[Niyindi suuge]
19
Ken falle,
n da xan xoore mugu kanxotten ŋa,
an tini jama xoore ya ni.
A wa tini :
« Haleluya !
Tiigeyen wa Alla da !
Kisiyen do nooron do senben wa o Alla da !
2 A kiiten su ni tonŋun do teleŋontaaxun ya yi.
A da yaxarin sangaana xooren kiiti,
aken be ga da ɲiiɲen su sankundi ti i jeeniyen ŋa.
A ga da Alla komo be foron joxi,
Alla da kun ya haqen tuga a yi*. »
3 I saage tini :
« Haleluya !
Tiigeyen wa Alla da !
Debi xoora buyinten tiiden sege katta kanxotten ŋa ma abada* ! »
4 Tanpille ke do xirisu ku naxati do tagefo ŋalinto ku naxati tusi na Alla ke be taaxunten gaa tunkantaaxaaden kanma batu,
nan ti xadi :
« Anmiina !
Haleluya,
tiigeyen wa Alla da ! »
5 Xanne yogo bogu tunkantaaxaade ke yi nan ti :
« Axakun be ga ni Alla komon ŋa,
xa da Alla tiiga,
axa be gaa kanna Alla yi,
xa da Alla tiiga,
seri darun do seri maxayanqanto* ! »
6 Ken falle,
n da xanne xa mugu,
an tini jama xoore,
ma an na ti ji xoore gujugujje,
a wa direene xo kanme.
A wa tini :
« Haleluya !
Xa da Alla tiiga !
Baawo Kamane,
o Alla,
Senbenton Senbente,
a mare !
7 O n ɲaxali,
o n sewo !
O na a daro !
Baawo Jaxanlenmen yaxun ɲaxan biren kiɲe.
A maaɲon da i moxo sirondi.
8 I da leenin yiran mulle yogo dabari a da,
a kallanŋunte,
a ɲelunqante.
»
Leenin yiraame ke na Alla seri sennun golli teleŋonton ya koyini.
9 Maliika ke ti in da :
« A safa nan ti :
“ Wulluliŋontaaxun wa seron da,
ku be ga xiri Jaxanlenmen ɲaxan ŋa.
” » A saage tini :
« Alla daalen yinme ya ni ku yi. »
10 N da du sedi maliika ke taanun ŋa kuudo na a batu.
Xa a ti in da :
« Maxa ke dabari !
Nke ni an me kome ya yi,
an maarenmu ku be ga da Isa Alimasiiwu seedeyen tigiti,
o su n baana.
An nan xawa Alla ya batta.
Baawo,
xayifaaraaxun tuuganten na Isa seedeyen ya yi. »
[Si xullen settaana]
11 Ken falle,
n da kanmun raqen wuɲinten wari,
si xulle yogo bange.
A settaanan toxon ni :
« Duntenŋe do Tonŋu.
» A wa kiitini nan gaja ti teleŋontaaxun ŋa*.
12 A yaaxon wa ɲelunqene xo yinbinkuma.
A yinmen fakka tunkantoore.
Toxo yogo safanten wa a yi,
a yinme baane ya na ken tu.
13 Doroke wa rondini a yi,
a su fore*.
I wa si ke settaanan xilli xadi :
« Alla Daale.* »
14 Kanmun kuranlenmon wa si xullun kanma nan sukke do a yi.
Leenin yiran xullun wa rondini a su yi,
i mullu,
i ɲelunqanton laabanto.
15 Jaraxo sexette bogu si xulle ke settaanan raqen ŋa,
ken na xabiilan su ya sufana.
A wa i kandana ti mexendokkon ŋa.
A yinme na reesenun bolli bollindinoqun ŋa,
ken gaa Alla buttun xoore koyini,
Senbenton Senbente.
16 A safanten wa a doroken do a togen kanma ti :
« Tunkanun Tunka,
Kamanun Kamane.* »
17 Ken falle,
n da maliika yogo siginten wari kiyen kanma.
Yeliŋe su toolonten gaa kanxotten ŋa,
a xan xooren wa tini i da :
« Xa ri,
xa kafi me yi,
Alla baasi xooren faayi riini.
18 Axa na tunkanyugun do kurunxirisun do kuranlenmon tiyun yiga,
axa na siinun do i settaanon tiyun yiga.
Axa na i tiyen su yiga,
hooren do kome,
seri darun do seri maxayanqanto.* »
19 N yaaxen wa Daaba ke do ɲiiɲen tunkanyugun ŋa,
i ga da i kurun kafu me yi nan xenu si xulle ke settaanan do i kuranlenmon ŋa*.
20 Daaba ke yinme rage.
Duxayifaare ke be ga ɲi kaawafiinun dabarini a jon ŋa na seron sankundi ma i gaa Daaban maaran roono du yi na a sawuran batu,
a xa rage.
Daaba ke do Duxayifaare ke biranton sedi yinbinguufan do tinbiritin noxon ŋa.
21 Kuranlenmon su kara ti jaraxo ke be ga bogu si xullen settaanan raqen ŋa.
Yeliŋen su da i tiyen yiga nan fogu.