[Kamanyugon daronde]
6
Kome su gaa komonkacen ŋa,
a n xawa a tuunu nan ti :
i kamanyugon do daroyen su ya nan xawa.
Ken moxo,
seron nta Alla toxon bonondini,
i nta o xaranŋunde ke xa beqe.
2 Komo beenu kamanyugun ga toŋondi,
i do i ɲa waaxinu.
Xa ken nan maxa sigi i gaa neqaati wuttu katta i ya.
I du nan xawa tallan xaayene i danŋa ya,
baawo i gaa gollini ku be da,
i waaxinun ya ni,
i xananun ya ni.
[Nata bure]
An nan xawa seron xaranŋundini ke ya yi na duruxotoye kini i ya ti a yi.
3 Sero wa du yi,
kun na seron xaranŋundini sankuntaaxun ya yi.
I xaranŋunden do o Kaman Isa Alimasiiwu digan sahanton nta me wuttu.
Xaranŋunde be gaa teŋene muuminaaxun xa yi,
a do ken xa nta me wuttu.
4 Kun ni sero ya yi,
dundarun ya ni,
i nta fo wo fo faamunu.
Haqilanloxon ya ni,
i gajanŋa do sefe nafanloxon ya yi.
Ken riini ti suuxen do manqanŋen ya yi,
a do kayindun do sikka buru.
5 Sero ya ni,
i kutandini ya abada,
i haqilun bono,
i ntaxa tonŋun walla.
I sinmaye,
muuminaaxu,
bannaaxun feeran ya ni.
6 Tonŋu,
muuminaaxu,
bannaaxun feera xoore ya ni.
Xa a saratin ni ya :
an nan wasedu ti ke be gaa an maxa,
7 baawo o do fo wo fo ma ri ke duna yi,
o do fo wo fo xa nta telle.
8 Ken kuŋa,
o biraadon do o feetufataadon gaa o maxa,
ken nan xawa o bakka.
9 Xa ku be gaa a mulla nan ɲa bannanu yi,
i ya n xenne jaaraben do nata buren do hanmi xafun danben su noxon ŋa,
kun ya na seron yoolandini bonen do halakiyen noxon ŋa.
10 Tonŋu,
naaburen xanuyen ya ni fi buren danben su ɲiimen ŋa.
A liŋoyi moxo buren da yogonu sankundi,
i laato bakka danqanaaxun ŋa pewu,
na du tooro toora su xenpa.
[Timoote gotondinde]
11 Xa anken Timoote,
Alla sere,
wuru ku fiinu yi.
Teleŋontaaxun do muuminaaxun muuru,
ken do danqanaaxun do xanuyen do muɲiye,
a do nooxaaxu.
12 Gaja Alla diinan da,
bireyi duumanten wutu,
baawo Alla da an xiri katta ken bireye ya yi.
An da seedemoxo sire dabari ti ken golle ya yi seedaana gabe jon ŋa.
13 Alla ke be gaa fo wo fo birandini,
a do Isa Alimasiiwu,
a be ga seede Ponti Pilaati jon ŋa* na tonŋun ko a da,
i wa in seeda,
n da an ɲaamari :
14 tigiti ku ɲaamarindixannu yi.
Ɲa seri tinmante yi,
yella n maxa kite an ŋa saado o Kaman Isa Alimasiiwu gaa bangene koota be.
15 Alla yinme ya na Alimasiiwu bangandini i waxati rakutunten ŋa.
Tiigetunken ya ni,
Tunka baanen ya ni.
Tunkanun Tunkan ya ni,
Kamanun Kamanen ya ni.
16 A baane ya nta kalla.
A wa nooron noxon ŋa,
sere su ra nta tinkono a yi.
Sere su ma a wari,
sere ra nta a walla xa.
Darontaaxu do senben wa a da ma abada !
Anmiina.
[Bannanun gongonde]
17 Ke duna bannanun gongo ti i nan maxa dundaraaxu.
I nan maxa i jikken saxu bannaaxu sabatinbali kanma,
xa i na i jikke saxu Alla ya kanma,
ke be gaa fo wo fo su gaben kinni o yi na o daxanmundi ti a yi.
18 A ko i da ti i na siroyen dabari,
i nan bannaaxu ti golli siri ɲanŋen ŋa.
I nan ɲa fonnansiru yi,
ke be gaa i maxa,
i do seron na a taxandi.
19 Ken moxo,
i na naaburu kafumanten gaben kita du kaane,
naabure be ga nta bonno,
i na bireyi haxiixan kita.
[Kuuɲinde]
20 Timoote,
Alla ga da ke be xaliifa an ŋa,
tigiti a yi.
Maxa duŋe battaransefon do me kutande yi gaarantan tuwaaxunun kanma.
21 Yogonu da ken tuwaaxu ya batu ma i gaa lagarini laatono bakka danqanaaxun ŋa.
Alla neeman gan na ɲa do axa batten ŋa.