[Isanjaman biremoxo sire]
13
Axakun Isanjama, xanuye be gaa axa naxan ŋa, xa jokki do a yi. 2 Xa maxa lanpu siroyen ɲanŋen ŋa mukkunun da, baawo yogonu da maliikannun mukkaaxu, na a ɲi i ma a tu. 3 Xa sinme do kasorankon ŋa, xoyi axakun yinmu gaa kasorankaaxun ya yi do i batten ŋa. Ken roxomaxantaaxun gaa sero beenu kanma, na a raga xo axakun yinmenu faton ya ga ni ken ŋa. 4 Xa da yaxun daro, yaxanlenmon du baananbe su nan ɲaŋi i kapanlenman da duntenŋe yi ti saxan ŋa. Baawo Alla na jeenaananburen do sangaanan kiitini ya. 5 Axa bireyen nan maxa jongi xaalisin xanuyen ŋa. Ke be gaa i be maxa, Alla raga ti ken ŋa. Baawo Alla yinme daali : « N nta an walla, n nta an sedde xa abada. »* 6 Ken kuŋa, o ra wa a koono ti saxiiraaxun ŋa nan ti : « Tunka Duumanten ya ni in yidandaanan ŋa, n nta kanna fo wo fo yi. Seron katta man ɲaana in ŋa ? »* 7 Axa yinmanka fano ku be ga da Alla digaamen koni axa da, xa sinme do i ya. Xa da i faayi i bireyen lagarun ga ɲa moxo be, xa na i danqanaaxun seera. 8 Isa Alimasiiwu ni moxo baane ke ya yi daaru do lenki, ma abada-abada.9 Xa maxa du wara do xaran sagatantan danben su batten ŋa, baawo fo siren ni butte nan xoto ti Alla neeman ya yi, xa a n maxa xoto ti sadaxanyigandu yi, ku beenu yigeyen ga ma i kamannu nafa. 10 Sadaxindinoqun¤ wa o maxa, xa sadaxa be gaa a kanma, ku beenu gaa xidimeene tilliisi sennen ŋa, ken sadaxa yigeyen ɲaamariyen nta kun maxa. 11 Baawo sadaxakiɲandaananyinmanken do futuxiyinsadaxandaabanu ku foron ya n telle noqu sennun fo sennen ŋa, xa i muumo ku kuttun xurumini daaxan falle ya¤. 12 Ken ya n sigi kuudo Isa xa na jaman baari ti i yinme foren ŋa, a xa ga jondunkawandi nan kara deben falle ya. 13 O xa n bogu katta a yi daaxan falle kuŋa, o n jondunkawandi xoyi a moxo. 14 Baawo duumedebe nta oku maxa duna yi yere, xa ganta oku na debi lagaren ya muurunu laxiyaamansan ŋa. 15 O nan toxo kuufandisadaxan sadaxini Alla da ti Isa yi waxati su, ken ga ni o soomonfaton xiireye ti a toxon ŋa. 16 Xa maxa mungu do siroyen do me deemanden ŋa, kun ya ni sadaxon ŋa, i ga n liŋi Alla da.
17 Xa da axa xidimandaanon daro, xa na du maxayanqa i da, na a sababun ɲa i gaa axa biremoxonun koroosini, i na tirindinden ɲiini du kaane yi ya Alla noqu. Ken ŋa, i xa na katu i siga sikki ti sewoye yi, a ga feti buttunxaasa, baawo ken nta fo wo fo sirono axakun ŋa. 18 Xa da Alla ɲaaga o da, baawo o saxunton wa a yi nan ti haqilitaaxen wa o maxa, ken do fisiriɲanŋen ŋanniye. 19 N na a muurunu axa maxa ya, axa na Alla ɲaaga, kuudo in nan katu telle bogu axa yi jawoye.
[Duwanŋen do digan lagaru]
20 Jaxanlenmun nagaana xoore Isa Alimasiiwu, ken ga ni o kaman yugon ŋa, xeerin tunka ke be ga da a girindi bakka furun naxa ti sarati duumanten foren ŋa, 21 a gan na axa tinmandi ti golli sire su ɲanŋen ŋa, axa n katu a ɲaana a liŋun ŋa. A yinme gaa ke be mulla, a gan na ken sabatindi o danŋa¤ ti Isa Alimasiiwu yi, darontaaxun gaa ke be danŋa ma abada-abada. Anmiina.
22 N wa a muurunu axa maxa in waaxinu, xa na in waajundidigaamu ku raga ti sabariyen ŋa. Baawo in ma fo gabe fatanpansi axa da ti ke bataaxe safanden ŋa katta axa yi. 23 Axa na a tu xa nan ti o waaxi Timoote ware. A ga na ri jawoye yi su, n do a wa dagana axa wari doome. 24 Axa na axa xirisun do axa jama sennen su kuuɲi. Waaxinun su wa axa kuuɲini gelli Yitaali yi. 25 Alla gan na axa su neema. [Anmiina¤].