[Biremoxo kurunba]
3
Ayiwa baawo axa ga wulli kallen ŋa do Alimasiiwu batten ŋa ya, ken kuŋa, Alimasiiwu taaxunten gaa Alla kitti tayen banŋe noqu be, xa da non fiinun muuru. 2 Xa hanmi do kanmun fiinun ya yi, xa ɲiiɲen fiinun fe, 3 baawo axa kara ya, ayiwa axa bireyen maranten wa Alimasiiwu maxa Alla noqu. 4 Bire be Alimasiiwu ga na bange, axa yonki, axa xa bangeene do a batten ŋa nooron ya noxo. 5 Ken kuŋa, ɲiiɲen fiinu be gaa axa yi, xa da i kari bakka axa du yi, kun ga ni xo : jeenaananburaaxu, sobintaaxu, nata, yonkiliŋu, yaaxarangillaaxu, ken ga ni munubatten ŋa. 6 Ku ya saabuda ni, Alla butten yanganxatan gaa yanqana baranton kanma. 7 Ku fiinu kundu ya n da axa kanda nan xaso, bire be axa ga ɲi bireene i noxon ŋa. 8 Xa saasa, fo be ga ni xo butten do mamaye, buroye, maxansefende, a do diganburunde, axakun kun na axa raqun bagu ken su yi. 9 Xa maxa gaara me da, baawo axa boore bakka axa biremoxo xase ke yi ya. 10 Axakun kuŋa, axa ɲa seri kurunbon ya yi, axa kurunbaaxu, kuudo na axa tagandaanan moxonun wutu, ti a tuyiyen fo tinmanten ŋa. 11 Yehuudiyaaxu do Yehuudiyaaxun tana, ken ntaxa du yi keeta, sunnantaaxu do sunnantanbalaaxu ntaxa du yi, mukkaaxu, yinmanbinnaaxu, komaaxu, hooraaxu, fo wo fo su ntaxa non ŋa keeta a ga feti Alimasiiwu baane, aken be ga ni a su yi, a gaa a su yi.12 Na a toxo ti Alla ga da axa sugandi i du danŋa ya, na axa senondi, na axa xanu, ken kuŋa, xa da hinneyen doroken rondi, a do siroye, dumaxayanqaye, a do sabariyen do nooxaaxu. 13 Xa muɲi me da. Selli i be nda fo ɲaŋi i kapanlenman ŋa, xa n yanpa me maxa. Kamanen ga yanpa axa maxa moxo ke be de, axa xa n yanpa me maxa ken moxo yi. 14 Axa gaa fo be saqa ke su kanma, ken ni xanuyen doroken ya, ken ya ni kapen fo tinmanten ŋa. 15 Yelli Alimasiiwu xeerin gan na axa sondomun kanda. Axa xiri ti ken xeeri ya yi, kuudo axa n ɲa xo seri baanen ŋa. Xa ɲa kuufandaano yi. 16 Yelli Alimasiiwu digaamen gan na guuji axa noxon ŋa ; xa da me toŋo, xa na me gongo ti fontuwaaxun su yi, axa na Jabuurinsuugun do xesiidanun suugu, a do diinansuugu. Allantiigeyen noxon ŋa, xa suugu Alla da ti axa sondomun su yi. 17 Axa ra gaa fo wo fo koono, ma axa ra gaa fo wo fo ɲaana, xa da a su ɲa ti Kamane Isa toxon ya yi, na Baaba Alla tiiga ti a yi.
[Biredoome koren noxo]
18 Yaxiyaqu, xa da du maxayanqa axa kiinanu da, xoyi moxo be gaa gemme Kamanen ŋa. 19 Kiinanu, xa da axa yaqun xanu, xa maxa butu i wure. 20 Saarerenmu, xa da axa saaraanon batu, batiye su xenpa, ken ya ni fon ŋa, a ga n liŋi Kamanen da. 21 Axakun faabenu xa be ga ni, xa maxa axa renmun butundi, i n maxa daga jikkiranxose. 22 Komo, xa da axa dunadunkamannu batu, batiye su xenpa, yaaxe muso baane fe de, xo na an du liŋondi seron da, ken fe. Xa, a nan ɲa buttuxulle kanma ya, ti allankannen ŋa. 23 Axa gaa fo wo fo ɲaana, a nan giri sondomen ya yi, xoyi Kamanen ya fi ga ni, xa a n maxa a ɲa xo sere ya fi ga ni. 24 Baawo axa wa a tu nan ti Kamanen wa axa tugana, a ga da xeye be sawu, axa wa a kitta muso yi. Axa gaa gollini Kamane ke be da, Alimasiiwu ya ni. 25 Sere su ga na allankute, an wa an allankuyen muson kitta, baawo Alla ken nta seron fasono me yi.