[Medeemande]
6
N maarenmu, axa du baananbe be nda juyintanrage allankuteyen ŋa, axakun beenu moxon ga siro do Fanka Sennen ŋa de, axa ya na a kaman jaabana bakka. Axakun yinmenu xa be ga ni, xa da ken ɲa ti fiisirontaaxun ya yi de. Ayiwa axa yinmenu na du koroosi, axa xa n maxa xenu jaaraben ŋa. 2 Xa da me likkun wutu, ken moxo ya ni axa gaa Alimasiiwun sariyan batta. 3 Baawo sere be nda du sinma fo yi, na a ɲi an feti fo yi, an da du neene. 4 I be su na i yinme gollen taxasi tannu ; an ga da yinmarawutte ɲi a yi su, ken kita an yinme baane ya yi, a n maxa ɲa ti seri tana gollun taxasinde yi. 5 Baawo seri baane su na i yinme baane gollun likken ya tiŋana.6 An ga da Alla digaamen xara sere be maxa, xeeri su ga an maxa, an nan xawa a taxandini an do ken xaranmoxo naxan ŋa ya. 7 Xa maxa du sankundi, Alla feti soyifo. Sere ga da fo wo fo tifi, an na ken fatana xa ya de. 8 An ga soxo yonkiliŋun da, yonkiliŋun gaa ke be saarana, an na ken ya fatana, ken ga ni halakiye. An ga na soxo Fanka Sennen ya da, Fanka Sennen gaa ke be saarana, an na ken ya fatana, ken ga ni bireyi duumante. 9 O n maxa tanpi fiisiriɲanŋen ŋa sa, baawo o ga ma lanpu su, be su wa riini fate fatewaxatin ŋa. 10 Ken kuŋa, na waxatin toxo o maxa, o na fo siren golli be su da, sigaali o waaxi liimaanaganko ku kun.
[Digan lagare]
11 Xa da ku safandi baraxato faayi de, nke yinme kitten ya n da i safa. 12 Sero wa du yi, kun na sigimoxo siren ya mulla seron yaaxaranjaron ŋa, kun ya na axa neqini ti ma axa ga n n sunne. I na ken ɲaana ya tannu, kuudo Alimasiiwun gengenden ŋa sallibinsollen kanma, toora be gaa do a batte, ikun na kisi ken toora yi. 13 Hari ikun beenu gaa du sunnandini, i yinmenu nta sariyan batta, i na a mulla ya tannu, axa nan sunne, kuudo i na dukoyi, nan ti axa da ken taagumanse ro axa faton ŋa. 14 Nke ken xa maxa, dukoyintaaxu nta du yi, a ga feti o kaman yugo Isa Alimasiiwu gengenden ŋa sallibinsollen kanma. Nke danŋa, duna yinme na xo a ga genge nan kara do a batten ŋa ya sallibinsollen kanma. Duna yinme xa maxa, nke genge ya nan kara. 15 Sunneyen do sunneyinbalaaxu, ken nta jaateene ; ke be gaa jaateene, ken ni ya Alla ga da o baari, na o ɲa seri taganta kurunbo yi. 16 Ku beenu ga duŋe ti ke kille yi, xeerin do hinneyen gan na ɲaŋi i da, kafiini Alla jaman su yi, kun ya ni Isirayila haxiixan ŋa.¤ 17 Keeta ke, sere su n maxa in lasamandini, baawo tugubattu beenu gaa inke faten ŋa, kun ni tugubattun ya, n ga da i kita do Isa batten ŋa. 18 N maarenmu, yelli o kaman Isa Alimasiiwun neeman gan na ɲa do axa batten ŋa. Anmiina.