[Isanjaman baanaaxu]
4
Ken kuŋa, inke be gaa kasorankaaxun ŋa do Kamane Isa sababun ŋa, in wa axa ɲaagana, axakun beenu Alla gaa axa xilli, nan ti axa na axa biremoxon gemundi Alla ken xirinde yi. 2 Xa sabari me tooran wure ti xanuyen do dumaxayanqayen ŋa waxati su, a do nooxaaxu, do muɲi. 3 Xa da duruxoto, baanaaxu be gaa axa maxa ti Fanka Sennen ŋa, axa n tigiti a yi ti xeeri be gaa axa tapa. 4 Isanjama baane ya na du yi, ken ga ni a suufun ŋa. Fanka Senni baane, jikki baane, Alla da axa xiri ti ken jikke ya, 5 Kaman baane, danqanaaxu baane, tuubiyinwanqiyi baane. 6 Alla baane ya na du yi, a su su faaba, a gaa a su kanma, a wa do a su yi, a wa a su yi.7 Ayiwa o du baananbe su da Alimasiiwu kuyen neeman lanɲaran me duran kita. 8 Ken ya n sigi a ga koni nan ti :
« A sege katta kanmun ŋa, na kasorankon raga, gajanŋen kasoranko,
na kuyu falla seron ŋa. »*
9 Ayiwa, nan ti « a sege », ken xa ni manne ? Ken wure ni : a yanqa ma ɲiiɲen xoodan kanma ya fina. 10 Ke be ga yanqa de, ken yinme ya n sege kanfaton ɲeri su kanma xadi, kuudo na fon su faga. 11 Ayiwa aken ya n da yogonu sugandi na i ɲa faaru yi, ma xa allanxibaarindaano, a do gangundaano ti Xibaari Liŋen ŋa, walla xa goyimandaano, a do xaranŋundaano. 12 A da ken ɲa ya kuudo na Alla seron moxo gemundi katta a gollen tinmanden ŋa, kuudo Alimasiiwu yinmotoonun na wurugi. 13 Ken ga na ɲaŋi, o su na ɲa baane yi liimaanagankaaxun noxon do Allanlenme tuyiyen ŋa, o na kalifaadaaxu, nan kiɲe Alimasiiwun tinmantaaxun xiiman ŋa.
14 Ken bire keeta, o ntaxa ɲaana xo leminu yi, xaranŋundaana burun gaa o tilimintalamana, xo jiidunfuuren gaa banbuusen maxa, na o deni dooke, na o riiti yere, i gaa o neenene na o sankundi. 15 Xa, o ga na tonŋun ko ti xanuyen ŋa, o wurugiini ya moxo su yi katta Alimasiiwun ŋa, aken be ga ni yinkollan ŋa. 16 Ayiwa suufunun danmon su tokkiini me yi ti aken Isa ya yi, nan ɲa fo tinmanta baanen ŋa, suufu baane su ga na i gollen dabari xo a ga n xawa moxo be, faten xoorono ya ken moxo yi xanuyen noxon ŋa.
[Bireyenmoxo xase, bireyenmoxo kurunba]
17 N gaa ke be koono axa da nan xoto do a yi ti Kamanen toxon ŋa, ken ni ya : xa maxa bire xo sankunton moxon ŋa xadi de, ikun batini do sinmeye xafunun ya yi. 18 I haqilun bitanton ya ni, i mukkunmaanun ya ni Alla ŋalintaaxu noxo, na a sababun ɲa sankuntaaxu be gaa i ya ti i xandunxotaaxun ŋa. 19 I da yaagun sedi, na du kini haraamen ŋa, i wa fi laxosonte ke danben su dabarini, i ntaxa i du maxa.
20 Xa, axakun ma Alimasiiwu seera ken ŋa de. 21 Ayiwa selli axa ga da a xibaaren mugu, na axa xaranŋundi tonŋu ke be gaa aken Isa yi, 22 ken kuŋa, xa da axa bonontaaxu xase ke doroken boora, baawo ken na axa janbana roono jikkinxoson do halakiyen ya yi. 23 Xa da du kurunbaaxu ti axa yonkinun do axa sinmeyun ya yi, 24 na biremoxo kurunban doroken rondi, ken tageye be do Alla moxonun gaa gemme ti teleŋontaaxun haxiixan do senontaaxun be ga giri tonŋun ŋa.
25 Ken kuŋa, xa boore bakka gaaren ŋa, be su na tonŋun koni i kapanlenman da,* baawo o su ni xo seri baanen suufunun ya.* 26 Butu, xa, maxa allankute.* Kiyen nan maxa xenu na an butunten toxo de, 27 maxa kille kini Ibiliisa yi. 28 Fayaanan nan maxa fayi keeta, xa, a n golliɲa ti i kittun filli ya yi, kuudo a na katu i yinme haajun sirono, na korinton xa deema. 29 Maxa digan bure su bagu an raqen ŋa, xa ganta, digan sire be gaa deemandini, a gaa fo kapa seron maxa, seron haajun gaa a yi, a mukken gaa seron neemana, ken ya ko. 30 Xa maxa Fanka Sennen sunondi, Alla ga da axa taagumansa ti ken be yi maxawasayen koota. 31 Buroyixaxace, butten do mamaye, sefexan xote, a do diganburunde, xa boore bakka i ya, kafiini bonontaaxun danben su. 32 Ganta, xa siro me danŋa ya, xa nan hinne me yi, nan yanpa me maxa, xo Alla xa ga yanpa axa maxa ti Alimasiiwun ŋa moxo be.