[Baariyen kille]
3
Axakun Galacanko, haqilanloxo ! Manne n da axa haqilun yetu ? Axa yaaxon xa ya n ɲi tontene Isa Alimasiiwu tontonten ŋa sallibinsollen kanma de ! 2 Saasa wo, yaala axa da Fanka Sennen kita ti axa ga da danqanaaxu ke be sefen mugu ya ba, ma axa da a kita ti sariyan gollen dabarinden ya yi ? N na ke baane ya jaabun fatanpansiyen muurunu axa maxa. 3 Axa haqilanloxaaxun kiɲe ma ke me yi ? Axa da fin jopa ti Fanka Sennen ŋa ; yaala axa na a mulla na a lagarindi ti axa yinmenu duruxotoyen ya yi ba ? 4 Xo axa ke golli dabarinte su ɲaana xafun ya yi ? Ken su nan ɲa xafun ŋa kundu, ken ni lasamefin ya ! 5 Ke be ga da Fanka Sennen kini axa yi, na kaawafiinun dabari axa jon me naxa, yaala a da ken ɲa ti axa ga da Xibaari Liŋen mugu nan danqanaaxu ti a yi ya ba, ma a da a ɲa ti axa ga da sariyan gollun dabari ya ?6 « Ibirahiima toŋondi ti Tunka Duumanten ŋa, Tunka Duumanten xa da a jaate baarinte yi. »* 7 Ken kuŋa, xa da a tu nan ti Ibirahiima bonsonŋun ni ku beenu gaa danqanaaxunu ya. 8 Safandi Sennun da a ko yinme du nan ti : ku beenu ga feti Yehuudiyanu yi, Alla na i baarini ti liimaanagankaaxun ya. Kun Safandi Sennu da Ibirahiima nimisiwasa ti : « Xabiilanun su wa riini bareken kita ti an ŋa. »* 9 Ken saabu da, liimaanaganken su wa barekini ti Ibirahiima yi, danqanaaxuntayenme. 10 Sero ku beenu su tuuganton gaa sariyan gollen duuron ya kanma, langanden wa do i batten ŋa, baawo a wa safefoonun ŋa ti : « Alla langanden wa sere kanma, sere ke be ga nta ke sariya digaamun su tangana nan golli ti a su yi. »* 11 Ken kuŋa, a xura nan ti sere su nta baariini ti ɲangolle yi Alla jon me naxa, baawo « seri baarinten bireene ti liimaanagankaaxun ya yi. »* 12 Sariyan tuuganten nta danqanaaxun ŋa, baawo « sere be ga na kun fiinu dabari, ken kaman wa bireene ti i ya. »* 13 Isa da o maxawasa bakka sariyan langandun ya maxa, baawo a da langanden tooran tiŋa o da ; a wa safefoonun ŋa nan ti : « Sere su ga jongi sallibinsollen ŋa nan kara, a kaman langanten ya ni. »* 14 Ke ni ya, kuudo ku beenu ga feti Yehuudiyanu, Ibirahiima xeerin na kiɲe i ya ti Isa Alimasiiwu horoman ŋa, ken ŋa, Fanka Senne ke laayidun be ga wuti, o na a kita ti danqanaaxun sababun ŋa.
[Laayidun nan xasa sariyan ŋa]
15 N waaxinu, o na misaalen wutu haadamarenmen dunadunbireyen ŋa : sere be ga na wosi ti wosixanne yi, na a safa ti i moxon ŋa, sere tana su ra nta ken wosi gurujana, walla xa na fo kafu a yi. 16 Ken ŋa keeta, laayidunu ku wuti Ibirahiima ya da, a do i bonsonŋe ; a ma koni nan ti : « an bonsonŋu » xo jama ya ga ni. A ti ya : « an bonsonŋe » seri baane ya ni ken ŋa, ken ni Alimasiiwun ya.* 17 Nke gaa ke be koono, ken ni ya, Alla da laayidun ya wutu, ken laayidu wutten falle kamo naxati do tanjikke siine, sariya be ga ri, ken sariya ra nta a laayidu ke gurujana. 18 Alla kuyen jonginten gan n ɲi sariyan ya yi, ken ra ntaxa ɲaana laayidu yi xadi. Na a ɲi xa, Alla da i neeman kini Ibirahiima yi ti laayidun ya.
19 Ken kuŋa sariyan xa riyinme ? Kafumaqe ya ni, kuudo na allankuteyen hayiba, ma bonsonŋe ke be a ga da a laayidun wutu, ken ga n'n ri bire be. Maliikannun ya do sariyan nan yanqa fiidumaxagemundaanan ŋa. 20 Xa fiidumaxagemunde ma jare do seri baane yi, ayiwa Alla ni baanen ya. 21 N na axa tirindi kuŋa : yaala sariyan na Alla laayidunun sooxini ya ba ? Ken fe wala ! Ayiwa a ga na ɲi sariya kininte ra gaa ŋalintaaxun haxiixan kinni, ganpinsa baariyen ɲi kiteene ti sariyan ya yi. 22 Xa, safefoonun kun da a toŋondi nan ti junuubun komonkacen na tagekomen su xannen ŋa ya, kuudo Alla laayidu wutunte ke na ɲa muumininun da, ku be ga danqanaaxu ti Isa Alimasiiwu yi.
[Allanlenmun ni laayidun xeyiwutaanon ya]
23 Saado danqanaaxun gaa riini kuŋa, o ɲi sariyan ya maxa xarun ŋa, a gaa o nagaanini katta danqanaaxun gaa bangeene. 24 Ken moxo ya ni kuŋa, sariyan ga ɲi o nagaanini ma Alimasiiwun gaa riini, kuudo o na baari ti danqanaaxun ŋa. 25 Xa, danqanaaxun ri falle keeta, o ntaxa nagaana ke kandan wure. 26 Baawo axa su ni allanlenmun ya yi, na a sababun ɲa danqanaaxun ŋa ti Isa Alimasiiwu yi. 27 Baawo axa beenu su ga tuubiyinwanqi ti Alimasiiwu yi, axa da Alimasiiwu dorokorondi ya. 28 Yehuudiyaaxu do Gereesaaxun ntaxa du yi ; komaaxu do hooraaxu ntaxa du yi ; yugaaxu do yaxaraaxu ntaxa du yi, baawo axa danmon su ya n baana Isa Alimasiiwu yi. 29 Ayiwa axa ga ɲa Alimasiiwu foyaaxun ŋa, ken kuŋa axa ɲa Ibirahiima bonsonŋun ŋa keeta, laayidu wutunten xeyiwutaano.