Yefeesinko 5

[Biremoxo Alla nooron ŋa]

Ken kuŋa, baawo Alla renxananun ya ga ni axa yi, xa da Alla seera ya. 2 Xa da axa dunadunbireyen bira ti xanuyen ya yi, xo ga da o xanu moxo be, na i du sadaxi o danŋa, allankuye do timiliŋinsadaxa yi Alla da. 3 Ayiwa jeeniyimoxobure, sobintaaxun danben su, a do nata, axakun beenu ga ni Alla seri sennun ŋa, axakun toxo ma xawa mugiini ku du baananbe su yi bogo-bogo. 4 Diganburunde, xawuyundigaame, yaagudunloxontandigaame, kun feti axakun xalle. Axakun nan tiigandi Alla danŋa ya. 5 Xa da a tu ya nan ti jeenaananbure, sobinte, a do natante, kun ni munubattaanon ya, ku nta xeye kitta Allantunkaaxun ŋa Alla do Alimasiiwu noqu. 6 Sere su n maxa axa sankundi ti neeneliŋontandigaame yi, ku fiinu ya saabu da ni, Alla butten gaa gilli allankutaanon xanne maxa. 7 Xa do i n maxa kafi fo wo fo yi.

8 Gannin ŋa, axa ɲi biten ya yi, xa saasa, axa na nooron ya yi kafiini Kamanen ŋa, ken kuŋa xa bire xo sero beenu gaa nooron ŋa. 9 Baawo nooron ya n saarene ti siroyen do teleŋontaaxun do tonŋuntaaxun danben su yi. 10 Fo be ga n liŋi Kamanen da, xa da ken koroosi. 11 Xa maxa du wara bitedungolle xafun ŋa, xa ganta, xa da i hayiba ya. 12 Baawo i gaa ke be ɲaana do biten ŋa, hari a konŋen ni yaagun ya. 13 Ayiwa kun fi ɲaŋunto ga na ware beran ŋa, i xurana ya. 14 Fo wo fo xa ga na xura, ken wariini ya. Ken ya n sigi a ga koni nan ti :

« Anken be gaa xenqene, wulli !

Wulli gilli furun naxa, ken na ɲa sababu yi Alimasiiwu na an nooro. »

15 Ken kuŋa, xa da axa biremoxon tu, xa maxa bire xo haqilanloxo, xa, xa ɲa haqilanton ya yi. 16 Waxatin nan maxa axa firi, baawo duna ku kiyu burun ya ni. 17 Ken kuŋa, o n maxa ɲa haqilanloxo yi, xa, o na a muuru ya na a faamu fo be ga ni liŋun ŋa. 18 Ayiwa axa maxa mini nan mande, na a toxo ti ken wa riini ti xenperadangiyen ŋa. Xa, xa fagu ti ya yi. 19 O na me xiidifata ti Jabuurinsuugun do xesiidanun ŋa, a do diinansuugu. Xa suugu, xa da allantiigesuugun suugu ti axa sondomun su yi Kamanen da. 20 Xa da Baaba Alla tiiga do fo wo fo su yi waxatin su ti o kaman Isa Alimasiiwu toxon ŋa. 21 Axakun beenu gaa kanna Alimasiiwun ŋa, xa da du maxayanqa me da.

[Koren gangunde]

22 Yaxiyaqu, xa da du maxayanqa axa kiinanu da, xoyi axa gaa du maxayanqana Kamanen da moxo be, 23 baawo yaqe yinmanken ya ni kiine yi, xoyi Alimasiiwu xa ga ni i yinmotoonun yinmanken ŋa moxo be, aken ya ni yinmotoonun kisindaanan ŋa, kun ga ni a faten ŋa. 24 Ayiwa yinmotoonun gaa du maxayanqana Alimasiiwu danŋa moxo ke be de, yaqe xa n xawa du maxayanqana kiine da ken moxo baananne ya yi fi su noxon ŋa.

25 Kiinanu, xa da axa yaqun xanu, xoyi Alimasiiwu ga da i yinmotoonun xanu moxo be, ma a gaa i yonkin kuyini a da. 26 A da ken ɲa ya, kuudo na Isa yinmotoonun laabandi, na a senondi ti wanqijin ŋa, ti Xibaari Liŋen digaamen ŋa. 27 Ken xa ɲa ya, kuudo na Isa yinmotoonu ku nooronton hadarindi ike yinme jon me naxa, loojuru su ga nta a yi, jogooniye do leebu tana su ga nta a yi. A sennen tinmante ga ni. 28 Ken moxo ya ni : kiine gaa i du xanna moxo be, a nan xawa i yaqen xa xanna ken moxo ya. Sere be gaa i yaqen mulla, an wa an yinme mulla. 29 Baawo sere su ma i yinme xoni abada ; xa an na an du birandini ya, na an du sorogo, xo Alimasiiwu gaa i yinmotoonun birandini na i sorogo moxo be, 30 na a sababun ɲa oku ni a suufun yogo ya. 31 « Ken ya saabu da, yugon gaa fatene bakka i ma do i faaba yi, do i yaqen nan kafi, i filli na ɲa seri baane. » 32 Ke gundo kundu xooren ya ni ; nke da ke ko, na Alimasiiwu do i yinmotoonun baananlenmaaxun ya koyi. 33 A ga ɲa moxo su yi keeta, baane su nan xawa i yaqen xanna ya, xoyi an yinme gaa du mulla moxo be, yaxaren xa be ga ni, an na an kiina daro.