[Sarati kurunba]
8
O ga lafi ke be koono tannu, ken ni ya nan ti : ke sadaxakiɲandaananyinmanke ya na o maxa, aken be taaxunten gaa Kallanken tunkantaaxaaden tayen ŋa kanmun di. 2 A wa xidimene tilliisi sennen ŋa. Sere ma ken tilliise banba, tilliisi haxiixa ke ya ni ; Kamanen¤ yinme ga da a banba. 3 Sadaxakiɲandaananyinmanken su taaxu yinmankaaxun ŋa ya kuudo na allankuyun do sadaxon kiɲandi. Ken ya n sigi fo ga n xawa ɲiini o xa sadaxakiɲandaananyinmanke ke maxa, a gaa a sadaxini. 4 A gan n ɲi ɲiiɲen kanma ya, a ma ɲi ɲaana sadaxakiɲandaana yi, baawo ku beenu gaa sadaxakiɲandini na a saxu sariyan ɲaamariyen kanma, kun wa yere yi. 5 Ikun xidimeye ke ni na kanmun fiinun ya seera na i yaaxa. Muusa gaa allanbatika yiranman sigindini ya ni ken moxon ga koyi a yi nan ti a da : « An na a faayi, na a dabari xoyi xawaara ke be ga koyi an ŋa giden kanma. »* 6 Xa saasa kuŋa, golli wuruginten ya n xaliife o sadaxakiɲandaananyinmanken ŋa. Baawo a ya ni sarati tafunte ke xanjondaanan ŋa, ken sarati fasanŋunte be tuuganten gaa laayidunun fo fasanŋunten ŋa. 7 Baawo leebu gan n maxa ɲi sarati fanan ŋa, ganpinsa sarati tana ma ɲi muuriini a batten ŋa. 8 Tunka Duumanten da i seron kuralli ya nan ti :« Kooton wa riini, n gaa sarati kurunban tapa in do Isirayila dunkoonun do Yehuuda dunkoonun naxan ŋa. Tunka Duumanten daalen ya ni.
9 Ken nta ɲaana xoyi in ga da ke be tafu in do i faabanu naxan ŋa bire be in ga da i raga ti kittun ŋa, na i geesu bakka Misira jamaanen ŋa. Baawo ikun ma ɲa duntenŋu yi in sarati ke maxa, ken kuŋa in xa yille do i batten ŋa. Tunka Duumanten daalen ya ni.
10 Nan ti xadi : Kun kooto dangi falle, n gaa sarati be tapa in do Isirayila renmun naxa, ken ya faayi ke : Tunka Duumanten daalen ya ni : n wa in sariyan walla i haqilun ŋa, na a ɲegu do i sondomun ŋa. N na ɲaŋi i kaman ŋa, i xa na ɲaŋi in seron ŋa.
11 Sere su ntaxa i tinkanlenma xaranŋundini nan ti a na Tunka Duumanten tu, an nta an waaxi xaranŋundini. Baawo a su na in tuunu ya, gelli lemine katta xirise.
12 N yanpana i kuteyun ŋa ya, n na mungu do i junuubunun ŋa keeta. »*
13 Bire be a ga daali nan ti : « sarati kurunba », ken ŋa a da fana xasondi ya. Fo xa be ga xaso, ken do sankuyen ya n tinka.