[Dumaxayanqaye xoyi Alimasiiwun moxo]
2
Ayiwa selli senbekiteyen gaa Isa Alimasiiwun kapanlenmaaxun ŋa, haqilitaaxen gaa a xanuyen ŋa, selli axa do a gaa kapanlenmaaxun ŋa ti Fanka Sennen ŋa, siroyen do hinneyen gaa du yi, 2 ken kuŋa, xa da in sewoyen tinmandi ti gemmen ŋa axa naxa, xanuyen nan ɲa baane yi, ŋanniyun nan ɲa baane yi, muurifoonun nan ɲa baane yi. 3 Xa maxa fo wo fo ɲa ti sagoɲanŋe yi, ma walla xa dundaraaxu xafu. Xa, baane su na du maxayanqa i funen danŋa ya, na a fasondi an yinme yi. 4 Maxa an yaaxen taaxu an yinme baane nafan ŋa ; sero ku kuttun xa faayi ya. 5 Sinmeye be ga ɲi Isa Alimasiiwu yi, ken sinmeye me nan ɲa axa xa yi.6 ¤ Allaaxun taben na aken Isa ya yi, xa,
a ma a muuru nan ti keyi-keyi
ma i ga n'n ɲero Alla yi de !
7 Xa, a da ken su bagu du yi ya,
na du komonlaga, na haadamarentaben wutu xo seranmalla kundu.
8 A da i du maxayanqa,
nan ɲa battaana yi, nan duŋe hari kallen ŋa
sallibinsollen kanma yinme.
9 Ken ya n sigi Alla ga da a wurugi a su kanma,
na toxon kini a yi,
toxo ke be gaa toxon su kanma,
10 kuudo kanmu dunkoonu do ɲiiɲe dunkoonu, a do ɲiiɲen wure biranto,
a su na sujudi i xurungun kanma yi
ti Isa toxon darontaaxun ŋa.
11 Ayiwa, kuudo na darontaaxun saaga Baaba Alla yi,
ma raqe su ga ri xiire,* nan ti :
« Tunka Duumante, ken ni Isa Alimasiiwu ya. »
12 Yabo ! N xana liŋu, axa batini ya waxatin su, xa ken nan maxa ɲa in jon baane yi de, a nan tallan jiidi in falle yi ya, ken do allankannen do saralleye, xa da axa kisiyen wara ta yi. 13 Baawo Alla ya na axa lafindini, na axa maxagemundi i liŋun dabarinden ŋa. 14 Xa da fon su dabari, na a ɲi xuumu-xuumuye do mekutande fe, 15 ken ni ya, kuudo axa n xura, nan seno, nan ɲa allanlenmun ŋa, somme ga nta axa yi seri bononton do ɲungunton noxon ŋa, axa na ŋaali duna noxon ŋa xo saanu, 16 ti bireyen digaamen kiɲanden ŋa i ya. Ken ɲaana yinmarawutten ya yi inke danŋa Alimasiiwun rikoota. Ken ŋa, in golliɲan xote ke do in wuru-wuruyen ma ɲaŋi in maxa xafu yi. 17 Xa, hari in foren ya ga n xawa joqo xo sadaxanjaxe kafiini axa danqanaaxun ŋa, nke sewono ti ken ŋa ya, n do axa danmon su na sewo doome. 18 Ayiwa ken moxo baananne ya ni, axa xa nan sewo, axa nan ɲaxali kafini in ŋa.
[Timoote do Pafaroodi]
19 Kamane Isa duŋeyen kanma, fonne sa in na Timoote xayi dagana axa xanta, kuudo a na axa xibaarun kiɲandi in ŋa, ken na inke xa butten xotondi. 20 Sere tana su nta in maxa, n do ke be gaa sinmeye yi, axa fin hanmin gaa a kaman ŋa soobe yi xoyi aken moxo. 21 A su na do i dudantonon ya yi ; i nta do Isa Alimasiiwu fi ya. 22 Xa, axa yinmenu wa Timoote ken tu ; a da i fiinun bagu sankon ŋa, a ɲa do in batten ŋa xo renmen do i faaba, na Xibaari Liŋen gangu. 23 Ken kuŋa in ga na in moxon tu bire be, n na a mulla na a ya xayi axa yi. 24 Kamanen duŋeyen kanma, n saxunten ya na a yi, nan ti in yinme xa wa riini, a nta dallana.
25 Xa, saado ken su gaa ɲaana, n da a sinma waajibin ya ni in na Pafaroodi xayi katta axa yi, n waaxin ya ni, n golliɲanlenman ya ni, n gajadoomenlenman ya ni, axakun xa xidimaana xayinten ya ni katta in deemanden ŋa. 26 A da a xanu i na axa su wari, ayiwa a ga koni a da nan ti axa da i masahantaaxun xibaaren mugu, ken xosi a hanmi moxosiri. 27 Na a toxo ti a jangire ya ma a gaa furunyaaxene, xa Alla hinne a yi, a ma hinne aken baane yi de ! A hinne inke xa yi ya, ken ɲa ya suno n maxa daga kafi in maxa suno yi. 28 N na a xayini axa yi ya jawoye, kuudo axa nda a wari, axa na sewo, fo na bagu inke xa sunon ŋa in kanma. 29 Axa sewonta xooron na a bisimilla ti Kamanen ŋa. Sero beenu gaa xoyi aken moxo ke, axa n xawa kun kamannu ya darono. 30 Baawo a yonkin ɲi toqo do Alimasiiwun gollen ya yi, na a sababun ɲa a sigi axa sigan ya yi, na i yonkin kini kallen ŋa do in deemanden batte.