Filipinko 3

[Baariyen haxiixa]

Ayiwa in maarenmu, xa sewo ti Kamanen ŋa ya. Ku do i meenu safanden ŋa katta axa yi, a nta inke toorono, xa, ken na axa tangana ya. 2 Xa da du koroosi seranwullun ŋa de ! Xa na du koroosi golliburiɲaŋaanon ŋa, na du koroosi dusunnanton ŋa. 3 Oku ya ni sunnanton ŋa, o gaa Alla batta ti ŋa, na o kunkun wutu ti kapanlenmaaxun ŋa, o nta o jikken saqa o haadamaren golli dabarinto ku yi. 4 Ken ga n maxa fe, nke xa yinme na saxu in du yi ke. Selli sere ra gaa saqa i du yi, nke ya n saqa du yi nan xoto a kaman ŋa. 5 N saareye bita segundin koota, n sunne, ya ni in ŋa, bakka Beniyamiina fonlaqen ŋa, Yehuudiyan ya ni in ŋa, n bagu Yehuudiyanun ya yi, n ɲi batini do ya yi xo moxo. 6 A gaa do diinan duruxotoyen ya yi, nke ɲi Isa yinmotoonun ya toorono, a gaa do teleŋontaaxun ya yi diinan noxo, jalagindinoqu ma ɲi inke yi. 7 Ku fiinu su ɲi inke maxa tono ya, xa saasa, n na ken su jaatene xafun ya yi Alimasiiwu saabuda. 8 N kaman Isa Alimasiiwu tuwaaxu haqi danginte ke kaaran ŋa, n na fin su ya ragana xafu yi. Aken saabu da, fon su bono in maxa, n da fon su raga ɲexuntafo yi, ma in na aken Alimasiiwu kita, 9 na a kapanlenmaaxu xa. A feti xo sariyan batunden gaa sikki in gaa baarini de ! Xa, baariyen gaa kiteene moxo be, ken ni liimaanagankaaxun ya yi ti aken Alimasiiwu yi. Ken ya ni baariye be gaa gilli Alla yi. Ken tuuganten na liimaanagankaaxun ya kanma. 10 Ke su gaa do fo be, ken ni ya : na Alimasiiwun tu, a do a wundiyen senbe, ken do na a kapanlenmaaxu i tooran ŋa, nan yaaxe do a yi i kallen ŋa, 11 kuudo moxo su kanma, n xa na katu bireene gilli furun naxa.

[Baraajikiteye]

12 A feti xo in ga da in muurifon kita de, walla xa nan ti in tinme, ken fe, xa in na duruxotono ya, kuudo in na a baraajen kita, baawo Isa Alimasiiwu da inke wutu na in ɲaŋi i yinme xalle. 13 N maarenmu, n nta xosini a sinmana nan ti in da baraaje ke kita kundu, xa ganta, n muurifon ga ni ke be yi, ken ni ya, nan mungu do falle yi, nan duruxoto do kaane yi. 14 Ken moxo ya ni in gaa minna ke tengerene, kuudo Alla gangundi kallanke ke ga da o xiri katta baraaje be yi ti Isa Alimasiiwu sababun ŋa, n na a kita. 15 Ayiwa oku beenu ga xoone diina ke noxo, o su n sinme ken moxo ya yi. Ayiwa selli axa ga na sinme moxo tana yi, Alla na tonŋun bangandini axa danŋa ya de. 16 A ga ɲa moxo su yi keeta, o ga tere nan kiɲe ma noqu ke be o gaa a yi lenki, o n jokki do ken ya yi tannu.

17 N maarenmu, xa yaaxe do in batten ŋa, axa ga da o wari moxo be, sero beenu gaa sukkene do o batten ŋa, xa da axa yaaxen toxo kun ŋa. 18 N wa a koono axa da waxati su, n do yaaxanjin na saage a yi xadi, nan ti seren gaben ya ni du yi, i ga da Alimasiiwu ke ɲa du da xonne. 19 Kun lagarun ni halakiyen ya, baawo kun kamannu na i gonxottun ya batta, i na i kunkun wuttu ti yaagufiinun ya yi, fo wo fo nta i yinkollon noxon ŋa a ga feti ke duna xibaaren baane. 20 Xa, oku ni kanxotte dunkoonun ya yi, o xorotinton na kisindaanan dukku gilli non ya yi, ken ga ni Kamane Isa Alimasiiwu yi. 21 Aken ya na o fati maxayanqanto ku faraaxunu, na i baanondi i yinme fati wuruginte ke yi, na a sababun ɲa senbe be ga da a kandan ro fo wo fo su kanma.