[O marande Alla maxa]
12
Ken kuŋa, ku seedaano me jama xoore ga da oku beenu xa goorinkatu, o xa na likke su wara. Junuubu ke be kiteyen neyen ga ni, a gaa o goorinkatta, o na a wara. Mefirinde ke be gaa o kaane, o n wuru do a batten ŋa duruxotoye yaaxe maxa. 2 O na o yaaxen sigindi do Isa batten ŋa, a ya n da danqanaaxun killen wuɲi o kaane, a tinmandaanan ni aken ya. A duŋe kalla sallibin kanma, a ma yaaguntaaxu ti ken ŋa xa, baawo a yaaxen na ke xeeri be gaa ken falle ya. Saasa kuŋa, a faayi taaxunu Alla tunkantaaxaaden tayen ŋa. ¤* 3 Xa sinme ya, aken be ga da junuubunton tooran muɲi, kuudo axa yonkinun nan maxa wancu. 4 Axakun ma axa foron joxi do junuubun gajanŋen batten ŋa fina de ! 5 Alla ga da axa toŋo xo i renme, axa mungu do ken ŋa ya ?A daali ya : « N lenme, maxa Tunka Duumanten marandikitten battaranraga. Bire be a ga na an jalagi xa, maxa lanpu.
6 Baawo Tunka Duumanten gaa sere be mulla, a na a marana ya. A ga da ke be raga i renme, a na a jaanini ya. »*
7 Xa da tooran muɲi, ken ni Alla na axa marana ya xo renme. Kan renme na du yi faaben ga nta a marana ? 8 Xa, axa ga ma mare xo kuttun su ga ɲa moxo be, ken ŋa kaafallarenmun ya ni axa yi, axa feti ren xullu. 9 O faaba fatagankon du da o mara, o da i daro ken su kanma. Sigaali faaba kallanken be ga ni yonkinun kanman ŋa, yaala o nta xawa du maxayanqana a ya danŋa ba kuudo o na bire ? 10 Ku da o mara wucu lamaaninne ya yi tannu, i sinmayen lanɲara. O faaba Alla ken ken xa na do o jamun ya batte, kuudo na o kafu du yi i senontaaxu ke yi. 11 Tonŋu, maranden biren ŋa, a nta sere sewondini, aayi, an sunoono ya. Xa a lagarun ŋa, a saarene ti teleŋontaaxun xeerin ya yi jikkusirigumun da. 12 Ken saabu da, « xa da axa kitti tanpinton wutu, xa na axa xurungu lanpunton xotondi.* » 13 Xa da killen teleŋondi axa taanun wure,* kuudo jogooninton taanun nan maxa joogi, xa, i nan saha yinme du ya ni.
[Nan maxa bara Alla gongonden ŋa]
14 Xa sukke do xeerin ɲanŋen ŋa axa do seren su naxa, a do sennaaxu. Ken ya ga fe, sere su ra nta Tunka Duumanten walla. 15 Xa da axa moxo tu, sere su n maxa kume Alla neeman ŋa, ken gaa saarene ti golli bure yi*, na jaman sobindi. 16 Xa da axa moxo tu, seri baane n maxa ɲa jeenaananbure yi, ma walla xa nan ɲa allankannanbali, xo Yesaawu moxo : a ga da i soomaaxun gaaga do logoman batten ŋa*. 17 Axa wa a tu de nan ti ken falle a ga da a xanu i na duwaawun kita i faaba yi, a yonte ya ; hari a ga wu nan yaaxanji do duwaawun batten ŋa, a ma durasaagemoxo kita.*
18 Axa ma tinko gide yi, sere ra gaa katiini ke be yi, yinben gaa me yigana, bitanbinnen do minaaxe, ken do fanka boroke, 19 ken do buutuxan xoore do diganxannu. Ku beenu ga da i mugu, i xanjondi kuudo diganxanne ke n maxa ri i ya xadi. 20 Baawo i ga da i ɲaamari ke be yi, i ma katu a muɲini : « Hari daaba nda kiɲe gide ke yi, a n gididunware. »* 21 Ken fi warinte ɲa kanu xooren ŋa, ma Muusa gaa tini : « N kanu, ma in nan toxo sarallene »*.
22 Xa ganta, axakun kiɲe Siwoona giden ŋa, Alla ŋalinten debe, Yerusalaamu kanmudunke, nan kiɲe wujuunun wujuunun maliikanun kafon ŋa ɲaxana ; 23 axa kiɲe toŋondiyenmun jaman ŋa, i toxonun safanton wa kanxotten ŋa ; axa kiɲe Alla yi, Alla ke be ga ni a su kiitaanan ŋa ; axa kiɲe yonki baarinto ku beenu ga tinme ; 24 axa kiɲe sarati kurunba ke gaddun ŋa, ken ni Isa ya yi ; axa kiɲe fori sanpanto ku be gaa sonqono nan xoto Haabila foron ŋa.*
25 Xa da axa moxon tu, ke Alla be gaa digaamunu axa da, xa maxa bara a terinkana. A ya n ɲi Banisirayilaganko gongono ɲiiɲen kanma i ga bara a terinkana, i ma yanganxatan firi de, ma kan moxo ? Sigaali a gaa digaamunu oku be da kanmun ya yi, o ga na o falle koyi ken ŋa, yaala o wa firiini ba ? 26 Aken Tunka be diganxannen ga da ɲiiɲen sarallandi, a ya n da laayidun wutu saasa xadi, nan daali : « N wa ɲiiɲen sarallandini xadi, xa ɲiiɲen baane fe de, a do kanmun su ya ni. »* 27 « Xadi » ke konŋen wure ni : tagefon su wa saralleene nan buruxe, kuudo ke be ga nta sarallene ken na toxo duumene. 28 Ken kuŋa Allantunkaaxun ya na oku maxa, ken nta sarallene sigaali a na buruxe. Ken nan ɲa kuufanden ya yi oku maxa. O n xidime moxo be ga n liŋi Alla da ti dumaxayanqanden do allankannen ŋa. 29 Baawo oku kaman ni yinben ya, a gaa buruxandini*.