[Toŋondinton gollun tuyinde]
5
Ayiwa,
maxa diganxan xote ko xirise da.
Xa,
an nan horomantansefe a da xoyi an faaba ya ga ni.
Yugu be ga ni fonnanxayun ŋa,
an na ɲa katta i ya xoyi an waaxinu,
2 yaxarin xaso xoyi an maanu.
Yaxaru be ga ni fonnanxayun ŋa,
an na ɲa katta i ya xoyi an gidanyaxaru ti nuxudunxullaaxu su xenpa yi.
3 Kiinakariidonun deema,
sakkati sere ga nta ku be yi.
4 Xa,
selli renmu ma kisimaru gaa kiinakariido be maxa,
kun renmu,
ma kun kisimaru fina ya n xawa du seerandini muuminaaxun ŋa ti fo siri ɲanŋen ŋa i kaadunkon da.
I saaraanon ga da ke be ɲaŋi i da,
i na ken tanbon tuga.
Ke ya n liŋi Alla da.
5 Kiinakariido be baani baane ga ni,
sere nta a maxa ke be gaa a deemana,
ken da i jikken ro Alla ya kanma,
a tiifi do batiyen do allanɲaageyen ŋa wuron do kiye.
6 Xa kiinakariido be hanmin ga ni dunarankaaxun ya yi,
ken furen ya ni,
na a toxo bireene.
7 An nan xawa i ɲaamarini ku ya yi,
kuudo yella n maxa i kita.
8 Sere su ga ma i kiilen toxo i maarenmun ŋa,
sakkati a yinme kore,
a da danqanaaxun killen wara.
Ken kaman nan bononta danqanaaxuntanbalin ŋa.
9 Yaxare be toxon ga na ɲi kapa kiinakariidonun ŋa,
a na a ɲi a wuyun ga da tandume siine baga,
a wasedunten ga ɲi ti i kiina baane yi.
10 A nan ɲa yaxare yi,
a tuyinten gaa ti golli sirun ŋa,
kun gaa xo :
a renmun maremoxo sire,
a mukku darondimoxo,
a du ɲanŋe kome yi Alla seri sennun da¤,
ɲaaninton deemande,
ken do a ga da i du kini gollisiriɲanŋen danben su yi.
11 Xa kiinakariidonu be ga ni fonnanxayun ŋa,
maxa i toxonun safa,
baawo dunarenmaaxun ra wa sikki i gaa Alimasiiwu killen walla nan nate do yaxun ɲa.
12 Ken bire,
i kiitini ya,
baawo i da i laayidu fanan guruja i do Alla naxan ŋa.
13 Golle xa ntaxa i ya,
i saagene terene kaanun do me naxan ya yi.
Ken xa baane fe de,
i wa ɲaana lanpunto yi,
nan ɲa laxanto yi,
ken be ga n bura fo wo fo yi.
Hari fi be ga feti i fi yi,
i wa a koono.
14 Ken kuŋa,
n na a mulla kiinakariido fonnanxayun nan yaxi ya.
I na renmu kita,
i na xate do i kaanun ŋa.
Ken ŋa,
i nta ɲaana sababu yi,
xonne ra gaa o kaana.
15 N da ke ko na a sababun ɲa kiinakariidonu yogonu ga da killen wara nan sukke do Ibiliisa batten ŋa ya.
16 Kiinakariidonun gaa yaxarin toŋondinto be maxa i kaanun ŋa,
i nan xawa i deemana ya.
Ken moxo,
ikun likken na bogu isanjaman ŋa,
kuudo kiinakariidonu be baane ga ni,
jaman na katu i xa deemana.
[Xirisun xibaare]
17 Xirisun ga na jaman goyime goyimandimoxo sire,
i n xawa daroyen dunfillo kitta,
sakkati ku be gaa waajunden do xaranŋunden tanpiyen ŋa.
18 Safandi Sennun da a ko yinme nan ti :
« Na be gaa yillikatini,
maxa a kaba yillen yigana.*
» I ti xadi :
« Golliɲaŋaanan nan xawa i tugaaden kitana ya.* »
19 Maxa duŋe xirise jalagini ma an gan da seedaano filli ma sikko kita*.
20 Xirise be gaa junuubungolliɲaŋini,
a bexu jaman ŋa,
ken moxo,
kuttun na kanu a me ɲaana.
21 Alla do Isa Alimasiiwu do Alla Maliikan sugandinton wa in seeda,
n da an ɲaamari :
Ku fiinu dabari,
maxa yaaxe faayi,
maxa sere bogu sere yi.
22 Maxa jawo an kitten saqa sere yinmen ŋa na a sugandi,
an gaa fo kitta a junuubun ŋa.
An sennen nan toxo.
23 Maxa jin baane mini,
an na reesendolo lamaane xa mini an nuxudunwatten saabu da,
a do wattu ku be gaa an ragana waxati su yi.