[Arijanna]
22
Ken falle,
maliika ke da fanŋe koyi in ŋa,
ŋalijin gaa a yi,
a ga funti bakka Alla do Jaxanlenmen tunkantaaxaaden ŋa*.
A wa ɲelunqene xo weeri.
2 Fanŋe ke bogu ti deben bera xooren ŋa,
ŋaliyitten wa sikki a kuton filli yi*.
Siine su yitte ke wa saarene taanu tanmi do fillo,
xaso su ta baane.
A daren na non ŋa xabiilan su ya jaaranden xanne maxa.
3 Langande su ntaxa non ŋa*.
Alla do Jaxanlenmen tunkantaaxaaden wa riini ɲa debe ke noxon ŋa,
Alla komon na a batu.
4 I wa riini a yeeson wari,
a toxon na safe i taŋon ŋa*.
5 Wuro ntaxa keeta.
Sere su haajun ntaxa lanpa xuraye yi,
sere haaju ntaxa kiyen xurayen ŋa,
baawo Kamane Alla wa i nooron sanqini seron kanma xo lanpa*.
I na toori ma abada*.
[Isa riye]
6 Ken falle,
maliikan ti in da :
« Ku ni duntensefon ya,
tonŋun ya ni.
Kamane Alla,
ke be gaa sefon roono xayifaarun raqun ŋa,
a da i maliikan xayi kuudo fiinu be gaa riini katta kaane,
a na i tuyindi i xidimaanon ŋa*. »
7 Isa Alimasiiwu ti :
« Fonne sa in na ri !
Wulluliŋontaaxun wa seron da,
ku be gaa tigitini ku annabinyinsefo be gaa kitaabe ke noxon ŋa. »
8 Nke Yohanna,
n yinme ya n da ku mugu,
na i wari.
N ga da i mugu na i wari kuŋa,
maliika ke be ga da ku koyi in ŋa,
n sujudi a wure kuudo na a batu.
9 Xa,
a ti in da :
« Maxa ke dabari !
Nke yinme ni xidimaana ya yi xoyi an moxo,
xoyi an waaxinun moxo annabinyinmu ku,
xoyi fo wo fo ga tigiti ke kitaabe sefon ŋa.
An nan xawa Alla ya batta. »
10 Ken falle,
a yille tini in da xadi :
« Maxa ke kitaabe ku annabinyinsefo toxo gundon ŋa,
baawo waxatin tinko*.
11 Keeta ke,
teleŋontanbalin nan toxo do i teleŋontanballaaxun ŋa,
senontanbalin nan toxo do i senontanballaaxun ŋa,
xa teleŋonten nan toxo do i teleŋontaaxun ŋa,
senonten nan toxo do i senontaaxun ŋa*. »
12 Isa Alimasiiwu ti :
« Ayiwa,
fonne sa in na ri !
Sere su tugaaden wa in maxa,
an do ke be ga n xawa,
n na ken kini an ŋa,
an gollun lanɲara*.
13 Nke ya ni Alifa,
nke ya ni Omeega,
nke ya ni fanan do lagare,
nke ya ni jopeyen do ɲameye*. »
14 Wulluliŋontaaxun wa seron da,
ku be ga da i dorokon wanqi¤,
kuudo i na ŋaliyitte ke kita,
nan ro ti deben roraqun ŋa.
15 Xa seranwullun do suxuɲo,
jeenaananburu,
serikallaano,
munubattaano,
a do sere su gaa gaaren mulla ma an gaa a gollen dabarini,
kun kun toqo sellan ya yi !
16 « Nke Isa,
n da in maliikan ya xayi axa yi ti a na seedaaxun kiɲandi jamon ŋa.
Nke ya ni Tunka Daawuda funtindo,
Tunka Daawuda bonsonŋe.
Nke ya ni suxubansaani bangante* ke yi. »
17 Alla Fanka Sennen do maaɲon ti :
« Li !
»
I be ga mugi,
an xa nan ti :
« Li !
»
Daqu gaa sere be yi,
a nan li !
Sere be gaa ŋalijin mulla, li a wutu xafu.
18 Sere su gaa ke kitaabe ku annabinyinsefo mukku,
nke Yohanna wa a koono a kaman da gelli waca nan ti :
sere wo sere ga da fo kafu kitaabe ke ku annabinyinsefo yi,
taawoonu be koninton gaa a noxon ŋa,
Alla wa i kapa an maxa.
19 Sere wo sere ga da fo bogu ke kitaabe ku annabinyinsefo yi,
taqe be gaa an xa maxa ŋaliyitten do debi senne ke be xibaaren gaa ke kitaabe noxo,
Alla an kumana ken ŋa*.
20 Isa Alimasiiwu da ku digaamu toŋondi,
a ti :
« Tonŋu,
fonne sa in na ri.
»
Anmiina.
Kamane Isa, li !
21 Kamane Isa neeman gan na ɲa do axa su batten ŋa.