[Wujune siine]
20
Ken falle,
n da maliika yogo yanqanten wari gilli kanxotten ŋa.
Jahannaba kun jupen xarinlenmen do surun xooro wa a maxa i kitten ŋa.
2 A da Saanaaban raga,
ken ga ni gannin samaqen ŋa*.
A ya ni Ibiliisa,
Seyitaane ya ni.
A da a ro xarun ŋa wujune siine.
3 A da a fitta katta Jahannaba kun jupen ŋa na a raqen texe,
na a beexi,
kuudo Saanaaba ke n maxa katu jaman sankundini katta wujunen siinen gaa tinmene.
Ken falle,
a nan xawa warene waxati lamaane.
4 Ken falle,
n yaaxen wa tunkantaaxaadun ŋa.
Ku beenu gaa i kanma,
kiiten ro kun kittun ŋa.
Ku beenu ga ma Daaban batu sakkati i na a sawuran batu,
i ga ma a maaran ro i taŋon do i kittun ŋa,
i yinmun ga kuti do Alla daalen do Isa seedeyen ŋa,
n yaaxen wa i xa yi.
I saage katta bireyen ŋa,
i do Kisindaanan wa marene wujune ke siinen noxon ŋa*.
5 Ken ni wundiyi fanan ya yi*.
Furun kuttun kun nta wundini ma wujunen siinen ga n tinme.
6 Wulluliŋontaaxun do senoyen wa seron da,
ku be ga taye wundiyi fanan ŋa.
Kalli fillanden ra nta fo wo fo ɲaana i ya.
I wa ɲaana Alla do Kisindaanan da xidimaano yi*.
I do Kisindaanan na mare wujunen siinen ŋa.
[Ibiliisa kiite]
7 Wujunen siinen ga na tinme,
Ibiliisa na ware bakka kason ŋa.
8 Xabiilanu ku be sanqinton gaa do duna su yi,
kun ga ni Yaajuuju do Maajuuju* yi,
a na daga i sankundi kuudo na i kafu me yi gajanŋen xanne maxa.
I gaboyen gaa xo geejinxannen seyinfunse.
9 I jaman na ɲiiɲen kanma faga,
na jama sennen daaxan yoori,
Alla liŋun debe.
Xa,
yinben na giri kanmun ŋa na i xurumindi*.
10 Ken noqu,
Ibiliisa ke be ga da i sankundi,
a na sedi kafiini Daaban do Duxayifaaren ŋa yinbinguufan do tinbiritin noxon ŋa.
I na toore wuron do kiye ma abada.
[Kiiti lagare]
11 Ken falle,
n yaaxen wa tunkantaaxaadi xoore yi,
a xulle.
Sere be gaa a kanma,
n yaaxen wa a xa yi.
Kanmun do ɲiiɲen wuru laatono bakka a yi.
I sanku,
hari i batte ma toxo.
12 N da furun wari,
seri darun do seri maxayanqanto,
i wa tunkantaaxaade ke jon ŋa.
Kitaabun wuɲinton wa.
I da kitaabe tanan wuɲi,
ŋalinton kitaaben ya ni.
Ke be safanten gaa kitaabe ke noxon ŋa,
furun kiiti ti ken ya yi,
sere su gollun lanɲara*.
13 Furu be gaa geeji noxon ŋa,
a da i fica.
Furu be gaa Kalle do Laahara maxa,
i do i ri.
I da a su kiiti ti i gollun lanɲaran ŋa.
14 Ken falle,
i da Kalle do Laahara fitta yinbinguufan noxon ŋa.
Ken ni kalli fillanden ya yi.
15 Fo wo fo toxon safante ga ma ɲi ŋalinton kitaaben ŋa,
ken su sedi yinbinguufan noxon ŋa*.