[Kanmu kurunban do ɲiiɲa kurunba]
21
Ken bire,
n yaaxen wa kanxotti kurunba yogo do ɲiiɲanxotti kurunba yogo yi*.
Kanxotti fanan do ɲiiɲanxotti fanan sanku,
geejin xa ntaxa du yi.
2 N da debi sennen wari,
Yerusalaamu kurunba.
N da a wari yanqana gilli Alla kaaran ŋa kanxotten ŋa.
A moxo siro xo maaɲo be ga da du ɲaaga katta i kiina yi.
3 Ken noqu,
n da sefexan xote mugu gilli tunkantaaxaade ke yi nan ti :
« Alla kan faayi haadamarenmun naxa !
A na daaxe do i ya,
i na ɲa a duudajama*.
Alla yinme na ɲa i noxon ŋa,
a na ɲa i Alla yi.
4 A na yaaxanji su suura bakka i yaaxon ŋa.
Kalle do baade,
juuga do toora,
baane su ntaxa ɲaana,
baawo duna fanan sanku. »
5 Ke be taaxunte gaa tunkantaaxaade ke kanma,
a ti :
« A faayi,
n wa fon su kurunbaaxunu.
» Ken falle,
a ti :
« Ku safa,
baawo ku ni duntensefon ya,
tonŋun ya ni. »
6 A saage tini in da :
« A su ɲa nan duguta.
Nke ya ni Alifa¤,
nke ya ni Omeega ;
nke ya ni fanan do lagare.
Daqu gaa sere be yi,
n na ŋalijin waranlaqen kini a yi xafu.
7 Niyindaanan taqen faayi :
n wa ɲaana a Alla yi,
a na ɲaŋi in renme yi.
8 Xa ku be ga ni xaaxanto,
danqanaaxuntanbalinu,
golli haraamunta ɲaŋaano,
seri kallaano,
jeenaananburu,
suxuɲo,
munubattaano,
ken do gaarante su,
i taqen ni yinbinguufan do tinbiritin ya yi.
Ken ni kalli fillanden ya yi. »
[Yerusalaamu kurunba]
9 Ken falle,
jiranxollo ku ɲeri be fakkon ga taawooni lagaru ku ɲeri yi,
i gaa maliikanu ku ɲeri du baananbe be maxa,
a ri katta in ŋa nan ti in da :
« Li yere,
n na Jaxanlenmen maaɲon koyi an ŋa,
a yaqe. »
10 Alla Fanka Sennen yanqa in ŋa.
Maliika ke da in wutu do in nan daga gidi giile kanma na Yerusalaamu koyi in ŋa,
debi senne ke,
debe ke be ga yanqa gilli kanxotten ŋa Alla noqu.
11 Alla nooron ya na a xurandini a wa ɲelunqene xoyi gidi kallanken moxo,
walla xoyi luuluyin gide,
a weerinma.
12 A yoorinten wa ti tageyi dinka giilu yi,
roraqu tanmi do fillo wa a yi.
Maliikanu tanmi do fillo wa roraqu ku yi,
toxonun safanton wa roraqu ku yi,
kun ni Banisirayila fonlaqu ku tanmi do fillon toxonun ya yi.
13 Roraqu sikki wa kinbakka,
roraqu sikki wa kinxenna,
roraqu sikki wa saaheli,
roraqu sikki wa banboxu*.
14 Debe ke tageyun taaxunton na gidindungo tanmi do fillo ya kanma,
Jaxanlenme ke faarun tanmi do fillo,
baane su toxon safanten wa gidindunga kanma.
15 Ke be ga ɲi sefene in da,
xensendifo yogo wa a maxa,
kanŋen guman ya ni.
A na debe ke do i roraqun do i tageyun ya xensene ti ken ŋa.
16 Debe ke ni jungunnaxaton ya yi,
a noxon do a tan su nan ɲokka.
Maliika ke da a xense ti kanŋe ke guman ŋa,
a ɲa a xensan wujunu tanmi do fillo¤ yi.
A noxon xooroye,
a tan giiloye,
a sige,
a su n ɲokka.
17 A da tageyun xa xense,
i sigen gemu kame do tannaxate do sogono naxati,
sogonen be ga ni haadamarenmun xensendifon ŋa,
maliikan da i xense ti ken ya yi*.
18 Tageyu ku tage ti luuluyin ya yi.
Debe ke yinme ni kan hooren ya yi,
a wa ɲelunqene xo weeri.
19 Tageyu ku taaxunton gaa gidindungo be kanma,
a su jagonten ni ti gidi kallanke ke xabiilan su ya yi.
Jago fanan ɲa ti luuluyin ya yi,
fillanden ni yaaxuuti ŋelexu-ŋelexunte,
sikkanden ni sebo,
naxatanden ni jemuruudu,
20 karaganden ni onkisi,
tunmunden ni degene dunbe,
ɲerunden ni yaaxuuti sawansawe,
segunden ni toroose,
kabunden ni topace,
tanmunden ni jesiibu,
tanmu do baananden ni leseemu,
tanmu do fillanden ni halaama*.
21 Roraqu ku tanmi do fillon bogu xaɲanxunturo tanmi do fillo ya yi.
Roraqe su wa bakka do xaɲanxuntura yi.
Debe ke bera xooren ni kan hooren ya yi,
a wa ɲelunqene xo weeri.
22 Xa allanbatikan ke,
n ma hari baane wari debe ke yi,
baawo a allanbatikan ni Kamane ke ya yi,
ken ga ni Senbenton Senbente Alla yi,
a do Jaxanlenme ke.
23 Debe ke haaju nta kiye xuraye yi,
a haaju nta xaso xuraye yi,
baawo Alla nooron ya na a xurandini,
Jaxanlenme ke ya ni a lanpan ŋa*.
24 Xabiilanun su wa riini tere a nooron noxon ŋa.
Ɲiiɲen tunkanun xa do i nooron na ro*.
25 A roraqu ku xa nta texeene kiyen muuma,
baawo wuro ntaxa roono non ŋa*.
26 Xabiila ke su nooron do i darontaaxun su wa riini kafi i ya.
27 Sobe su nta roono non ŋa,
fo be gaa xo :
golli haraamunta ɲaŋaana,
a do gaaranto*.
Xa ku be toxonun ga safe Jaxanlenmen ŋalinton kitaaben ŋa,
kun baane ya n roono.