[Xaranmoxo gaaranto]
4
Alla Fanka Sennen da a ko na a xurandi kuŋa nan ti :
kiyi lagarun ŋa,
yogonu wa gilli danqanaaxun kanma nan sukke do gaarantan xaranŋundu be gaa gilli jinnan tuwaaxunun ŋa.
2 I wa du toqo munaafaxinun do gaaranton maxa nan sanku.
Sero ya ni,
i sondomun ga fina xo mexe teyen ga da fo be biyaadi.
3 I wa seron kabana yaxun ŋa,
na i kaba yigefoonu yogonu xa yiganden ŋa.
Na a ɲi xa de,
Alla yinme ya n da kun fiinu taga kuudo ku be ga danqanaaxu,
i gaa tonŋun tu,
i n duŋe i ya na Alla tiiga.
4 Alla ga da fo wo fo taga,
a siren ya ni.
O ma xawa balla i fo wo fo yi.
O n duŋe i ya na Alla tiiga.
5 Baawo fo wo fo senono ti Alla digankoninten do allanɲaageyen ya yi.
[Golliɲaŋaana sire]
6 Timoote,
an ga na waaxinun xaranŋundi ku fiinu yi su,
an wa ɲaana Isa Alimasiiwu xidimaana sire yi.
An wa a koyini nan ti an sondomen biranten ya ni ti danqanaaxun digaamun do xaran sahaabante be an ga da i killen tera ti xalasiye yi.
7 Xa,
xiisa xafunu ku be do danqanaaxun ga nta me wuttu,
i sedi.
Du xaaya Alla da,
an na ɲa muumini yi.
8 Fatedunxaayeyen ni fo sire ya yi,
xa a nafan nan roxa.
Xa,
nan xaaye kuudo nan ɲa muumini yi,
ken wa fo wo fo kaane,
baawo bireyi duumanten laayidu wuti ti ken ya yi ke duna do laahara su yi.
9 Ke ya ni saxiiron digaamen ŋa,
be su ga n xawa duŋene ti a yi.
10 Baawo o gaa tanpiye do fanqe su yi,
ken ni o ga da o jikken ro Alla ŋalinte ke be ya yi.
A ya ni haadamarenme su kisindaanan ŋa,
sakkati ku be kun saxunton gaa a yi.
11 Ku sefo ɲa ɲaamarindixannu yi,
an na i xaranŋundi seron ŋa.
12 Maxa duŋe sere su ga an roxono ti baawo leminen ya ni an ŋa.
Xa,
an nan ɲa misaale yi toŋondinton da ti an sefo,
ti an bogu killu,
ti an xanuye,
ti an danqanaaxun do an senoye.
13 Yere do in gaa riini,
an na an gollen ɲa na Safandi Sennun xara jaman ŋa,
na duruxotoye kini seron ŋa,
nan xaranŋundindi.
14 Fanka Sennen ga da kuye ke be kini an ŋa,
maxa a battaranraga.
A kini an ŋa ti annabinyinmun sefexannen ya yi,
a do xirisun ga da i kittun saxu an yinmen ŋa.
15 Ke su dabari,
an na du su kini an gollen ŋa.
Ken ŋa,
seren su wa an kaanandagayen walla.
16 An kiilen toxo an du yi,
an nan an kiilun toxo an xaranŋundimoxon ŋa.
An nan duruxoto do i ya.
An ga na golli ke moxo,
an na du kisi,
ku be gaa an terinkana,
an na kun xa kisi.