[Baabila xenne]
18
Ken falle,
n da maliika tana wari yanqana gilli kanmun ŋa.
Senbe xoore wa a yi,
a nooron da ɲiiɲen su xurandi.
2 A xiribe xiribeyi xote nan ti :
« A xenu,
a xenu,
Baabila xoore,*
a ɲa jinnanun da ka yi,
a ɲa jinna mexentan xabiila ke su da muxura yi,
yelin bure ke danben do daaba ke fo buren do a fo ɲexunten su bireran ya ni !
3 Ken ɲa ya,
baawo jamaanen su da a jeeniyi xooren reesendolo mini.*
Ɲiiɲen tunkanyugun do a jeeni,
ɲiiɲen julanun ɲa bannanu yi ti a dunarenmaaxun ŋa. »
4 Ken falle,
n da xanne tana mugu gilli kanmun ŋa,
a wa tini :
« N jama,
xa bogu ke debe yi !
Axa do a n maxa kafi i junuubunun ŋa,
taawoonen ga axa do a su katta.*
5 Baawo a junuubunun gabo ma i gaboyen gaa kiɲeene kanmun ŋa,
Alla wa a golli burun tu.
6 A ga da ke be ɲa seron ŋa,
xa da a me ɲaŋi a yi.*
Xa da a golli burun dunfillon tuga a yi.
A ga ɲi seron minindini minifo xaraxace ke be yi,
xa da a dunfillon minindi a yi.
7 A ga da wuce su ɲa dundaraaxun do dunarenmaaxun ŋa,
xa da a yanganxata na a wuyindi ken wuce me yi.
A sefen ɲi ya,
ti :
“ N wa taaxunu yere yi xo tunka,
kiinakariido feti in ŋa,
n nta sunoono abada !* ”
8 Ke ya saabu da,
koota baane noxo,
a gaa taawoone ke danben su walla xenne i kanma :
karawattu,
suno,
ken do dulle.
A yinme na xurumi yinben ŋa,
baawo Alla ke be ga da a kiiti,
Kaman senbenten ya ni. »
9-10 Ken bire,
ɲiiɲen tunkanyugu be do a ga da i wuyin ɲa jeeniyen do dunarenmaaxun ŋa,
i ga na a wari Baabila ga kare,
tiiden gaa segene katta kanmun ŋa,
i na toxo laatoyen ŋa kuudo i n maxa yanganxate,
na wuyen do juugan sigindi a kanma nan ti :
« Wooyi bone,
wooyi bone,
debi xooren ŋa !
Baabila,
debi senbente !
Leeri baane noxo,
Alla duguta an kiiten ŋa ! »
11 Ɲiiɲen julanun xa wa a wuunu na a baaden taaxu,
baawo sere ntaxa i yokkun xobono,
kun ga ni :
12 i kanŋe,
i xaalisixulle,
i gidi kallanŋunte,
ken do xaɲe,
i leenin begi riitinto,
i begi bulanmaanu,
i soyin beginu,
i begi dunbu,
i solli kallanŋunto,
i tuurukanbanyokku,
ken do i yokki kallanken su sollinma,
a jaxawallinma,
a mexenman do a gidisaake,
13 timiliŋaadinkurumen do timiliŋen xabiilan su,
misikinji,
digice,
reesendolon do jayituunante,
jura mullen do fuɲanŋe,
naanun do jaxanlenmu,
siinun do wotoronu,
komon do sere raganto.
14 Julanu ku ti a da :
« An liŋun yokken su wuru nan laato bakka an ŋa.
An bannaaxun do an yanbanŋen sanku an ŋa !
I ntaxa kitene hari abada ! »
15 Julanu ku be ga bannaaxu ti a yi,
i na du toxo laatoyen ŋa kuudo i nan maxa yanganxate.
I na wu na a baaden taaxu.
16 I na ti :
« Wooyi bone,
wooyi bone,
debi xooren ŋa !
A feetufatanten ga ɲi ti leenin yiran mullun do begi bulanmaanu do begi dunbun ŋa,
a ɲaagaarinten ga ɲi ti kanŋen do gidi kallanken do xaɲen ŋa,
17 leeri baane noxo,
ke naabure su ɲa xafu.
»
Fuurawurundaanon do fuuren fakkan sere,
fuurangolliɲaŋaanan su,
do fo wo fo bireyen jonginten gaa geejin ŋa, i laato bakka deben ŋa.
18 I ga da tiidi xolonten wari gilli debi xooren ŋa,
i luuke nan ti :
« Kan deben ɲi xoyi ke debi xoore moxo ? »
19 I wa dooren joqo i yinmun ŋa na i sunoyen koyi.
I wa xaarunu nan wu,
nan juuga nan ti :
« Wooyi bone,
wooyi bone,
debi xooren ŋa !
Debe ke be ga da geeji fuuragumen su ɲa banna,
leeri baane noxo,
a su ɲa xafu !
20 Kanmu,
sewo ti a kareyen ŋa.
Axakun jama senne sero,
xa axa beenu ga ni faaru do xayifaaru,
xa sewo ti a kareyen ŋa*,
baawo a ga kiiti kundu,
Alla da axa tanbon ya tuga. »
21 Ken falle,
maliikan senbente yogo da gidi dinka yogo wutu,
na a sedi geeji noxon ŋa nan ti :
« Baabila xa sediini yanqana kundu ya yi,
debi xoore ke,
a ntaxa kitene hari abada* !
22 Eh,
Baabila !
Sere ntaxa ganbaritimixanne do suuguxanne mukku an kan ŋa keeta.
Fule do buutu,
baane su ntaxa timiini an tageyun noxon ŋa keeta*.
Sere ntaxa kittirangolliɲaŋaana su walla an ka ke yi.
Gondanxanne ntaxa mugiini hari abada.
23 Lanpan ntaxa ɲelunqene an ka ke yi,
maaɲo xannen ntaxa mugiini*.
Ke su ɲaana ya,
baawo duna senbe ke su ɲi an julanun ya maxa.
An da xabiilan su ɲa sankunto ti an korotinden ŋa*.
24 Xayifaarun do Alla jama sennu,
ken do i ga da sere su xurusi ɲiiɲen kanma,
ken su foren joxi an ka ke ya yi. »