[Gongondu katta faaratintaaxun ŋa]
2
Ken ya saabu da ni, o ga n xawa ke xibaari koninte ragana ti sooben ŋa, selli o ga nta a mulla na a sooxi. 2 Baawo maliikannun ga ɲi digaamunu ti annabi Muusa sariya ke be yi, a sabati. Ayiwa fo wo fo ga ni xenperandangaana, a do kutaana, i da i yangon muson kita. 3 Yaala ke kisikilli xoore be gaa o maxa saasa wo, o ga na ken sooxi, oku xa kisiini kan moxo yi keeta ? Kamane Isa yinme fina ya n da ke kisiye xibaaren ko. Ken falle, ku beenu ga da a mugu, i da a toŋondi o danŋa. 4 Alla yinme xa seede kafiini kun ŋa ti i ga da kaawafiinu do taagumansu beenu dabari, a do lasamantafin danben su, ken do Fanka Sennen kuyi taxandinto, na a saxu a yinme ramuuriyen kanma.[Kisiyen kiteye ti Isa fategankaaxun ŋa]
5 Nan kafi ken ŋa, o gaa dunanlagare ke be xibaaren koono, ken kanda nta maliika maxa, 6 xa yogo seede noqu yi nan ti :
« Seren xa ni manne yi, ma an ga sinme do ken ŋa ?
Ma haadamarenme xa ni manne yi, ma an ga xata do ken ŋa ?
7 An da haadamarenmen roxo maliikannun danŋa wucu lamaane. Xa waca, an da a yanba ti nooron do darontaaxun ŋa.
8 An da fo wo fo su wara a tanbekkon wure. »*
Ken kuŋa axa na a tu nan ti : Alla ma fo wo fo toxo, ke be a ga ma a ro haadamarenmen kandan noxon ŋa. Saasa oku kun xa ma a wari fina nan ti fon su wa a kandan noxon ŋa. 9 Xa ganta, ke Isa be ga roxo wucu lamaane yi diinanta maliikannun ŋa, o yaaxen wa a yanbanten ŋa nooron do darontaaxun noxo, na a sababun ɲa kallen xaxasoyen ŋa. Ken ɲa ya, aken Isa ga da kallen xaxasoyen temu be su da ti Alla xanuyen ŋa.
10 Alla ya n da fo wo fo su taga, ayiwa fo wo fo su ni a ya fo yi. A da a xanu kuŋa, i na ren gabe riiti i nooro ke noxon ŋa, ken ya n sigi Isa ke be ga ni kisikillen ŋa haadamarenmun da, Alla ga da a fiinun tinmandi ti ken xaxasoye yi. 11 Baawo senondindaana ke, Isa, a do senonto ku su na lasili baane ya yi, ken ya n sigi, aken Isa ga nta yaaguntaaxunu na i xiri i waaxinu, 12 Isa wa tini :
« Alla wo, n wa in waaxinun xibaarini ti an toxon ŋa,
n na suugu ti an tiiganden ŋa batijamon noxo. »*
13 Kafiini ken ŋa :
« N wa tuugene ti Alla yi. »
Kafiini ken ŋa xadi ! :
« Aken Alla ga da yenmu ku beenu kini in ŋa, n do kun ya ni. »*
14 Kun yenmu da me xawansanlenmaaxu ti fategankaaxun do forigankaaxun ya yi. Aken xa na i ya ken moxo baane ya yi, kuudo kallen senben gaa ke be maxa, ken ga ni Ibiliisa, i na a senben bonondi ti kallen ŋa. 15 Ku xa beenu bireyen muuman su yi kallen kannen komaaxun ga ɲi i ya, i na kun xa maxawasa bakka ken ŋa.
16 Baawo o wa a tu nan ti a ma ri maliikannun deema, xa ganta a ri Ibirahiima bonsonŋun ya deema. 17 Ken saabu da, waajibin ya ni, a na i waaxinu ku xawansanlenmaaxu moxon danben su yi, kuudo a na ɲa sadaxakiɲandaananyinmanke yi ti Alla, hinnaana do duntenŋe, a na jaman junuubun xafari. 18 Ku beenu ga jaarabi, a ra wa i yidana, na a toxo ti aken yinme jaarabi ti tooran gaben ŋa.