6
Saarerenmu, xa da axa saaraanon batu xo moxo be ga n liŋi Kamanen da, baawo ken ya n xawa. 2 « An ma do an faaba daro »* ke ya n ɲa farila fanan ŋa a do laayidun gaa doome. 3 Ken ɲa ya, « kuudo axa na sewo, na wuyi gille bira ɲiiɲen kanma. » 4 Axakun faabenu, axa xa n maxa axa renmun buttunxaasa. Xa, xa da i mara ya, xa na i jikkundi, xo moxo be gaa gemme Alla yi.
5 Axakun komo, xa da axa dunadunkamannu batu ti daronden do kannen ŋa buttuxulle kanma, xoyi axa gaa a ɲaana Alimasiiwu danŋa moxo be. 6 Yaaxe muso fe de, xo na du liŋondi seron da, xa, a nan ɲa xo Alimasiiwun komo, xa da Alla liŋun ya dabari gilli sondomen ŋa. 7 Xa buttun xullun nan golli, xoyi axa gaa a ɲaana Kamanen ya da. Xa maxa golli xoyi axa gaa a ɲaana sere ya da. 8 Xa na a tu nan ti, yenme be nda fo sire dabari, ken kaman ga ɲa kome ya yi ma hoore ya ga ni, a wa a baraajen kitta Kamanen noqu. 9 Komonkamanu, axa xa na ken moxo ya, xa ɲa axa komon da xo ken moxo. Xa maxa ɲaŋo katta i ya. Axa na a tu nan ti axakun do ikun su kaman wa kanmun ŋa, fasanŋuntaaxu nta aken noqu.
[Muumininun gajanyokku]
10 Ayiwa keeta ke : xa da senbe seera do Kamanen ŋa ti a senbe xoore ke yi. 11 Xa da Alla gajanyokkun su jongi du yi, ken ŋa, axa na katu sikki Ibiliisa feera burun kaane. 12 Baawo o nta fataganke gajanŋa, o na seetanmareyun ya gajanŋa, a do seetanfankanu, kafiini ke duna bitante kandandaano, ken do seetan buru be gaa kanmun dingiron ŋa. 13 Ken saabu da, be su na du maxanyetu ti Alla gajanyokkun su yi, ken ŋa, kiyi buren ga na bange, axa na katu gajanŋa, nan sabati gajanŋen ŋa, ma a ga n'n tinme. 14 Xa giri axa n sigi, na tonŋun dusiitaaden yetu an xoodon ŋa, na teleŋontaaxun mexenkufan ro an gijinmen ŋa. 15 Axa na Xibaari Liŋe xeerin tepunun rondi axa taanun ŋa. 16 Xa da liimaanagankaaxun ɲa du da xodore yi, ke be axa ra gaa Ibiliisa yinbinbundanŋun mulondini ti a yi. 17 Xa da kisiyen mexenkufunen wutu, na Fanka Sennen kaafan wutu, ken ga ni Alla digaamen ŋa. 18 Xa da ɲaageyen danben su ɲa, waxatin su yi ti Fanka Sennen ŋa. Ken moxo baananne yi, xa n wuyanyaaxo batiyen do allanɲaageyen ŋa inke do Alla seron su da, 19 kuudo in ga na in raqen wuɲi ti in wa waajundini ti Xibaari Liŋen ŋa, in na wakkile na a gundon bangandi seron da. 20 Nan ti in wa kason ŋa do i fi su, Xibaari Liŋe ke sikkaanan ya ni in ŋa, xa da Alla ɲaaga in da kuŋa, kuudo in haqilen taaxunten na Xibaari Liŋen ko ti i moxon ŋa, bire be in ga na ɲi sefene.
[Digan lagaru]
21 Ayiwa xa na a tu nan ti in waaxinxana Tixiiki, xidimaana duntenŋen ya ni, n xidimanlenman ya ni Kamanen gollen noxo, a wa riini axa tuyindini in gaa moxo be, a do in gaa ke be yi. 22 N da a girindi a xanne maxa ya, kuudo a na axa tuyindi o xibaarun ŋa, a do na axa buttun xotondi. 23 Baaba Alla do kamane Isa Alimasiiwu gan na xanuyen do xeerin ɲa waaxinun su da, a do danqanaaxu. 24 Xanuyi duumanten gaa ku beenu su maxa katta o kaman Isa Alimasiiwu yi, neeman gan na ɲaŋi i su danŋa.