[Maaliki-sidiixi sadaxakiɲandannaaxu]
7
1-2 Ke Maaliki-sidiixi kundu, Alla wuruginten sadaxakiɲandaanan ya ni. Toxo ke wure ya ni « tunka teleŋonte ». Ibirahiima riyinten gilli tunkanyugun gaja, aken Maaliki-sidiixi ya n daga gemu a yi, nan duwa a da. Ibirahiima ga da fo wo fo raga gajannoqu ke yi, a jakkan kini ken ya yi.* Maaliki-sidiixi ke ni Salaamu tunkan xa ya, toxo ke wure ya ni xadi « xeerin tunka ». 3 Faabe ma tuyi a yi, saaxe ma tuyi a yi, buruju ma tuyi a yi, a bangeyen xibaare ma koni, a kalle xa xibaare ma koni. Aken ni abadansadaxakiɲandaanan ya, xo Allanlenmen moxo. 4 Axa da a wari Maaliki-sidiixi ga n dara moxo be ? Ibirahiima yinme be ga ni o seri fanan ŋa, ken da i laxanloxonaaburen jakkan kini a yi ! 5 Ayiwa sadaxakiɲandaano ku be gaa jakkan wuttu, kun ga ni Leewikaarankon ŋa, Tawureeta ya n da i ɲaamari jakkan raganden ŋa Banisirayilagankon maxa, kun ga ni i yinmenu waaxinun ŋa, kun Leewikaaranko xa ni Ibirahiima bonsonŋun xa ya yi mene. 6 Maaliki-sidiixi ken xa feti Leewikaaranke yi de, xa a da jakkan raga Ibirahiima yi. Ken xa da a ɲi laayidun gaa Ibirahiima do Alla naxa, Maaliki-sidiixi duwa ken da. 7 Sikka yinme nta a yi, duwanŋaanan ya n xoora duwankamanen ŋa. 8 Ku Leewikaaranko beenu gaa jakkan ragana, seron ya ni i gaa kalla. Xa a koni kitaabi sennun noxon ŋa nan ti Maaliki-sidiixi ken biranten ya ni. 9 Ken kuŋa, Ibirahiima ga da jakkan bagandi na a kini Maaliki-sidiixi yi, Leewikaaranko ku beenu gaa jakkaragene, a na xo ikun yinmenu xa ga da jakka kini Maaliki-sidiixi yi ya. 10 Baawo Ibirahiima do Maaliki-sidiixi gaa me walla bire be, ken da a ɲi ikun wa Ibirahiima fallinxotten ŋa.11 Leewikaarankon sadaxakiɲanden ɲaamariyen giri Muusa sariyan ya yi katta jaman ŋa, xa, ken gan n ɲi waseene, yaala sadaxakiɲandaana tana riyinme ni nan sukke do Maaliki-sidiixi killen ŋa xadi ba, ken do Haaruna killen ga nta baana ? 12 Baawo waajibin ya ni sadaxakiɲande ke gollen faraaxiyen na sariya ke faraaxu. 13 Baawo sefen gaa Kamane Isa ke be kanma kundu, aken ni fonlaqe tana seren ya, a buruju su ma demu ɲaamarini ti sadaxakiɲande golle yi. 14 Be su wa a tu nan ti a bakka Yehuuda fonlaqen ya yi. Annabi Muusa xa ma demu ken fonlaqe sadaxakiɲande koono abada.
15 Ayiwa Maaliki-sidiixi me sadaxakiɲandaana tana ga ri, fiinun kun tallan xura keeta. 16 Ken sadaxakiɲandannaaxu ma kite ti haadamarenmaaxu kille yi. Ganta a kite ti abadanŋalintaaxun senben ya yi. 17 Baawo a xibaaren koni Safandi Sennun ŋa nan ti :
« Abadansadaxakiɲandaanan ya ni an ŋa Maaliki-sidiixi killen ŋa ».*
18 Ken kuŋa, a kille yogo, o ra wa tini sariya fana ke senbe fonkaaran ŋa, baawo a lanpunten ya ni, nafa ntaxa a yi. 19 Ken sariya ma fo wo fo tinmandi. Iyo, saasa ke, jikki siren wuti o da, o ra gaa tinkoono Alla yi ti jikke ke be. 20 Nan kafi ken ŋa xadi, ke sadaxakiɲandannaaxu kundu ma kini kunaxannen falle. Sadaxakiɲandaana kuttun kun xa sadaxakiɲanden ma kini i ya kunaxanne kanma. 21 Xa Isa ɲa sadaxakiɲandaana yi na a saxu Alla kunaxannen ya kanma, ken ga ni :
« Tunka Duumanten kuna ya, a nta gilli i kunaxanne ke kanma xa :
“ Anken ya ni abadansadaxakiɲandaanan ŋa.¤ ” »*
22 Ken kunaxanne kanma, Isa da sarati siren sanqaaxun wutu¤. 23 N na ti xadi : ku sadaxakiɲandaano jaatun gabo ya, na a sababun ɲa baane ra ga nta duumene kallen maxa. 24 Xa baawo Isa ken gaa abadanbireene ya, aken sadaxakiɲanden nta ɲemeene abada. 25 Ken ya n sigi a ra gaa seri gabe kisini bogo-bogo, ku beenu ga bogu ti a yi katta Alla yi. Baawo aken bireene ya duumaye yaaxe maxa, a gaa xanjondini i da. 26 Sadaxakiɲandaananyinmanke ke be o haajun gaa a yi, aken yinmi-yinme ya ni. A sennen ya ni, a xullen ya ni, mexe nta a yi. A fate bakka sobinton ŋa, nan wurugi diinanta kanxotten ŋa. 27 Aken haajun nta koota su sadaxakiɲande yi xo sadaxakiɲandaananyinmanka kuttu ku moxo, i gaa sadaxindini i yinmenu fina da, a falle i na sadaxindi jaman da. Na a toxo ti aken da du ya sadaxi ta tinmanta baane yi dubaane. 28 Muusa sariyan ken da seron ya taaxundi sadaxakiɲandaananyinmanko yi. Seren ken xa tinmante fe. Xa sariyan falle, Alla da i renmen sugandi ti kunaxannen ŋa, ken renme ken tinmanten ya ni abada.