4
Tuumaye ke be Alla ga da a laayidun wutu, a wa finna ta yi. Ken kuŋa o n kanu, a n maxa daga o baananbe su firi ! 2 Baawo i ga da xibaari liŋe ke kita moxo be, oku xa da a kita ken moxo ya. Xa ganta ken xibaare ma ikun nafa, baawo i ga da a mugu i ma a raga ti danqanaaxu yi. 3 Oku beenu ga danqanaaxu, o roono tuumaye ke yi ya. Alla daali nan ti :« Ken ya n sigi in butunten ga kuna nan ti :
“ N ga da jamaane be moxo gemundi i da tuumaraxe yi, i ntaxa roono. ” »*
A kun gollu ɲaŋi nan duguta gelli duna jopaadi. 4 Baawo a koni do bita ɲerundin ŋa noqu yogo nan ti :
« Alla tuuma bita ɲerundin ŋa bakka i gollen ŋa. »*
5 A koni a noxon ŋa xadi nan ti : « N ga da jamaane be moxo gemundi i da tuumaraxe yi, i ntaxa roono ». 6 Ken kuŋa, ku beenu ga joŋa xibaari liŋe ke kitta, i kuteyen ya n sigi i ga ma ro. Xa, royen wa finna ta yi yogonu da. 7 Ken ya n sigi a ga da koota tana ko ti Daawuda faarannaaxun ŋa xadi annabi Muusa kiyen falle nan dalla. Ken koota ya ni « lenki », a ga koni :
« Axa ga na in xannen mugu lenki,
xa maxa axa kiilunun xoto. »*
8 Baawo Yuusawu* gan n da i tuumandi, ganpinsa Alla ma ɲi koota tana fin koono ken falle. 9 Ken kuŋa, Sibitinkootan tuumayen wa Alla jaman danŋa harisa, 10 na a sababun ɲa sere be ga na ro a tuumayen ŋa, ken xa tuumana bakka i gollen ŋa ya, xoyi Alla yinme ga tuuma moxo be. 11 O na duruxoto o n ro ken tuumaye yi, kuudo baane su na waase xenne roono kuteyen noxon ŋa, xo sero ku beenu ga kutandi.
12 Baawo Alla digaamen ŋalinten ya ni, a ɲaŋiini ya xa. A xenqunten xa ya ni diinanta jaraxon do raqun filli yi, a wa roono haqilen do yonkin ŋa na i fata, na xotten do senban fata, a wa sondomen sinmayen do ŋanniyen kiitini. 13 Tagefo nta, ke be ga nta sikki a jon me naxa, sikka nta a yi : o fiinun gaa ke be maxa, fo wo fo su farasanten ya ni a jon me naxa, fo wo fo su hayibanten ya ni a jon me naxa. O su sikki a ya jon me naxa, na o moxo ko.
[Isa ni o sadaxakiɲandaananyinmanken ya]
14 Ken bire keeta, sadaxakiɲandaananyinmanka dare ya na o maxa, a ga da kanfaton booxo, Allanlenme Isa xooni. Ken kuŋa o ga da o xannun kini ti saxiiraaxu ke be yi, o n tigiti a yi moxosiri. 15 Baawo ke sadaxakiɲandaananyinmanke be gaa o maxa, sere fe a ra ga nta tooreene do o batten ŋa ti o lanpuntaaxu ke yi. Na a toxo ti aken yinme wurewuti ya nan jaarabi ti fon su yi xoyi oku xa moxo. Xa aken ma yango dabari. 16 Ken kuŋa, o n kande katta neeman tunkantaaxaaden ŋa danqanaaxu yaaxe maxa, kuudo o na Alla hinneyen do a neeman kita, na yideyen kita i waxatin ŋa.