[Isanjaman koroosindaano]
3
Saxiiron digaamun faayi :
sere be gaa a mulla nan ɲa batijaman koroosindaana yi,
a da siga sire xanu.
2 Ken kuŋa,
a kaman nan xawa ɲaana sere ya yi,
yella su ga nta a yi.
A wasedunten ga ti i yaqen baane yi.
A nan ɲa sere yi a ra gaa i du da.
A nan ɲa haqilante yi,
nan ɲa seri segumante yi.
A nan ɲa mukkunjaatigi sire yi,
a ra gaa seron xaranŋundini.
3 A nan maxa ɲa minnaana yi,
a nan maxa ɲa gajalla yi,
xa a nan ɲa sabarinte do nooxe ya yi.
A nan maxa ɲa xaalisinxannaana yi.
4 A nan ɲa sere yi,
a ra gaa i koren marana,
a renmun dumaxayanqanton ga ni,
i gaa darondindini.
5 Tonŋu,
sere be ga ma katu i yinme koren marana,
ken katta Alla jaman marana kan moxo ?
6 A nan maxa ɲa sere yi,
a finnatuubinten ya ga ni,
baawo dundaraaxun ra wa a kitta.
Ken ŋa,
a ra wa yanganxatene xo Ibiliisa ga yanganxate moxo be.
7 A nan ɲa sere yi,
a toxo siren gaa hari diinan tananu seron maxa.
Ken moxo,
a nta jalagini nan xenu Ibiliisa jalan noxon ŋa.
[Isanjaman xidimaano]
8 Ken moxo baane ya ni,
isanjaman xidimaanon xa nan xawa ɲaana sero ya yi,
i do daroyen gan xawa,
neenenfillo ga nta i ya.
I ma xawa ɲaana minnaanan xooro yi,
i ma xawa ɲaana naaburunxannaana buru yi.
9 I tokkinton nan toxo do danqanaaxun ga da tonŋu be koyi i ya ti sondon laabante yi.
10 Saado o gaa i ɲaana xidimaano,
o n xawa segesekke na i faayi.
O ga ma yella kita i ya,
i na ɲa isanjaman xidimaano yi.
11 Ken moxo baane ya ni,
yaxarun xa nan xawa ɲaana yaxaru ya yi,
i do daroyen gan xawa.
I nan maxa ɲa botoburundaano yi,
i nan katu i du da,
i nan ɲa duntenŋu yi fin su yi.
12 Isanjaman xidimaanan nan ɲa a wasedunten ga ti i yaqen baane ya yi.
A nan ɲa sere yi,
ke be ra gaa i renmun do i koren su marana siri.
13 Isanjaman xidimaano be gaa i gollen dabarini moxosiri,
i wa daroyen kitana,
na saxiiraaxun fo gaben kita ti i danqanaaxun ŋa ti Isa Alimasiiwu yi.
[Danqanaaxun gundon bangeye]
14 N da ke bataaxe xayi an ŋa de,
xa a wa in kiilun ŋa nan ri bogu an ŋa jawoye.
15 Selli in ga na leele riini,
an na katu a tuunu ti ku sefo yi an gan xawa ɲaana Alla koren noxon ŋa moxo be,
ken ga ni Alla ŋalinten jaman ŋa.
A ya ni tonŋun gondoman do a ballaaden ŋa.
16 Tonŋu,
muuminaaxun gundon xooren ya ni,
o su duŋe ti ken ŋa :
A bange fataganke yi,*
Alla Fanka Sennen da a sabatindi nan ti a teleŋonten ya ni.
Maliikanun da a wari,
A xibaaren gangi do xabiilan su yi.
Sere gabe saxu a yi,
Alla da a segendi nooron noxon ŋa kanmun ŋa*.