4
1-2 Ken kuŋa,
Alla wa in seeda,
a do Isa Alimasiiwu ke be gaa riini furun do biranton kiiti,
nan ti in da an ɲaamari ti an na Alla digaamen gangu waxatin su,
baawo Alimasiiwu riyen do a tunkaaxun bange biren kiɲe.
A bire ni wo,
a bire fe wo,
an du su kini a gangunden ŋa.
Bexundi,
gongondi,
duruxotoye kini seron ŋa ti xaranŋunden do muɲiyen su yi.
3 Tonŋu,
waxati wa riini,
seron ga ntaxa a mulla na xaranŋundi sahanton mugu.
I sukkene do i liŋun ya yi.
I na xaranmoxon gaben xiri,
ku be gaa i taron liŋun koono.
4 I wa i tarun konkono bakka tonŋun ŋa,
na xiisa xafunun terinka.
5 Xa anke,
katu du da moxon su yi.
Tooran muɲi,
an na Xibaari Liŋen gangu.
An na an allankomaaxun gollen tinmandi.
[Pawulu sareye]
6 Nke ke,
waxatin kiɲe in gaa ɲaana sadaxa.
N wa kalla,
a nta hari dallana.
7 N gaja Alla da,
n da in gollen kiɲa i xenpan ŋa,
n tigiti in danqanaaxun ŋa.
8 Saasa ke,
teleŋontaaxun tooren ya na in dukku.
Kamane ke be ga ni kiitaana teleŋonten ŋa,
a ya na a kinni in ŋa kiiten koota.
A nta a kinni inke baane yi de,
a riyen xanuyen gaa sere su yi,
a wa a kinni ken xa yi.
9 Duruxoto an na in ɲi jawoye,
10 baawo Damasa ken wuru in ŋa,
dunadunkanfiinun ya n liŋi a da buru.
A daga Tesaloniixe deben ŋa.
Kerekeesi,
ken daga Galaca maran ŋa.
Tiito xa daga Dalimaca maran ŋa.
11 Luka baane ya n toxo do in ŋa.
An do Maarika nan ri doome.
A ga na ri,
a wa fo sirono in ŋa siri Alla gollen da.
12 N da Tixiiki xayi Yefeesi deben ŋa.
13 An ga na ɲi riini,
n ga da in yiraame be toxo Karipooso noqu Tooro deben ŋa,
an do a na ri.
An do kitaabu ku xa na ri,
sakkati fatankitaabu ku.
14 Lekandooro* tage da moxo buru gabe ya ɲaŋi in ŋa,
xa Kamanen wa a tugana ti i gollen ŋa.
15 An du koroosi a yi,
baawo a baranten ya ni o xaranŋunde ke yi moxo buru.
16 Ta fana be in ga xiri kiiten ŋa,
sere su ma in deema,
a su wuru in ŋa.
Alla nta i raga ti a yi.
17 Xa Kamanen ɲi do in batten ŋa,
a da senben kini in ŋa,
n katu Xibaari Liŋen sanqini a su yi.
Fo wo fo ga feti Yehuudiya,
i da a mugu.
Alla da in kisi jarinten raqen ŋa*.
18 Kamanen wa in kisini fo buren su yi na in tanga na in rondi i tunkaaxu wuruginten noxon ŋa.
Nooron wa a da ma abada.
Anmiina !
[Kuuɲindi lagaru]
19 An na Pirisika do Hakkili kuuɲi,
a do Wonsifoore kaadunko.
20 Harasiite ken toxo Korinti debe yi.
Torofiimu ma saha,
n da a xa toxo Mileeti debe yi.
21 An duruxoto an nan ri saado mulle.
Hebuulu do Pudeesi wa an kuuɲini,
kafiini Linoosi do,
Kolooja yi,
ken do isanwaaxin yugon do a yaxare,
a su wa an kuuɲini.
22 Kamanen gan na ɲa do an batten ŋa,
na axa su neema.