Galacanko 2

[Pawulu faarannaaxun sabatinde]

Siino tanmi do naxato dangi falle ya ni, n ga yille katta yi, n do Barinaabu ɲi doome, n do Tiito xa daga do du yi. 2 Alla ya n da non dageyen yanqandi in ŋa. N do yaaxamaxon duran menwallen ŋa, n da koyi i ya, ku beenu ga feti Yehuudiyanu yi, n gaa i waajunu ti Xibaari Liŋe ke be yi. N da ken ɲa ya kuudo in wuru-wuruyen nan maxa daga ɲaŋi in maxa xafun ŋa. 3 N teranlenma Tiito, Gereesinken ya ni, xa ken do i fi su, i ma aken neqi nan ti ma a ga n'n sunne. 4 Ke su ni ya, duwaaxi gaaranto yogonu ga da du kafu o yi, kuudo o ga da hooraaxu ke be kita Isa yi, i na ken sege-sege, na o rondi komaaxun ŋa xadi. 5 Xa, kuudo na Xibaari Liŋen tanga axa da, a ga nta faraaxini, o ma duŋe du maxayanqana kun sero da hari fonne. 6 Xa, fo be gaa xo yaaxamaxo ku, i yaaxamaxaaxu ke nta inke maxa fo yi, baawo Alla ken nta seron fasono me yi moxo su. I ma fo wo fo waajibi inke kanma. 7 I du da a wari nan ti Alla da in sugandi ya, ti ku beenu ga feti Yehuudiyanu yi, n na i waaju xo Piyeeri ga sugandi moxo be na Yehuudiyanun waaju. 8 Baawo ke Alla be ga da Piyeeri ɲa yi katta Yehuudiyanun ŋa, ku beenu ga feti Yehuudiyanu yi, aken ya n da inke xa ɲa faare yi katta i ya. 9  do Piyeeri, a do Yohanna, kun ni xo allanbatikaanun gondomon ya, ke neema be ga kini in ŋa kundu, i ga da a faamu, i da i kittun beeri inke do Barinaabu yi ti baanaaxun ŋa, kuudo ku beenu ga feti Yehuudiyanu yi oku n daga katta kun ŋa, ikun na daga Yehuudiyanun banŋe. 10 I da a muuru o maxa tannu, o na o haqile toxo misikiinun ŋa, n da ken ɲa soobaaxu yaaxe maxa.

11 Xa bire be Piyeeri ga ri yi, n sigi a wure seron jon ŋa, baawo a sankunten ya n ɲi. 12 Na a sababun ɲa, saado Yaaxuba seri xayinton gaa riini, ku beenu ga feti Yehuudiyanu yi, a ɲi yigene do i ya yi, xa bire be i ga ri, a sure, nan laato bakka i ya, na a sababun ɲa ku beenu ga finna sunnanden waajibini isanjaman kanma, a ga kanu kun ŋa. 13 Yehuudiyanun kuttun xa ro do a batten ŋa, xoyi i munaafaxaaxun ga ɲa sababu yi Barinaabu yinme ga xuube kafini i ya moxo be. 14 Xa, n ga da a wari nan ti i ma tere Xibaari Liŋe tonŋun kanma ti teleŋontaaxu yi, a su kafumanton jon ŋa, n ti Piyeeri da : « Anken be ga ni Yehuudiyan ŋa, harisa Yehuudiyaaxu ga nta an ŋa, an gaa finna bireene xo Yehuudiya feti an ŋa, ku beenu ga feti Yehuudiyanu yi, anken katta i waajibini kan moxo ti i nan bire xo Yehuudiya ? »

[Kisiye ti danqanaaxun ŋa]

15 Tonŋun ya ni, oku ni Yehuudiyanun ya, saaridonun ya ni o yi, junuubunto feti oku yi xo kaafirinu ku moxo. 16 Xa o wa a tu nan ti sariyan ɲangolle nta sere su baarini a ga feti a gaa danqanaaxun ya kanma ti Isa Alimasiiwu yi. Oku xa be ga ni, o da o saxiiraaxun ro Isa kanma yi ya kuudo o na baari ti o danqanaaxun ŋa, xa sariyan gollun dabariyen saabu da fe, baawo ɲangolle nta sere su baarini. 17 Xa baariyimuuriyen noxon ŋa ti Alimasiiwun ŋa, oku ga na xosi daga du ɲi junuubunton ya yi xadi, ken bire ken keeta, yaala Alimasiiwun na o teŋendini junuubuɲanŋen ya yi ba ? Ken fe wala ! 18 Na a toxo ti in yinme ga da sariya ke be guruja, n ya ga na yille ken tagana xadi, ken bire ke, n da sariyan kuta. 19 Baawo sariya ke killen kanma, a na xoyi in ga kara ya, kuudo in nan bire Alla da. N tonte do Alimasiiwun batten ŋa ya sallibinsollen kanma. 20 Saasa ke, n bire, xa inke yinme bireye fe de, Alimasiiwun ya hadarinten na in ŋa : an ga da a wari bireyen gaa in faten ŋa, ken ni in gaa bireene ti danqanaaxun ya yi Allanlenmen kanma. A da in xanu, nan kara in da. 21 N nta Alla neeman yeburene, baawo sariyan gollen dabarinden ya gan ɲi sikki seren gaa baarini, ken kuŋa, Alimasiiwun kara xafu !