[O seri fanon danqanaaxu]
11
Ayiwa danqanaaxun ni nan saxu fon ya yi, an ga da ke be jigi, nan toŋondi ti fon ŋa, an ga ma a wari. 2 Danqanaaxun ya n sigi Alla ga seedannaaxu ti o seri fanon siroyen ŋa. 3 Danqanaaxun ya n sigi o ga da a faamu nan ti Alla da kanfaton do ɲiiɲanfaton taga ti daalen ya yi, kundun ya ni ; ma o gaa a walla nan ti ke be gaa wariini, a giri ke be ga nta wariini ya.4 Danqanaaxun ya n sigi Haabila ga da sadaxa xooren sadaxi nan xoto Xaabila yi.* Danqanaaxun ya n sigi xadi Alla ga seede aken Haabila da nan ti teleŋonten ya ni, ken ya n sigi a ga duŋe ti a sadaxan ŋa. Danqanaaxun ya n sigi hari a karafalle, a sefen gaa finna du yi.
5 Danqanaaxun ya n sigi Hanooxi ga wurugi segene kanmun ŋa, kuudo a n kisi kallen ŋa. Sere su maxa a wari, baawo Alla ya n da a wurugi. Ganta saado a gaa wurugiini, seedeyen ɲa nan ti a n liŋi Alla da.* 6 Danqanaaxun falle, sere ra nta liŋoono Alla da, baawo sere be ga na lafi tinkoono Alla yi, an nan xawa danqanaaxunu ya nan ti a wa du yi, nan ti sere be xa ga na a muuru, a wa an baraajini.
7 Danqanaaxun ya n sigi Nuuha ga gonge ti fiinun ŋa na a toxo a ma i wari. A kanu Alla yi na fuuren dabari, kuudo na i koren kisi. Danqanaaxun ya n sigi a ga da dunadunko jalagi. A da teleŋontaaxun xeye ti i ken danqanaaxu ya yi.
8 Danqanaaxun ya n sigi Ibirahiima ga da ɲaamariyen kita bire be nan ti i wa jamaane xeyene, jamaane be i ga nta a tu, a ga bogu i jamaanen ŋa nan daga. 9 Jamaane ke be laayidun ga wuti a da, danqanaaxun ya n sigi a ga ri taaxu ken jamaane yi xo tuŋaaranke, a do Isiyaaxa do Yaaxuba ɲi taaxunu tilliisun ya wure, kun xa ni ken laayidu baananne xeyaanon ya yi. 10 Ibirahiima ken ya a sinmana nan ti debi taganten ya ni, Alla yinme xa ya ni ken debe noonindaanan do a tagandaanan ŋa.
11 Danqanaaxun ya n sigi hari Saaratu xa ga ɲi borokaaxun ŋa, a¤ ga ri funtifon kita nan lendunjaaxaaxu saarewaxatin dangi falle. Baawo ke be ga da renmen laayidun wutu a da, a saxunten ya na a yi nan ti duntenŋen ya ni. 12 Ken ya saabu da ni xadi, yugu baane, kallen ya ga toxo a da, a ga jiidi xo kanmun saanun moxo, xoyi seyinfunsen moxo geejinxannen ŋa,* i ra ga nta yirigeene. 13 Ku su kara danqanaaxun noxon ya yi, na a ɲi ke be laayidun ga wuti i da, i ma a kita i kitten ŋa. Ganta i da a wari laatoyen ŋa nan sewo ti a yi, nan danqanaaxu ti ikun ni mukkunun ya yi, girin-girindaanon xa ya ni i ya ɲiiɲe ke kanma. 14 Ayiwa ku beenu gaa sinmene ke moxo yi, i wa a xurandini nan ti i na i duudan faabankutiye ya muurunu. 15 I gan n ri i ga sinme do i girinoqun ŋa, ganpinsa i ɲi yillene, baawo yillemoxon ɲi i maxa. 16 Xa ganta kuŋa, i na taaxura daren ya muurunu, ken ga ni Arijanna. Ken kuŋa, Alla nta yaaguntaaxunu nan ti i na i xiri i kaman ŋa, baawo a da debe moxon gemundi i da. 17 Alla ga da Ibirahiima jaarabi bire be ti a na i renme Isiyaaxa sadaxi, danqanaaxun ya n sigi Ibirahiima ga duŋe. Na a ɲi xa laayidun wuti a da ti a ken ren baane ya yi. 18 Ken Isiyaaxa de, Alla ɲi ga da a ko a da do ken ya yi nan ti :
