[Gangunde]
4
Ayiwa in maarenxano, axa xiiden wa in ŋa moxosiri, axakun be ga ni in ɲaxaliyen do in tunkantoore. Xa da duruxoto in xana liŋu, nan sabati Kamanen kapanlenmaaxun ŋa. 2 N wa Wooja do Sintiixe ɲaagana, i n bire genmen noxo, ti Kamanen ŋa. 3 Anken xa be ga ni in kapanlen duntenŋen ŋa, n wa an ɲaagana, an na i deema, baawo i gaja kafiini in ŋa Xibaari Liŋe ke sanqinden killen ŋa, ikun do Kelemeesi do in kapanlenmon kuttun su, i toxonun wa Ŋalinton Kitaaben ŋa. 4 Xa ɲaxali ti Kamanen ŋa waxatin su yi, n na saage a yi : xa ɲaxali ! 5 Axa siroyen nan tuyi katta duna su yi. Kamanen wa tinkoyen ŋa ! 6 Xa maxa hanmi fo wo fo su yi ; ganta, fi su gaa du, xa do a n taŋe Alla yi ti ɲaageyen do xanjonden ŋa, xa na Alla kuufa xa. 7 Ken ŋa, Alla xeeri be ga n danginta faamuyun ŋa, a wa axa sondomun do axa haqilun sabatindini Isa Alimasiiwu kapanlenmaaxun ŋa.8 Ken kutten ŋa keeta, n maarenmu, fo wo fo ga ni tonŋun ya, fo wo fo ga ni daroyen ya, fo wo fo su ga ni teleŋontaaxun ya, fo wo fo sennen ya ga ni, fo wo fo su xanuyen gaa a yi, fo wo fo gemunten ga ni, fo wo fo siri siren ya ga ni, fo wo fo do tiigande ga n xawa, xa da kun ya sinma. 9 Axa ga da ke be xara, na a kita, na a mugu in ŋa, na a koroosi do in ŋa, xa da ken su golli. Ayiwa xeerin Tunkan ɲaana do axa yi ya.
10 N ɲaxalinta xooren ya ni ti Kamanen kapanlenmaaxun ŋa, na a sababun ɲa in fin gaa axa maxa moxo be, axa ga da a koyi in ŋa xadi. Yabo, n fin ɲi axa maxa gelli fu, xa, axa ma ɲi axa ga da a koyifeeran ya kita. 11 Kori ma sigi in ga sefe kundu de ! Baawo inke ga da ke be seera, ken ni ya, n kitayen ga xenpe noqu su, n nan wasedu ti ken ŋa. 12 N wa biremoxon tu korin noxon ŋa ; n wa a tu bannaaxun xa noxon ŋa mene. Nke da wasaduyen ya seera, noqun su yi, a do xibaaren su noxo, dullen noxo, a do fakken noxo, kitayen noxo, a do korin noxo. 13 N ra wa fo wo fo su da ti Alimasiiwu be gaa senben kinni in ŋa. 14 A ga ɲa moxo su, axa ga suno kafiini in ŋa, ken siro moxosiri.
15 Axa wa a tu xadi nan ti axakun Filipinko, gelli Xibaari Liŋen waajunden jopewaxatin ŋa, n nan giri Maxidoona yi, n kitte do Isanjama su kitte ma gemu, a ga feti axakun baane. 16 N ga ɲi Tesaloniixe yi xadi, n haajun ga ɲi fo be yi, axakun ya n ɲi a xayini in da, ken feti ta baane, taanu filli fe. 17 Ken feti xo inke gaa kuye muurunu de, n gaa ke be muurunu, ken ni axa na muso ya kita, na a saxu axa golli sirun kanma. 18 Ayiwa axa ga da fo wo fo xayi in ŋa, n da a su kita ti i moxon ŋa, n baabuwase, nan dangi haqen ŋa. N ga da i kita Pafaroodi yi bire be, i da in faga, a liŋo in da xo timiliŋe, xo sadaxa be Alla ga duŋe ti a yi, a gaa a mulla xa. 19 N Alla wa axa hanminu su jaarana ti i bannaaxun do i darontaaxun ŋa ti Isa Alimasiiwu yi. 20 Nooron wa o Faaba Alla da ma abada-abada. Anmiina.
[Kuuɲindi lagaru]
21 Axa na Alla seri sennun su kuuɲi in da Isa Alimasiiwu kapanlenmaaxun noxon ŋa. Waaxinu beenu gaa do in batten ŋa, i xa wa axa kuuɲini. 22 Alla seri sennun su wa axa kuuɲini, xerexereye yaaxe maxa, ku beenu gaa xidimene tunka Kesaari kan ŋa, i wa axa kuuɲini moxosiri. 23 Kamane Isa Alimasiiwu neeman gan na ɲa do axa batten ŋa.