4
N na ti kuŋa : xayimaxantanlenma ke ga da wuce su ɲa leminaaxun ŋa, fatanpansiye ma ɲi a do komen naxa, na a ɲi xa fon su kamanaaxun gaa aken be maxa. 2 Xa a mareene sero ya yi, kun gaa sikki do a xibaarun ŋa, ma faaben ga da waxati be rakutu. 3 Oku xa yinmenu ɲi ken moxo baananne ya yi, o joŋaarun ŋa : o ɲi komaaxun ŋa seetaanun¤ kittun ya yi. 4 Xa, bire be waxati rakutunten ga ri, Alla da i renmen bangandi gilli yaxare ya yi, a bange sariyan kandan noxon ya yi, 5 kuudo sero beenu gaa bireene sariyan kandan wure, na i maxawasa, ma sa, allanlenmaaxun xiiman na kini o yi. 6 Na a sababun ɲa allanlenmun ga ni axa yi, Alla da i renmen ŋalintaaxun¤ ya wara axa sondomun ŋa, ken gaa gangundini nan ti : « Abba ! » Ken ga ni : Baaba wo ! 7 Ken saabu da, an feti kome yi keeta ; renmen ya ni an ŋa. Renmen xa ya ga ni an ŋa, Alla da an ɲa xeyimaxantanlenman ya.[Pawulu hanmiye xeyimaxantanlenmon da]
8 Ken bire, Alla tuwaaxu ma ɲi axa maxa, axa ɲi seetaanun ya komaaxun ŋa, kun ga feti Alla yi. 9 Xa saasa kuŋa, axa wa Alla tu, ken ga fe xa, n na ti Alla ken ken wa axa tu ; kan moxo ni xadi axa gaa fallanyillene katta seetan lanpunton do seetan nafantanŋun batiyen ŋa xadi ? Axa na a mulla nan ɲaŋi kun fiinu da komo ya yi xadi ba ? 10 Axa wa kooton yogo darono diinanta kooton yogo yi, ken do xasun do waxatinu, a do siino ! 11 N ga tanpi do axa yi moxo be, in wa kanna in ken gollen nan maxa daga ɲa xafun ŋa. 12 N maarenmu, n wa axa ɲaagana, axa nan ɲa xoyi inke yinme moxo, n ga ntaxa sariyan wure, berini inke xa ɲaŋi xoyi axakun moxon ya. Axa ma fo bure su ɲaŋi in ŋa.
13 Axa wa a tu xa nan ti watten ya n sigi, n ga da Xibaari Liŋen kiɲandi axa yi ta fanan ŋa. 14 Ayiwa ken bire, n fate ke wariyen nan ŋariɲa, xa ken do i fi su, axa ma in wanga, axa ma bara in ŋa. Ganta axa da in bisimilla ya xo Alla maliikan ya ga ni in ŋa, axa da in bisimilla xo Isa Alimasiiwu ya ga ni in ŋa. 15 Axa ken sewoye na minna yi kuŋa ? Baawo in saxunten wa a yi nan ti a ga n ɲi katta ɲaana, axa ɲi axa yaaxon woloxotini na i kini in ŋa ya. 16 Saasa wo, n ɲaŋi axa da xonnen ya yi ba, nan ti baawo in da tonŋun koni axa da ?
17 I gaa marasande ke be yi katta axa yi, ŋanniyi siri gumaaxu fe de ; i na a mulla na axa do inke ya fata tannu, kuudo axa na taŋe ikun ŋa. 18 Marasanden ken siren ni waxatin su ya yi tonŋun kanma ti ŋanniyi siren ŋa ; ken xa ma xawa ɲaana in jon baane yi, nan ti in do axa wa doome. 19 N renmu, axa hanmin ya na in ŋa xadi xo jalan karandu, ma Alimasiiwun ga n'n hadari axa yi. 20 N wa a mulla nan ɲa kafiini axa yi ke waxati, kuudo na in diganmoxon faraaxu katta axa yi, baawo axa da in lasama.
[Haajara do Saaratu misaale]
21 N na axa tirindi : axakun beenu gaa a mulla nan ɲa sariyan kandan wure, yaala ken sariya baananne gaa fo be koono, axa wa a faamunu ba ? 22 A safanten ya ni, nan ti Ibirahiima da renmu filli ya kita : baanen ni tunbaari yaxare Haajara renmen ya, baanen ni hooro yaxare Saaratu renmen ya.* 23 Tunbaari yaxare ke renmen kuŋa, a kite ti kapanlenmaaxun killen ya yi yugo do yaxare naxa, xa, hooro yaxare ke renmen ken ni Alla laayidun yillakaran ya. 24 Ku du baananbe su wa fasarini ti masayila yi : ku yaxaru filli ni laayidunu filli ya. Baanen ni Tuurisiina giden laayidun ya, ken ni Haajara masayilan ya : aken renmun saareene komo ya. 25 Haajara na xo Tuurisiina giden ya, ken gaa Araabi, a misaalen ni ke Yerusalaamu be gaa du yi ya lenki, ken do i renmun gaa komaaxun ŋa. 26 Xa, Yerusalaamu kanmuranke ke ni hooren ya, aken ya ni o ma yi, 27 na a sababun ɲa a safanten ni nan ti :
« Boroke, sewo, anken be ga ma saare.
Anken be ga ma jalan karandun wari, kakkite ɲaxaliyen maxa,
baawo yaxarin sedinten ya renmun gabun ni
diinanta kiinagumen ŋa. »*
28 N maarenmu, axakun kun xa ni laayidun renmun ya yi xoyi Isiyaaxa moxo. 29 Ayiwa ken waxati, renme be ga kite ti yugo do yaxare kapanlenmaaxun ŋa, a ɲi tooran saqa renmen kanma, ke be ga kite ti Fanka Sennen ŋa. Hari an dan ke lenki, ken moxo baane ya n finna du yi. 30 Ayiwa sa, kitaaben da man ko ? « Tunbaaren do i renmen nan xate, baawo tunbaare ke renmen ma xawa xeyene kafiini hooro yaxare ke renmen ŋa. »* 31 Ken kuŋa in maarenmu, tunbaari yaxarinlenmu feti oku yi, hooro yaxarinlenmun ya ni o yi.