[Yaxarin sangaanan kiitiye]
17
Ken falle,
jiranxolla fakkon ɲeri gaa maliikanu ku du baananbe be maxa,
a tinko in ŋa nan ti :
« Alla gaa yaxarin sangaana xoore ke kiitini moxo be,
li yere in na a koyi an ŋa,
ken ga ni debi xoore ke,
a taaxunten gaa ji xooron kanma.*
2 Ɲiiɲen tunkanyugun jeeni do a ya batten ŋa.
Ɲiiɲen taaxaanon xa jeeni nan mande xoyi a moxo. »
3 Alla Fanka Sennen yanqa in ŋa,
maliikan da in wutu do in nan daga gunjuran ŋa.
Ma in yaaxen ga nta yaxare yogo taaxunten ŋa Daaba dunbe¤ kanma.
Daaba ke faten su safanten wa ti Alla toxonbononden ŋa.
Yinmu ɲeri do bennu tanmi wa a yi.
4 Yiran dunbu faranparo wa rondini yaxare ke yi,
a ɲaagaarinten wa ti kanŋen do gidi kallanken do xaɲen ŋa.
Kanjiranxolle wa a kitten ŋa,
a fakkan wa fo buru haraamunten do a jeeniyen mexen ŋa.*
5 Toxo yogo safanten wa a taŋen ŋa,
gundon ya ni,
a wure ya ni :
« Baabila xoore,
yaxarin sangaanon do ɲiiɲen fo haraamunton ma. »
6 N yaaxen wa a mandanten ŋa.
Alla jama senne,
jama ke be ga seede ti Isa yi,
a da kun ya foren mini nan fogu.
N ga da a wari,
n kaawafi moxo buru.
7 Maliikan ti in da kuŋa :
« An kaawafi manne yi ?
N wa yaxare ke gundon koono an danŋa,
a do a ga Daaba ke be kanma,
yinmu ɲeri do bennu tanmi gaa a yi.
8 An ga da Daaba ke be wari,
a ɲi du yi,
xa saasa,
a ntaxa du yi.
A n xawa bakka Jahannaba kun jupe ke yi ya,
nan daga halaki.
Ɲiiɲedunkoonu be toxon safanten ga ma ɲi ŋalinton kitaaben noxon ŋa gelli duna joŋaaru*,
i ga na a wari,
i na kaawafi,
baawo a ɲi du yi,
saasa a ntaxa du yi,
xa a wa yillene bangeene.
9 « Fontuwaaxun do haqilen gollen faami biren faayi :
Yinmu ku ɲeri ni gidi xooro ku ɲeri be yaxare ke taaxunten ga i kanma ya.
Gidi xooro ku ɲeri wure ya ni tunkanyugu ɲeri.
10 Karago xenu bakka i ya,
baane wa mareene saasa.
Ɲerunden ma ri fina,
ken ga na ri,
a na waxati lamaane ya ɲaana.
11 Daaba ke be ga ɲi du yi,
a ga ntaxa du yi,
a yinme ya ni tunkanyugu segunden ŋa.
A xa ni tunkanyugu ku ɲeri du baananbe ya yi,
a wa riini halaki.
12 « An ga da bennu ku tanmi be wari,
tunkanyugu tanmi ya ni,
i ma ri tooren ŋa fina.
Xa i wa riini toori,
i do Daaba ke su wa riini mareyen kita nan toori doome waxati lamaane.
13 I su na sinmayi baane ya yi,
ken ga ni na i senben do i mareyen su kafu Daaba ke maxa.
14 I wa Jaxanlenme ke gajanŋa,
xa a wa i niyini,
baawo Kamanun Kamanen ya ni,
Tunkanun Tunka* ya ni.
A ga da duntenŋu ku be sugandi na i xiri,
a do i wa niyindini. »
15 Ken falle,
maliika ke ti in da :
« An ga da ji xooro ku be wari,
yaxarin sangaana ke taaxunten ga noqu ke be yi,
non ni jamaanun do jamon do xabiilanun do xannun ya koyini.
16 Xa an ga da bennu ku tanmi be wari,
i do Daaba ke wa yaxarin sangaana ke xonno.
Fo wo fo gaa a maxa,
i wa a su ragana a yi na a duuron toxo.
I wa a tiyen yigana,
na a kutten xurumindi yinben ŋa.
17 Na a tuguti Alla yinme ya n da i ramuuriyen dabarimoxo ro i sondomun ŋa.
I su na fi baanen dabari,
na i tunkanyugun senben kafu Daaban maxa ma Alla daalen su ga n tinme.
18 An ga da yaxare ke be wari,
a na debi xoore ke ya koyini,
ke be ga da i tunkaaxun ro duna tunkanyugon su kanma. »