4
Komonkamanu, xa da axa komon tigiti ti teleŋontaaxun do sondonsirigumaaxun ŋa, axa na a tu xa nan ti kamane wa axakun xa yi kanmun ŋa.[Allanɲaageye Pawulu da]
2 Xa duume allanɲaageyen ŋa, xa na axa kiilun toxo ken ŋa, nan allantiigandi. 3 Xa da Alla ɲaaga doome yi o xa da, kuudo a na fonlaqen wuɲi o da, gundo be gaa do Alimasiiwun xibaaren ŋa, o ga rage kason ŋa do ken gundo ya batten ŋa xa, o na katu a laxamini. 4 Xa da Alla ɲaaga in da kuŋa, kuudo in na a laxami xoyi in ga n xawa a laxamini moxo be. 5 Xa ɲa haqilanto yi ti axa do seron kuttun biredoomen dagamoxon ŋa, waxatin nan maxa axa firi. 6 Xa nan ɲa digan horomanta konŋaano yi, sapen gaa digaame be yi, kuudo axa n katu be su jaabini ti moxo be ga n xawa.
[Kuuɲindi Lagaru]
7 Fo be ga ni in xibaarun ŋa, Tixiiki wa riini axa tuyindi ti a su yi, n waaxinxanan ya ni, xidimaana duntenŋen ya ni, n xidimanlenman ya ni, biredoomenkomon ya ni o yi Kamanen gollen noxo. 8 N da a girindi a xanne maxa ya, kuudo a na axa tuyindi o xibaarun ŋa, a do na axa buttun xotondi. 9 A do Wonsiimu wa doome, o xana liŋe, a do o maaren duntenŋe, axa yogo ya ni. Fo wo fo ga ɲa yere, a wa axa tuyindini ti a su yi. 10 Lisitarooxo, n kasogankanlenman ya ni, a wa axa kuuɲini. Maarika xa wa axa kuuɲini, Barinaabu kallungoora ke, selli a ga na ri axa wari, xa na a bisimilla moxosiri xoyi in ga da a koni axa da moxo be. 11 Yuusawu xa, i gaa a xilli Yuusiti, a kuuɲinden wa katta axa yi, i baane ya ni Yehuudiyanun ŋa, i ga ɲaŋi in golliɲanlenmo yi Allantunkaaxun da, na in butten xotondi. 12 Hepafara wa axa kuuɲini, ken ga ni axa yogo yi, Isa Alimasiiwu xidimaana ya ni ke, a gaa fanqene axa da moxosiri ti allanɲaageyen ŋa. A ɲaagene axa danŋa ya waxati su, kuudo axa danqanaaxun na xooro, nan tinme, nan sabati isandiina ke noxo, nan gemu Alla liŋun ŋa. 13 N wa seedene a da nan ti : a da i du kini tanpiyen ŋa axa do Lodikkenkon da, kafini Herepoolinkon ŋa. 14 O xana liŋe Luka, tabiibi duntenŋe ke, a wa axa kuuɲini, ken do Damasa. 15 Xa na o isanjaman kuuɲi Lodikke noxon ŋa. Xa na Nunpa kuuɲi, kafiini isanjama be gaa a kan ŋa. 16 Ayiwa axa ga na bataaxe ke xara axa noqu, xa na duruxoto xa na a xara Lodikke isanjaman ŋa. Ke bataaxe be xa gaa gilli ti Lodikke yi, axa xa na ken xara. 17 Xa na ti Harisipa da : « An gaa xidimeye be yi ti Kamanen kapanlenmaaxun ŋa, an kiilun toxo a yi, na a tinmandi moxosiri. »
18 Ku kuuɲindu kundu ni inke Pawulu yinme safandikitten ya yi katta axa yi. Xa ɲa sinmaano yi do in batten ŋa, n gaa kason ŋa. Alla neeman gan na ɲa do axa batten ŋa.