6
Ken saabu da Alimasiiwu fin joŋaarun digaamu, o wa kun toqo falle yi fina, nan dangi katta xirisinxaranŋen ŋa. O haajun nta a yi na a wutu gelli fiinun jopaadun ŋa do ken batten ŋa : kun ga ni nan fallakoyi sankuntaaxun gollun ŋa, nan teleŋo liimaanagankaaxun ŋa ti Alla yi, 2 ken do wanqimoxonu xaranŋunde, a do kitte saxumoxo yi sere kanma ti allanɲaageye yi, ken do furun wulliyen do kiiti laamante. 3 Ken kuŋa Alla ga na duŋe, o wa xirisinxaranŋunden dabarini saasa.4-6 Baawo ku beenu ga demu nooron kitta, i ga da kanlanken kuyen temu, nan lagari Fanka Sennen kapanlenmaaxunu, na Alla digan daxanmunten temu, ken do duna riyinten fanka, kun ga yille i falle koyini liimaanagankaaxun ŋa ken falle, i ra ntaxa du rasaageye kurunbaaxunu keeta, baawo kun na xo i ga da Allanlenmen duran fillangengene ya xadi, nan soyi a yi beran kanma.
7 Baawo kanmen gaa ɲiiɲe be xumaarini waxati su, ken na funtifo sirun ya funtini i soxaanon da, ken ɲiiɲe na Alla xeerin kita. 8 Xa selli ken ɲiiɲe ga na daagarun do ɲogonsaasun ya funti, a nta fo sirono ; bonnen nta leelene ti a yi yinme, a lagarini buyiini ya.
9 N xana liŋu, hari in gaa sefene ke moxo yi katta axa yi do i fi su, n danqanaaxunten ya ni a yi nan ti axa wa killi siren kanma, ken ga ni kisiyen killen ŋa, 10 na a toxoti Alla teleŋonten ya ni a nta mungunu do axa golli dabarinton ŋa, ken do xanuye be gaa axa maxa katta Alla yi, axa ga da a bangandi ti axa golli xalasinton ŋa isanjaman danŋa, axa do a gaa finna me yi. 11 Ganta oku kun liŋun ni ya tan, axa du baananbe su na duruxoto do kun gollu yi ma fiinun lagarun ŋa, kuudo axa jikken na maxafagi. 12 Ken ŋa, axa nta lanpunu, xa axa ɲaana xo ku beenu gaa Alla laayidun xeyene ti liimaanagankaaxun do muɲun ya yi.
13 Alla ga da laayidun wutu Ibirahiima da bire be, a kuna ti i yinme ya yi, baawo kunafo nta non ŋa, fo be ga n xoora aken yinme yi. 14 A daali :
« Ma in ga da an barekindi, na an jiidi. »*
15 Ibirahiima muɲi, ken moxo ya ni laayidun ga maxafagi a da. 16 Seron kun kunana ti fo ya yi, a ga n dara i yinmenu yi. Ken kunaye na i sabatindi i xannun kanma, i ra ntaxa me sooxini. 17 Ken ya ni, Alla ga da ke be laayidun wutu, a ga da a xanu na a koyi xeyimaxantanlenmon ŋa siri danqanaaxun kanma, na a xotondi na koyi ti a nta gilli, a kuna ya. 18 Ken moxo yi, fiini filli wa du yi : laayidun do kunaye, kun ra nta faraaxini. Ken ya na a koyini o yi ti Alla nta gaarana. Ken na ɲaŋi oku da saakoyi xote yi, oku beenu ga ri xaliife a yi ti jikken ŋa, jikke ke be a ga da a kini o yi. 19 Ken jikke na xo gidindungan ya yi o yonkinun ŋa, a sabatinten xoten ya ni, a wa o geesunu roono ma noqu sennun fo sennen ŋa yirankutaaden falle, 20 noqu ke be Isa ga ro o danŋa yinme du, nan ɲa abadansadaxakiɲandaananyinmanke yi Maaliki-sidiixi killen ŋa.