« N ga da an bonsonŋe be laayidun wutu, n na a bangandini Isiyaaxa ya yi. »*
19 Ibirahiima jaatirage xadi nan ti Alla ra wa furen girindini. A renmen saage a yi xo furen ya ga giri. 20 Danqanaaxun ya n sigi Isiyaaxa ga duwa Yaaxuba do Yesaawu lagarimoxon danŋa. 21 Danqanaaxun ya n sigi bire be faatiyen ga ri Yaaxuba yi, a ga tuuge i dokkon kanma nan sujudi, nan duwa Yuusufu renyugun filli da.* 22 Danqanaaxun ya n sigi Yuusufu gaa faatini a ga da Banisirayilaganko bakken sefen ko, nan ti i do ike Yuusufu xottun nan bogu.*
23 Danqanaaxun ya n sigi annabi Muusa teeriyen falle, a saaraanon ga da a wari a faranparen ga ni, i ga da a muxundi xasu sikki. I ma kanu tunkanyugon gangon ŋa.* 24 Danqanaaxun ya n sigi bire be Muusa ga xooro, a ga ntaxa a mulla i na i xiri « Firawuna renyaxaren renme. » 25 A duŋe nan toore do Alla jaman batten ŋa, ken ya n fasu i n daxanlenmi wucu lamaane yi junuubun noxon ŋa. 26 Sugandiyenmen gaa riini roxoye be do toora be kita, Muusa xa da ken toora me ya sugandi diinanta Misira bannaaxun ŋa. Baawo aken yaaxen ɲi muso ke be gaa riini ya. 27 Danqanaaxun ya n sigi a ga giri Misira yi ; a ma kanu tunkanyugon butten ŋa, a da i butten xoto ya. Alla ke be ga nta wariini, an tini Muusa yaaxen ya na a yi. 28 Danqanaaxun ya n sigi a ga da Pesaxansallen salli, na foron suusa do kan roraqen gondomon ŋa, kuudo kallemaliika n maxa sooma yugun halaki.* 29 Danqanaaxun ya n sigi i ga da Xulunjuumu fanŋen kutu xo doŋa kaawante. Xa Misirankon ga ro do i batten ŋa, kun yoole.*
30 Danqanaaxun ya n sigi Banisirayilaganko ga da Yeriiho tageyun arawanga biton ɲeri yi, tageyun ga xenu.* 31 Danqanaaxun ya n sigi yaxarinjeenaana ke, Lahaabu, a ga ma halaki do allankutaanon batten ŋa.* Baawo a da sonsolondaano ku bisimilla ti nuxudunxullaaxun ya yi.
32 N na man tana koono ? Wucen nan defu in nan ti in wa sefene Gidooni kanma, a do Baraaxi do Samusooni do Yifuta, ken do Daawuda, do Samuyeli, kafiini annabinyinmun ŋa. 33 Ku danqanaaxun ya n sigi, i ga da tunkanun ni, nan kiiti ti teleŋontaaxun ŋa, laayidun tinme i da, i da jarinton raqun raga, 34 na yinbi xooron kari, nan kisi kaafan ŋa, i senbekite lanpuntaaxun noxon ŋa, i lagari ɲaana senbenta xooron ŋa gajanŋen noxo, i da xonnon kurun xata, 35 yaxarun da i furun girinton wari. Xa, ku sero yogonu yanganxate, kun ma nate do yonkin laxaafiyan ŋa, i da laxiyaamansa siren ya muuru. 36 I soyi yogonu yi moxo siri, na i jaani, na surunmun ro yogonu yi, na i kaso. 37 I gididunware, na i garaba, na yogonu kari ti kaafan ŋa, i yogonu wa do fon ŋa. Ku sero da jaxafaton do sugufaton ya rondi, nan kume fon su yi, i toore, nan tilifi. 38 Ikun nan xalasinta ke duna da. I yiilene do gunjuran do gidun ya kanma. I na kunmun do gidinkapun ya yi. 39 Ku su danqanaaxun ya n sigi Alla seedannaaxu ti i siroyen ŋa, xa laayidu ke yillen ma kare ikun da. 40 Na a toxo ti Alla ya n da oku kaane taaxu ti ke wosi sire yi, ken kuŋa, ku sero nta tinmeene o falle.