5
Sadaxakiɲandaananyinmanken su sugandi bakka seron ŋa ya, nan sigi seron da katta Alla yi, kuudo na allankuyun do sadaxon sadaxi junuubunun danŋa. 2 A ra wa samunton do futuxiyenmun faamunu, baawo a yinme ni haadamarenmen ya, lanpunte. 3 Ken lanpuntaaxu saabu da, waajibin ya ni a nan sadaxindi i yinme junuubunun da nan sadaxindi jaman junuubunun da. 4 Sere yinme ra nta ken darontaaxu kinni du yi. Aayi, ken fe ; xirinden ya ni gilli Alla yi, xo Haaruna xirimoxo.5 Ken moxo saanan ya ni ; Alimasiiwu xa yinme ma darontaaxun kini du yi, kuudo i nan ɲa sadaxakiɲandaananyinmanke yi, ken fe ; xa Alla ya n da a sugandi nan ti a da :
« N da an renmaaxu,
n ɲaŋi an da faabe yi lenki. »*
6 Xo a ga yille a koono noqu tana yi xadi nan ti :
« \qt Anken ya ni abadansadaxakiɲandaanan ŋa
Maaliki-sidiixi killen ŋa. »*
7 Isa Alimasiiwu gaa fategankaaxun ŋa ɲiiɲen kanma bire be, a laxaraxaasa, nan saananji, nan ɲaage katta ke be ra gaa a kisini kallen ŋa. A ɲaageyen rage, na a sababun ɲa a du roxonden ŋa Alla da. 8 Allanlenmen ga ni do i fi su, a ga da xaxasoye ke be temu, ken da a tallan tuyindi batiyen ŋa. 9 A fiinun ga tinme ya ni keeta, ku beenu gaa a batta, a ga ɲaŋi i da kisiyi duumanten sababun ŋa, 10 baawo Alla ya n da a gangu na a ɲa sadaxakiɲandaananyinmanke yi Maaliki-sidiixi killen ŋa.
[Maxa an liimaanagankaaxu bogu Alimasiiwun kanma]
11 Sefe gabe wa o maxa na a ko do ke xibaare batten ŋa ; i fatanpansinden xoten ga ni o maxa, na a toxoti axa faamunden leelanten ya ni. 12 Na a ɲi xa, waxatin gaben ɲi axa maxa, axa ra ga ɲi ɲaana xaranmoxonun ŋa, xa saasa axa haajun na xaranŋundaanan ya yi Alla digaamen gondoma fanon ŋa. Axa na xo sugunsugon ya : axa ra nta yigandi xote yigana, axa n xawa yillene katta konbon ya yi xadi. 13 Sere be gaa konbon ŋa, ken ni sugunsugan ya, a ra nta digaamunu ti teleŋontaaxu xibaare yi, baawo leminen ya ni. 14 Yigandi xoten ni seri xooron ya yigefo yi, kun ya n katta taxasindini gollun dagakillun ŋa, nan fatanpansindi fo siren do fo buren naxa, i haqilun xaayeyen saabu da.