Yefeesinko 3

Axakun beenu ga feti Yehuudiyanu yi, nke ɲa kasoranke yi do axa batten ŋa ti Isa xibaaren konŋen ŋa axa da. 2 Axa yinmenu da a mugu koŋiini ken de, Alla ga da golle be xaliifa in ŋa axa da ti i neeman ŋa. 3 Alla da i gundon bangandi in danŋa, n faayi ga da fonne safa bakka ken ya yi katta axa yi. 4 Alimasiiwu xibaaren gundon tuwaaxu be gaa in maxa, ma axa ga da a faamu ti in ke bataaxe xaranŋen ŋa. 5 Gannin ŋa, Alla ma ɲi a ga da ke gundo bangandi haadamaaxun danŋa, xa saasa ke, a da a bangandi i sennun do allanxibaarindaanon danŋa ti senben ŋa. 6 Ken gundo ni : ku beenu ga feti Yehuudiyanu yi, i ga ro xeyen ŋa kafiini Yehuudiyanun ŋa ti Isa Alimasiiwu kapanlenmaaxun ŋa, i do i su ɲa jama baanen ŋa keeta, Alla ga da laayidu be wutu noxon ŋa, i su ya kafo ni. 7 N ɲa ken Xibaari Liŋe xidimaanan ŋa ti Alla senben ŋa, ti a ga da neema be kini in ŋa. 8 Nke ya ni danqanaaxuntayenmun su fo roxi roxen ŋa, ken do i fi su, Alla da ke neema kini in ŋa, nan ti ku beenu ga feti Yehuudiyanu yi, n na i waaju ti Alimasiiwun nafan ŋa, ke nafa be ga nta ɲemeene, 9 ayiwa gundo ke be muxunten ga ni gelli nan xaso, Alla gaa riini a yaaxen bagandi moxo be, n na ken bangandi a su da. Aken Alla ya n da fo wo fo taga. 10 Ken kuŋa, Isa yinmotoonun ya na Alla fintuwaaxun moxonman su tuyindini kanmun maraanon do a yinmankon ŋa keeta. 11 Ken ni fo rakutunten ya yi gelli abada, a ga da a yaaxen bagandi ti o kaman Isa Alimasiiwu yi. 12 Ti aken Isa jikken ŋa, o danqanaaxunton ra wa tinkono Alla yi ti o sondomun liimaanagankaaxun ŋa. 13 Ken kuŋa, n wa axa ɲaagana axa danqanaaxun nan maxa lanpu ti toora ke be ga da in kita do axa batten ŋa, ken ni darontaaxun ya yi axa da.

[Allaɲaageye Yefeesinkon da]

14 Ken ya n sigi in gaa sujudini in xurungun kanma yi Baaba jon me naxa, 15 aken ya n da kanmun do ɲiiɲen xabiilanun su toxora. 16 Yelli nooro gaben kaman gan na axa sondomun senbendi ti i Fanka Sennen ŋa. 17 A gan na Alimasiiwu hadarindi axa sondomun ŋa ti liimaanagankaaxu yi. Yelli axa ɲiimun gan na tonte, nan sabati xanuyen noxon ŋa. 18 Ken moxo, axa na fankan kita nan katu a faamunu kafiini Alla seron danmon su yi, Alimasiiwu xanuyen ga n xoora, a ga n dara, a ga n giila, a do a ga n jufa moxo be, 19 xanuye ke be ga n xoora tuwaaxu su danben ŋa, axa na katu ken tuunu, kuudo axa sondomun na fagu, ma axa ga n n wasedu ti Alla tinmantaaxun ŋa. 20 Alla ya n katta fo wo fo su da, fo be xenpa ga nta a yi. A na fon ɲa nan xoto o ga da ke be ɲaaga, a do o ga da ke be sinma, a na ken ɲaana ti i senben lanɲaran ya, ken senbe be gaa gollini o yi. 21 Yelli a nooron gan na ɲa Yinmotoonun noxon ŋa ti Isa Alimasiiwu yi, gelli abada, ma abada-abada. Anmiina.