxon ŋa,
ma taawooni lagaru ku ɲeri gan tinme,
ku be gaa Maliikanu ku ɲeri maxa.