[Allanɲaageyen xibaare]
2
Ken kuŋa,
fon fo fana,
n wa a muurunu batijaman su maxa,
o na Alla ɲaaga,
na a batu,
na a xanjo,
na a tiiga seren su da.
2 Xa da Alla ɲaaga tunkanyugun da,
ikun do fankan gaa fo wo fo kitten ŋa,
kuudo o na katu bireene horoman do laxafiyan noxon ŋa,
a do muuminaaxun do daroye.
3 Ke ya siren ni,
a n liŋi Alla da,
o kisindaana.
4 Seren su na tonŋun tu nan kisi,
Alla lafinten na ken ya yi.
5 Baawo Alla baane ya ni,
Xanjondaana baane xa ya ni Alla do seron naxa,
Ken ga ni Isa Alimasiiwu,
ke be ga ɲa haadamarenme yi.
6 A ya n da i du sadaxi kuudo a su na kisi.
Ku sefo ya ni seedeyen ŋa nan gemu waxati rakutunten ŋa.
7 Ken ya n sigi,
Alla ga da in sugandi na in ɲa gangundaana do faare yi,
na liimaanagankaaxun do tonŋun xaranŋundi xabiilan tananun ŋa.
Ayiwa in nta gaare koono,
ke be ga ni tonŋun ŋa,
n na ken ya koono.
8 Ken kuŋa,
n wa a mulla yugon su nan bati i gaa noqu su yi.
I na i kittun sennun wutu katta kanmun ŋa nan laato bakka butte do fitina su yi.
9 Ken moxo baane,
n wa a mulla yaxarun xa nan ɲa haqilanto yi.
I rondindi yiraamun nan ɲa yiran suturinto,
na a ɲi i ma xenperandangi.
I nan maxa i yinmun kaawafintan tulu ti kanŋen do xaɲen ŋa.
I nan maxa yiran jonko xote rondi.
10 Ganta,
i maxanyetten nan ɲa fisiriɲanŋen ya yi,
i na ɲa yaxaru yi,
ken gaa a koyini nan ti muumininun ya ni katta Alla yi.
11 Yaxaren nan ɲa kuuraana yi xaranŋen noxo,
a du maxayanqante.
12 Yaxaren nan xaranŋundindi,
ma a nan mare yugon kanma,
n nta ken denne a da.
Yaxaren nan xawa ɲaana kuuraana ya yi.
13 Baawo Haadama fina ya n tage,
ken falle Hawa xa tage*.
14 Ibiliisa ma Haadama sankundi,
a da Hawa ya sankundi bogo-bogo ma ken gaa riini ti Allankutayen ŋa*.
15 Selli yaxaren ga na duruxoto do danqanaaxun do xanuyen ŋa,
nan seno,
nan ɲa haqilante,
a wa kisiyen kitana ti i saareyun ŋa.