Koloosinko 2

Ken kuŋa in gaa gajan xote ke be yi axakun Koloosinko do Lodikkenko da, a do seri gabe tana be i ga ma demu in walla ti i yaaxen ŋa, n na a mulla axa na ken ya tu. 2 Ken ni ya, kuudo i sondomun na saako, i na kafi me yi xanuyen noxon ŋa, na faamuyen fo tinmanten kita Alla gundon tuyiyen ŋa, ken ga ni ŋa. 3 Tuwaaxun do fontuwaaxun danben su na gundon ŋa a ya maxa. 4 N na ke koono ya, kuudo sere su nan maxa axa janba ti diganliŋe yi. 5 Hari in do axa yaaxe ga nta me yi, n haqilen nta bakka axa yi abada. N yaaxen gaa axa gemunton ŋa moxo be, a do danqanaaxu soobe be gaa axa maxa Alimasiiwu kanma, ken wa in sewondini moxosiri.

[Gongonde laada xafunun kanma]

6 Ayiwa axa ga duŋe Kamane Isa Alimasiiwu yi, xa bire do a yi dubaane. 7 Xa da axa ɲiimun tonto a yi, na axa bireyen jongi a yi. Xa nan tallan mali axa danqanaaxun ŋa ti soobe yi, xoyi i ga da axa xaranŋundi moxo be, axa na kuufanden gabondi. 8 Xa da du koroosi kuŋa, sere n maxa axa neene, na axa haqilun fayi ti digan duuron ŋa, nan tuuge seron laadanun do seetaanun ya kanma, i nta tuugene Alimasiiwu kanma. 9 Allaaxun xa tinmanten na aken Alimasiiwu fategankaaxun ya yi. 10 Axa da fo wo fo tinmanten kita ti a ya yi, a ya ni mareyen do kandan danben su yinmanken ŋa. 11 Axa da sunnanden kita ti a kapanlenmaaxun ya yi, sunnande ke be sere kitte ga ma a dabari ; ken sunnande kite ti Alimasiiwu ya yi, ayiwa ken ya na o bakka o junuubuntaaxun kittun ŋa. 12 Axa ga bire be, a na xo axa do Alimasiiwu ga buli doome ya, axa do a wulli doome ya xa, baawo Alla senbe be ga da a furen wullu, axa danqanaaxu ti ken ya yi. 13 Axakun beenu ga kara axa junuubunun saabu da, a do axa sunneyinbalaaxu, Alla da bireyen kini axa yi do a batten ŋa, a yanpa axa maxa axa junuubunun su yi. 14 Sariyan kutanden ga da junuubunu be kiɲa o yi, kun junuubunu safanton gaa kitaabe be noxon ŋa, a da ken kitaabe genge do ŋa, na a buruxa. 15 A da senben raga seetanmareyun do seetanfankanun ŋa, a da i wara beran ŋa, a da niyen kita i su kanma ti ike yinme kallen ya yi sallibinsollen kanma.

16 Ken falle keeta, sere su n maxa axa jalagi do yigefonxibaare do minifonxibaare yi xadi, walla sallinkoota xibaare, ma xasu kurunba, ken do xibaare. 17 Ke be gaa riini, ku su ni a sawuran ya, xa xibaare ke tonŋun ken yinme ke, Alimasiiwu ya ni. 18 Xa maxa duŋe sere su gaa axa jalagini ti i wa axa roono i killen ŋa, nan ti ike dumaxayanqanten ya ni, walla xa ike na maliikannun ya batta. I da du wara sinmeyun ya maxa, dundaraaxu xafun ya na i ya, i sinmeyun giri i yinmenu ya yi. 19 Ikun do Alimasiiwu nta doome, aken be ga ni fon su yinkollan ŋa, suufun su jonginten gaa a yi, Alla na suufun danman su birandini do a ya batten ŋa, i tokkinton gaa me yi ti xottinyaaxon do ɲiimun ŋa, faten na xooro, xo Alla gaa a mulla moxo be.

20 Gelli axa ga kara do Alimasiiwun batten ŋa baane tan, a na xoyi axa ga fallakoyi seetaanun ŋa ya keeta. Ayiwa axa xa gaa xo axa gaa finna bireene seetaanun kittun ya yi harisa ? 21 Axa ga ma ti : « Maxa ke wutu ! » axa na ti : « Maxa kennin temu ! Maxa a meeme ! » 22 Keti an ga da ku yiga baane i ra wa ɲaana fo tana yi xadi ? Seron xaranŋundun do i ɲaamarindun ya ni kun fiinu yi. 23 Dufontuwaaxun ya n wariini ku sariyanu yi, na batiye xafun likken ro du yi, xo an wa dumaxayanqana, na an faten tanpindi, xa, sariyanu ya ni, nafa ga nta i ya, i ga nta yonkiliŋun kabana.