10
Muusa sariya ke be gaa du yi, ken feti sariya sire ke yinme be ga ɲi xawa riini, ken xawaara yogo ya ni tannu. Muusa sariya ke da abadansadaxinden ya muuru o maxa, xenpa nta a yi, siine su sadaxa baanu ku ya ni. Ken do i fi su ku beenu gaa a mulla nan tinko Alla yi, kun sadaxo ra nta i tinmandini abada. 2 Ken gan n maxa fe, ku beenu gaa allanbatini ken moxo yi, i junuubunun na wanqi bakka i ya ta baane. Ga fin ŋa i ɲi du sinmana junuubunto yi xadi ba, xoyi i nta sadaxinde su walla ? 3 Xa ken fe. Siine su ku sadaxo na i sinmandini do junuubunu ku ya yi. 4 Baawo gunbuforo do sugundigiforo ra nta junuubu wanqini. 5 Ken ya n sigi Alimasiiwu royinten ŋa duna yi, a ga jaabi Alla da :« An haaju nta sadaxa do kuye yi, xa an da in ɲa fataganke yi, n nan ɲa sadaxa.
6 An liŋu feti sadaxa xuruminto do futuxiyinsadaxo yi.
7 Ken kuŋa in ti : “ Alla wo, an gaa ke be mulla, n ri ken ya ɲa, xoyi a gaa Safandi Sennun ŋa moxo be yi in xibaaren kanma. ” »*
8 A joŋa tini ya fina : « Sadaxa wo, allankuye wo, sadaxa xuruminte wo, futuxiyinsadaxa wo, an nta ke su muurunu, an nta ɲaxalini ti i ya. »* Ku sadaxo xa sadaxi sariyan kiiten ya kanma xa de. 9 Ken falle a ti : « N faayi ga ri an liŋun ya dabari. »* A da sadaxa fano ku guruja, na fillanden saaga i batten ŋa. 10 Ken ya n sigi oku ga seno bakka junuubun ŋa dubaane ti Isa Alimasiiwu yonkin sadaxinden ŋa ta tinmanta baane yi, Alla liŋun kanma.
11 Sadaxakiɲandaanan su siginten na sadaxa baanu ku ya sadaxini koota su, kun xa ra nta junuubu bakka sere yi abada. 12 Alimasiiwu ken ken kuŋa, a da du sadaxi ta tinmanta baane ke ya yi ti junuubunun ŋa, nan daga taaxu Alla tayen ŋa.* 13 A wa dugundini keeta ma a xonnon ga n'n ɲa taaden ŋa a taanun wure bire be.* 14 Ken ya n sigi Alla ga da ku beenu baari, Alimasiiwu ga da i tinmandi ti abadansadaxa tinmanta baane yi. 15 Fanka Sennen seede o danŋa xadi nan ti Tunka Duumanten daali :
16 « Ke koota dangi falle, n gaa sarati be tapa in do i naxa, a ya faayi ke : Tunka Duumanten daalen ya ni, n wa in sariyan walla i sondomun ŋa, na a ɲegu i haqilun ŋa. »
17 Ken falle nan ti xadi :
« N wa mungunu do i junuubunun do i yangonun ŋa keeta. »*
18 Xafarigeesiyen ga ɲa baane, sadaxanbakke ntaxa waajibini o yi ti junuubuxafariye yi keeta.
[O n tinko Alla yi]
19 N waaxinu jama, ken ya ga ni keeta, oku kun haqilun taaxunto ra wa roono noqu sennun fo sennen ŋa ti o sagon ŋa, na a sababun ɲa Isa foren ŋa. 20 Killi kurunba ŋalinten ya ni, a ga da a wuɲi o da bakka ti yirankutaade ke yi, ken ga ni a yonkin¤ ŋa. 21 Sadaxakiɲandaana dare wa o maxa marene Alla koren kanma yi. 22 Ken kuŋa, o do sondon xulle nan tinko Alla yi saxiiraaxun do liimaanagankaaxun kanma, baawo o sondomun laabe bakka ŋanniyi buren su yi ti foron sanpa-sanpanden ŋa ; o faton wanqi ti ji laabanten ŋa. 23 Ke jikke be o ga xiire ti a yi, o n mali a yi ti saxiiraaxun ŋa, o n maxa geere-geere, baawo Alla ke be ga da kunaxannen kini o yi, duntenŋen ya ni. 24 O na duruxotoyen kini me yi katta xanuyen do golli siren ɲanŋen ŋa. 25 O n maxa o meɲiyun ku wara xo yogonu ga demu a yi moxo be, kundun maɲa. O na me deema ya na a toxoti axa yaaxen wa laxiyaamansan wa tallan tinkoono. O na me waaju ya.
26 Ayiwa tonŋun tuyiyen falle, o ga na a tawu na junuubu golle dabari xadi, sadaxa ntaxa kiteene na o junuubunun xafari de. 27 Ken ken ŋa keeta, kiiten koota xaaxantaaxun ya na o ragana, ken do yinbi ɲanŋe ke be gaa Alla xonnon yigana.*
28 Sere be ga na annabi Muusa sariyan kuta, seedaano filli ma sikko ga seede ti a yi, hinneye nta ɲaana a kaman ŋa. A kaman kalla ya tannu.* 29 Ken kuŋa sere be ga na danpi Allanlenmen da texe yi, ke be foren ga da an baari, na ken raga xo fo fe, saratin ga tafi ti fore ke be yi, na Fanka Sennen diganburu, ken be gaa neeman kiɲana o yi, axa da a sinma ken kaman ya n nta yanganxata xoten kitta nan xoto ke baane yi ba ? 30 Na a toxo ti ke be ga daali nan ti :
« Binbaganden daga inke ya da, nke ya ni tugandaanan ŋa »*, o wa ken kaman tu haali.
Aken ya n ti xadi :
« Tunka Duumanten na i jaman kiitini ya. »*
31 Tunka ŋalinten raganden buren ya ni.
32 Xa, xa sinme do koota danginton ŋa : Bire be axa ga da Alla nooron kita, axa dalla muɲini gajan xoton ŋa, ti duruxotoyen ŋa. 33 Waxatinu yi, i da axa ka duna su naxan ŋa, na axa alihaaraburu. Waxatinu xa yi, ku beenu ga ɲa ken moxo yi, axa kafi i ya na i deema. 34 Axakun toore do kasorankon batten ŋa, i ga da axa kittidufoonun raga axa yi, axa soyi a kanma. Baawo bannaaxu xoore ke be ga n fasu ken ŋa, a gaa duumene abada, axa wa a tu nan ti ken wa axa maxa. 35 Ken saabu da, xa maxa axa saxiiraaxun wara de ; baraaji xooren ya na a yi. 36 Baawo axa haajun na muɲiyen ya yi, nan katu Alla liŋun dabarini, kuudo laayidun na tinme axa da. 37 Baawo a safanten wa Safandi Sennun ŋa nan ti : « Ke be ga n xawa riini, fonne sa a na ri wucinne noxon ŋa, a nta leelene. 38 N seri baarinten bireene ti liimaanagankaaxun ya yi, xa a ga na fallanyille, n nta sewono ti a yi. »* 39 Xa, oku kun feti ku beenu gaa fallanyillene na du bonondi, ken fe ; oku kapa liimaanagankon ya yi, kuudo na o yonkinun kisi.