[Bireye hooraaxun noxo]
5
Alimasiiwu da o xannun hooro ya, kuudo tonŋun tonŋu, o nan ɲa hooro yi. Xa da duruxoto kuŋa, komonkacen nan maxa yille roono axa xannun ŋa. 2 Nke Pawulu na a koni axa da, axa na a mugu, nan ti : axa nda du sunnandi ya, ken ŋa nafa ntaxa kiteene axakun da Alimasiiwu yi. 3 Ayiwa in na a xurandi axa danŋa xadi nan ti : sere wo sere ga na du wara sunneye yi, a kaman nan xawa sariyan gollen danman su ya dabarini. 4 Seren fate bakka Alimasiiwun ŋa, sere be ga da i jikken ro baariyen ŋa ti sariyan ya yi, ken kaman kume Alla neeman ŋa. 5 Oku kun jikken gaa ke be yi Fanka Sennen maxa, o xorotinton gaa a dukku ; ken ni baariyen kiteyen ya ti danqanaaxun ŋa. 6 Baawo Isa Alimasiiwu kapanlenmaaxun ŋa, jaaten nta sunneye do sunneyinbalaaxu yi, xa ganta danqanaaxu be gaa xanuyen kanma, ken ya n jaateene.7 Axa girimoxon siren ɲi. Ko xa n da axa bese, axa ga nta tonŋun batta ? 8 Alla ke be ga ni axa xirindaanan ŋa, ke besende ma giri aken ken ŋa de ! 9 Tigafuncu baanen wa raxafakkan tigan bonondini.¤ 10 Nke ken saxunten wa axa yi ti Kamanen ŋa, nan ti axa nta taŋera tana wuttu. Xa, sere wo sere ga na axa jaman xooti, ken ga ɲa seran danbe su, a kaman wa yanganxateene. 11 Ayiwa saasa in maarenmu ! Selli inke gan n ɲi in gaa axa ɲaamarini ti sunnanden ya yi, i finna in toorono do manne yi harisa ? Ken ya gan n ɲi, ganpinsa nan waajundi ti Isa gengenden ŋa sallibinsollen kanma, ken ken ma ɲi ɲaana xota yi. 12 Ayiwa ku beenu gaa mesooxiyen sababunu axa naxa, yelli i yinmenu gan xosini du muusene dubaane xo jaxansene.
[Mexanuye]
13 N maarenmu, axakun kun xiri katta hooraaxun ya yi. Ke hooraaxu kuŋa, xa maxa a ɲa ti yonkiliŋu batiyen ŋa, xa, xa xidime me danŋa ti xanuyen ya yi. 14 Baawo sariyan danman su wa du ɲiini diganta baane noxon ŋa, ken ga ni : « an na an kapanlenman xanu xoyi an yinme moxo. »* 15 Xa selli axa ga na me xiɲi xo wullunyillo, na me toni xo ɲexo, xa yinmenu na ken faayi de ! Axa na me gurujana ya. 16 N gaa ke be koono axa da kuŋa : xa sukke do Fanka Sennen liŋun ŋa, ken ŋa, axa ntaxa sukkene do yonkiliŋun ŋa. 17 Baawo yonkiliŋun tayinnen ya ni Fanka Sennen ŋa, ayiwa Fanka Sennen xa tayinnen ya ni yonkiliŋun ŋa. Baawo mesooxiyen ya na i naxan ŋa abada, ken ya n sikki an ra ga ntaxa fon dabarini, fo be ga n liŋa an da. 18 Xa selli axa nda kande do Fanka Sennen ŋa, sariyan kandan ntaxa ɲaana axa kanma. 19 Yonkiliŋun gollun tuyinton ya ni : jeeniye, sobintaaxu, a do yaagudunloxaaxu, 20 munubatte, korotonde, xonnaaxu, genmanbalaaxun do haasidaaxu, sondonburaaxu, dufasanŋuntaaxu, fateyen do booxeye, 21 nata, serikalle, minnen do fesexiye, a do kun do i meenu. Sero beenu gaa ku fiinu kundu ɲaana, a da a ɲi in da axa gongo, n wa yillene axa gongono xadi ; nan ti kun kamannu nta taqe kitta Allantunkaaxun ŋa. 22 Xa, Fanka Sennen ken saarene ti xanuyen ya yi, a do sewoyen do xeeri, muɲu, hinneye, siroye, a do danqanaaxu, 23 duumaxayanqeye, duugoyimande. Sariyan nta balla ku fiinu yi moxo su. 24 Ku beenu gaa do Isa Alimasiiwun ŋa, i da i haadamarentaben do natan do yonkiliŋun su ya kari doome sallibinsollen kanma. 25 Selli o gaa bireene Fanka Sennen ya yi, o n duŋe ti a liŋun ŋa kuŋa. 26 O n maxa ɲa dundaru yi, o gaa baqa me yi, na me haasidaaxu.