[Jiranxollon ɲeri]
16
N da xan xoore mugu Allanbatikan noxon ŋa,
nan ti maliikanu ku ɲeri da :
« Xa daga Alla butuye ke jiranxolla fakkon ɲeri joxi ɲiiɲen ŋa !* »
2 Maliikan fanan daga i jiranxolla fakkan joxi ɲiiɲen ŋa.
Daaban maaran ga ɲi sere su yi,
an gaa a sawuran batta,
tugu ɲanŋe bogu a kaman ŋa na a tooro.*
3 Fillanden da i jiranxolla fakkan joxi geejin ŋa.
A ɲa xo xurusifon foren moxo,
geeji yonkinten su kara.*
4 Sikkanden da i jiranxolla fakkan joxi fanŋun do jinyaaxon ŋa,
i ɲa fore.
5 N da jin maliikan mugu tini :
« An wa du yi saasa,
an wa du yi nan xaso*,
senonte,
an teleŋonten ya ni,
ken ya ni,
an ga kiiti kundu.
6 I ga da sere sennun do xayifaarun foren joxi,
an xa da foren kini i ya i na a mini.*
I do a nan xawa ! »
7 N da sadaxindinoqun xa mugu jaabini ti :
« Tonŋu,
Kamane Alla,
Senbenton Senbente !
An kiiten su ni tonŋun do teleŋontaaxun ya yi. »
8 Naxatanden xa da i jiranxolla fakkan joxi kiyen kanma,
ken da seyen kini kiyen ŋa,
a na haadamarenmun buyi.
9 Ken ga ɲaŋi,
tewoyi xote da haadamarenmun buyi.
Ku taawoonu gaa Alla ke be maxa,
i da a ya toxon bonondi.
Xa i ma tuubi na a daro.
10 Karaganden da i jiranxolla fakkan joxi Daaban tunkantaaxaaden kanma.
Biten xufi a marayen su kanma.*
A su da i soomen ro bapen ŋa tooxen maxa.
11 Tooran do tugu ɲanŋun saabu da,
i toxo kanmun Alla diganburunu.
Xa ken do i fi su,
i ma i jikku burun faraaxu.
12 Maliikan tunmunden da i jiranxolla fakkan joxi Furaata fanŋen ŋa.
Jin kaawa,
killen bogu kinbakka tunkanyugun da.*
13 N da jinna sobinto sikki wari,
i gaa xo fantanŋu.*
Baane bogu Saanaaban raqen ŋa,
baane bogu Daaban raqen ŋa,
baane bogu Duxayifaaren¤ raqen ŋa.
14 Jinnanseetaanun ya ni.
I wa kaawafiinun dabarini,
nan daga katta duna tunkanyugon su yi,
kuudo i na i kafu me yi gajankoota xooren ŋa,
Alla xanne maxa,
senbenton senbente.
15 Isa Alimasiiwu ti :
« N riyinten faayi xo fayaana*.
Wulluliŋontaaxun wa seren da,
ke be ga da i kiilun toxo i yiraamun ŋa,
i duuron nan maxa tere,
i gaa hayibeene. »
16 Jinnanu ku da tunkanyugun kafu me yi noqu baane.
Habaraaninxannen ŋa,
i wa ken noqu xilli :
« Haramegido¤ ».
17 Maliikan ɲerunden da i jiranxolla fakkan joxi do fanken ŋa,
ken sigira,
xan xoore bogu Allanbatikan ŋa,
a giri tunkantaaxaade ke ya yi,
nan ti :
« A ɲaŋi keeta ! »
18 Ken noqu,
ɲelunqeyen bogu,
manqanŋen ɲaŋi,
kanmen dire,
ɲiiɲen saralle saralleyi xote yi,
ku fiinu me ma demu ɲaana gelli seren nan bange ɲiiɲen kanma.
19 Debi xooren kare kareyu sikki.
Jamaanen debun guruje.
Alla sinme do Baabila xooren ŋa,
a da jiranxolla fakkan reesendolon kini a yi,
ken gaa a buttu xooren koyini.*
20 Dunden su wuru,
gidun sanku.
21 Maramalli dinkan giri kanmun ŋa,
baane su xotoyen wa tankarage kilo bakka,
nan yere seron kanma.*
Maramallen tooxen maxa,
seron toxo Alla diganburunu,
baawo a taawoonun xooro buru.