[Batimoxo xase]
9
Ayiwa xidimeyen farilanun ɲi sarati fana ke maxa xa, ken do ɲiiɲerankan batira. 2 Tilliise banbe, a taxandinten ni kuto filli : kuta fanan wa xiriini « noqu senne », fitillen wa non ŋa, a do sadaxanbuuruntaabalin do i sadaxanbuurunu. 3 Kuta fillanden wa yirankutaaden falle, non wa xiriini « noqu sennun fo senne. » 4 Kansadaxanfutaadinbeelon wa non ŋa, a do laayidunwaxande, a kaaron su gosaasinton ya ni ti kanŋen ŋa, mannan wa kandomen ŋa a noxo, a do Haaruna dokko be ga funti*, ken do saratin wallaho*. 5 Nooron xeribunun kanpon sirawun wa xufini waxande ke bipaaden kanma*, ken ga ni xafarindinoqun ŋa. Xa, o ra nta tini o wa ku fese-fesene saasa. 6 Ayiwa ku fiinu su ga na dabari ya ni bire be, sadaxakiɲandaanon na toxo roono kuta fana ke noxon ŋa keeta, na batiyen farilanun maxafaga. 7 Xa ganta kuta fillandi ke, sadaxakiɲandaananyinmanken baane ya n roono non ŋa ta baane siine su, ken nta ɲaana sadaxandaaban foron ya ga nta a maxa, a gaa xafarigeesimuurini i yinme do jaman futuxiyun da. 8 Fanka Sennen gaa a mulla na fo be bangandi ti ken ŋa, ken ni ya nan ti, na tilliisi fana ke toxo du yi, noqu sennun fo sennen killen nta bangeene. 9 Ke ni taagumansen ya ke kiye yi, nan ti : battaano ku haqilun ra nta taaxunu ti ku sadaxa sadaxinto do ku allankuyu yi. 10 Kun ni yigefoonun do minifoonun ya ni tannu, a do senoyinwanqiyun noonun sariyanu, kun ni seron dagakillun ya yi tannu. I ɲi du yi ya tannu saado killi kurunban gaa bangeene.[Isa Alimasiiwu ɲanŋe sadaxa tinmanten ŋa]
11 Xa, Alimasiiwu ke kuŋa, sadaxakiɲandaananyinmanke ya ni, a ga ri do xeeri ke be gaa du yi. Aken ga ro tilliise ke be yi, ken daren ya ni, a tinmanten ya ni ; sere kitte ma ken dabari, ken feti ke duna fo dabarinte yi. 12 Alimasiiwu ro noqu sennun fo sennen ŋa ta tinmanta baane ya yi, a ma sugo fore do gunbo fore wutu do du yi, kuudo na i ɲa sadaxa yi ; xa, a da i yinme foren ya wutu, a da abadankisiyen kita o da ti ken ya yi. 13 Ayiwa, gunbufore ke do sugundigifore ke, a do gunbu xuruminte ke xamo, i na i sanpa-sanpana sobintayenmun faton ŋa ya na i senondi tannu.* 14 Xa, Alimasiiwu foren ya n senbenta kun ŋa buru. A da du sadaxi Alla yi ti Fanka Sennen senben ŋa, leebu nta a yi xa. A foren sadaxinden wa o haqilun taaxundini bakka o ɲangolli furu¤ ku jooten ŋa, ken ŋa, o na katu Alla ŋalinten batta.
15 Ken ya saabu da ni a ga ɲa xanjondaanan ŋa sarati kurunba ke noxo, kuudo Alla ga da xeyi duumante be laayidun wutu, a gaa sero beenu xilli, i na ken kita. Baawo sero ku beenu ga da junuubu kita sarati fanan noxon ŋa, Alimasiiwu kallen ya n sigi i ga maxawase bakka i futuxiyun ŋa. 16 Kuudo wosixannen nan sabati, wosigumen kallen nan xawa sabatini ya. 17 Baawo wosigumen wosixannen nta sabatini na a toxo a gaa bireene. Wosixannen sabatini ti wosigumen kallen baane ya yi. 18 Ken ya n sigi sarati fana ke ga ma ɲa foron sanpa-sanpanden falle. 19 Baawo Muusa da ɲaamarindixannun su ya xara jaman danman danŋa fina xoyi a gaa sariyankitaabe ke noxon ŋa moxo be. Ken falle a da gunbunun do sugundigun foron wutu, kafiini jin ŋa, na i sanpa-sanpa kitaabe ke do jama ke su kanma ti jaxayinti dunben do yittiderun¤ ŋa. 20 A jaabi : « Tunka Duumanten ga da sarati be kutu i do axa naxa, a taagumansen ya ni ku foro yi, kuudo na laayidu ke sabatindi. » * 21 Ken falle a da foro ku sanpa-sanpa tilliise ke do tilliise ke batiyokkun su yi ken moxo baananne yi. 22 Ken ŋa keeta sariyan maxa, a na xo fon su ga seno ti foren ya yi. Ayiwa yanpeye nta du yi foren ya ga ma joxi.
23 Ku fiinu be ga yaaxe kanmun fiinu ŋa kuŋa, kun seno ke moxo saanan ya yi ; ken kuŋa, ku be yinme gaa kanmun ŋa, kun do sadaxan fo fasanŋunten ya n xawa. 24 Baawo Alimasiiwu ma ro noqu senne ke be seron ga da a dabari, ken noqu senne yaaxe noqu haxiixa ke ya yi tannu. Xa Alimasiiwu ken ro kanmun yinme ya yi ; saasa kundu a faayi Alla jon me naxan ya yi o da. 25 Siine su sadaxakiɲandaananyinmanken do foren ya roono noqu sennun fo sennen ŋa, ke be ga feti aken yinme fore yi. Ganta Alimasiiwu ken ma ro kanmun ŋa nan ti i wa toqo du sadaxini de. 26 Ken gan n ni, gelli duna jopaadun ŋa nan ri a wara saasa yi, kallen tooxen ɲi saqa a kanma yi ya ta gabe. Xa ken fe : a bange ta baane ya yi duna lagare ke yi saasa, kuudo na junuubun buruxa ti du sadaxinden ŋa. 27 Seren su gaa kalla ta baane yi moxo ke be yi de, ken falle an gaa kiitiini, 28 ken moxo saanan ya ni Alimasiiwu ga da du sadaxi ta baane, kuudo na junuubun tiŋa bakka seri gabe yi.* A wa yillene riini xadi, xa ken feti nan ri junuubu wanqi de ! Ken ni ku beenu gaa a dukku, nan ri i kisi ya.