[Pawulu gongondi lagaru]
13
Ke ni ta sikkandin ya yi in gaa dagana axa noqu. Tawureeta ti : « Seedaano filli ma seedaano sikki digaamen kanma ya ni xibaaren yaaxe na sigi*. » 2 N ga daga axa kaara ta fillande ke be, n da axa gongo. Lenki in nta non ŋa, xa in faayi gaa axa gongono ta fillande. N gongonde ke na katta ku be ga da junuubungollun ɲa nan xaso ya, i do tanan su. N ga na ri keeta, n ntaxa hinnene sere su yi. 3 Xoyi axa gaa a mulla na a tu ya selli Sugandiyenmen ya gaa sefo ku roono in raqen ŋa, axa wa riini a tu. Sugandiyenmen ken ma ɲa senberanloxe axa banŋe, senbenten ya ni axa noxo. 4 Tonŋu, a gaa senberanloxaaxun ŋa bire be ya ni, i ga da a genge do sallibinsollen ŋa. Xa a wa bireene ti Alla senben ŋa. Oku xa be ga ni, o senberanloxaaxu do a yi ti a kapanlenmaaxun ŋa. O xa wa riini bire do a batten ŋa axa da, ti Alla senben ŋa.5 Axa yinmenu na du segesege, na du xense, selli toŋondinto ga ni axa yi. Axa wa a tu nan ti Isa Alimasiiwu wa axa yi, ma axa yinmenu ya ga na xensenden futu. 6 N jikke maxa, axa wa a tu nan ti oku kun ma kori toŋondini de. 7 O wa Alla ɲaagana, axa nan maxa fo bure su dabari, xa ken feti na a koyi nan ti o ku danqanaaxun xalasinten ya ni de. O na a mulla axa ya nan fosiriɲaŋi, hari a ga na ɲa xo oku ga konto ya. 8 Na a tuguti oku ra nta fo wo fo da, ke be ra gaa tonŋun fatana ɲaana, o du katta a deemana ya. 9 Na senben toxo axa yi, oku wa sewono, hari senberanloxon ya ga na ɲi o yi. O allanɲaageyen ga ni ke yi, ken ni : axa nan tinme ya. 10 Ken ya n sigi, n do axa naxan laaten ga ni, n gaa ku safana katta axa yi. Ken ŋa in do axa ga na ɲa me kanma, n ntaxa sefe xaraxace waajibintan koono axa da ti Kamanen ga da kanda be kini in ŋa. Baawo Kamanen da ken kanda kini in ŋa kuudo in na axa taga ya, a ma a kini in ŋa kuudo in na axa guruja.
[Kuuɲindi lagaru]
11 N waaxinu, saasa ke, xa sewo, xa da a muuru axa n ɲa sere tinmanto yi, xa da me buttun xotondi, axa sinmayun nan ɲa sinmayi baane yi, xa bire xeerin noxon ŋa. Axa ga na ke su ɲa, Alla ke be ga ni xeerin do xanuyen Alla yi, a na ɲa do axa batten ŋa. 12 Xa da kuuɲinden sanqi axa do me naxan ŋa ti meexandunsunbunden ŋa. Alla sere sennun su wa axa kuuɲini. 13 O Kama Isa Alimasiiwu neeman do Alla xanuyen do Fanka Sennen kapanlenmaaxun gan na ɲa do axa su batten ŋa.