[Isa Alimasiiwu n dara annabi Muusa yi]
3
Ken kuŋa in maaren sennu jama, axakun beenu Kallanken ga da axa gangu, xa da axa haqilun taaxu xayifaare ke ya yi, ke xayifaare be o ga da o xannun kini a yi ti o saxiiraaxun ŋa, Alimasiiwu Isa, sadaxakiɲandaananyinmanke ke. 2 A ɲa duntenŋe yi ti Alla ke be ga da a sugandi, xo annabi Muusa ga ni duntenŋen ŋa Alla kan muuman noxon ŋa moxo be. 3 Isa kuŋa, a kallankaaxun jaatene nan fuŋo Muusa xallen ŋa ya, xo kan tagandaanan ga n daronta kan ŋa moxo be. 4 Baawo ka su gaa du yi, sere ya n da a taga, xa ke be ga da fo wo fo su taga, ken ni Alla ya. 5 Muusa ɲa duntenŋe yi Alla kan su noxon ŋa* xo xidimaana, kuudo faarannaaxu ke be ga giri Alla yi, a na a kiɲandi. 6 Xa Alimasiiwu ken ɲa duntenŋe yi ti renmaaxun sigan ya yi Alla ka ke noxon ŋa. Kaadunko ku ni oku ya, selli o ga na danqanaaxu, nan wasedu ti o gaa ke be jikki o du da.7 Ken ya n sigi kuŋa Fanka Sennen gaa koono nan ti :
\qt « Axa ga na in xannen¤ mugu lenki,
8 \qt xa maxa axa kiilunun xoto
\qt xo axa ga muruti moxo be, waxati ke be axa ga da in geddi gunjuran ŋa.
9 Axa seri fanon da in xenpe non ya yi, na in wure wutu,
na a ɲi tannaxate siine, i yinmenu yaaxen wa in golli dabarinton ŋa.
10 Ken ya n sigi in ga butu ken jama wure, nan ti :
“ Ikun sondomun toqo sankon ya yi,
i ntaxa in killen tuunu. ”
11 Ken ya n sigi in butunten ga kuna nan ti :
“ N ga da jamaane be moxo gemundi i da tuumaraxe yi, i ntaxa roono. ” »*
12 N waaxinu, xa da a faayi axa na du koroosi, sondon bure n maxa ɲa axa du baananbe yi, sondome be ga nta toŋondini, a gaa an falle koyini Alla ŋalinten ŋa. 13 Ganta axa taron gaa ke gangundixanne be yi lenki, xa da me waaju ti a yi koota su, kuudo yangon nan maxa axa du baananbe sankundi, na an sondomen kaawandi. 14 O faayi ga ɲa Alimasiiwu kapanlenmon ŋa, xa ken ni ya de, danqanaaxu ke be ga joŋa o maxa, selli o n da tigiti ken danqanaaxu yi ya ma a xenpa. 15 A koni ti :
« Axa ga na in xannen mugu lenki,
xa maxa axa kiilunun xoto,
xoyi axa ga muruti moxo be. »*
16 N ti de : koonu baane n muruti na i taron toxo digaamen ŋa ? Ku beenu su ga bogu Misira yi Muusa kandan noxon ŋa, kun ya fe ? 17 Alla butu koonu xa wure tannaxate siine ? Ku beenu ga da a kuta, i ga xenu gunjuran ŋa nan kara, kun ya fe ? 18 A kuna katta koonu yi nan ti : N ga da jamaane be moxo gemundi i da tuumaraxe yi, i ntaxa roono, a ga feti ku beenu ga bara a batta ? 19 O da a wari kuŋa nan ti i danqanaaxun fuyintaaxun saabu da i ma katu roono tuumayen ŋa.