[Pawulu sewoye]
12
N nan xawa du koono ya ba ? Nafa nta ken ŋa. Xa ken do i fi su, Kamanen ga da fi be koyi in ŋa, a do a ga da gundo be farasa in da, n faayi fo koono ken ŋa. 2 N wa yugo yogo tu¤, isanxaranlenman ya ni, Alla da a wurugi segene ma kanfata lagaren ya yi, siino tanmi do naxato saasa. Alla da a yinme ya wurugi ba, ma a da a yonkin ya wurugi ba, n ma ken tu. Alla ken wa a tu. 3-4 N wa a tu ken tannu, nan ti Alla da a wurugi ma Arijanna noxon ya yi. Xa a da a yinme ya wurugi ba, ma a da a yonkin ya wurugi ba, n ma ken tu. Alla ken wa a tu. Yugo ke da sefexannu mugu Arijanna noxon ŋa, i ra nta koniini, a ma daga haadamarenme na i ko lewu. 5 N ra wa ke me yugo jakkini, xa inke nta du jakkini ti fo wo fo yi, a ga feti in lanpuntaaxu. 6 Duukonŋe ga n ɲi liŋi in da, n ma ɲi ɲaana tuurinte yi, baawo in na tonŋun baane ya koono. Xa in na kuuru, kuudo seron nan maxa xiima ro in ŋa, fo be ga n xoora i taron do i yaaxen gaa ke be yi in ŋa. 7 Alla ga da gundo xooro ku be farasa in da saabu da, kuudo in nan maxa du xoorondi, a da toora xote yogo ro in yonkin ŋa xo Ibiliisa faare, kuudo in nan maxa du xoorondi ti kun gundonu yi. 8 N da Kamanen xanjo ta sikko ti a na ken toora wutu bakka in ŋa. 9 Xa a ti in da : « Neema be gaa in maxa katta an ŋa, ken wase, baawo lanpuntaaxun biren ya ni, n senben su gaa bangeene. » Ken kuŋa, nke sewonten ya na du koono ti in lanpuntaaxun ŋa, kuudo Sugandiyenmen senben na toxo in kanma. 10 Ken ya saabu da, n gaa sewono ti in lanpuntaaxu, n kayindu, n xoteyu, n tooreyu, ken do in hanmiye, a su na Sugandiyenmen ya da. Baawo in lanpuntaaxun biren ya ni in senben biren ŋa.[Pawulu joote]
11 N faayi ga ɲa tuurinte, ken kite axa ya yi, axa be ga da in neqi. Axa ya n ɲi xawa na inke maxankutu, baawo hari fo ga feti in ŋa do i fi su, n da a sinma in nta neqe du yi axa faari xooro ku kaaran ŋa. 12 Taagumansu, kaawafiinu, kun do fi xooro, n da ke su dabari ti muɲiyen ŋa axa jon ŋa. Kun ya na a koyini nan ti faari sooben ya ni in ŋa. 13 Isanjama kuttun da manne kita, axa ga ma a me kita, a ga feti in likke ga ma ɲi axa kanma ga fe ? Ayiwa axa na yanpa in maxa ti ken teleŋontanbalaaxu yi sa !
14 Ayiwa, n faayi ga da in moxo sirondi nan daga katta axa yi ta sikkandi yi. N nta riini ɲa axa da likke yi de, baawo in nta do axa kittidufo yi, n na do axa yinmenu ya yi. Renme nta xeye kapa me yi saara da, saaran ya na xeyen kapa me yi renmen da. 15 Fo wo fo gaa inke maxa, n sewonta xooren ya na a su roono axa boten ŋa, ma in ga da in yinme ro a yi. N ga na axa tallan xanu, ken na fo ya bakka in xanuyen ŋa axa maxa ba ? 16 Axa wa a tu nan ti in likke su nta axa kanma. Xa, axa yogonu maxa, nke Pawulu ni seri xafun ya yi, n da axa kita ti nanbaran ya yi. 17 Ayiwa in ga da ku be xayi katta axa yi, ko baanen daga axa kittidufo raga in da ? 18 N da Tiito xanjo ya kuudo a do waaxi nan daga bogu axa yi. A da fo raga axa yi ba ? Xoyi ŋanniyi baane ke do terekilli baane ke ya nta o su maxa ba ?
19 Axa ma dalla a sinmana nan ti o sefene na du faasa axa danŋa ya ba ? Aayi, oku sefene Sugandiyenmen kapanlenmaaxun noxon ya yi Alla jon ŋa. N xana liŋu, ke su ni ya, kuudo axa kafo ke ya na tage. 20 N wa kanna in nan maxa axa ɲi moxo yi, moxo be ga nta gemme in ŋa. Axa xa nan maxa in ɲi moxo yi, moxo be ga nta gemme axa yi. N wa kanna in nan maxa manqanŋe ɲi axa naxan ŋa, a do suuxen do butte, dundaraaxu, meetoxonbononde, meemaxansefende, ken do duuxooronden do genmanbalaaxu. 21 N wa kanna in ga na ri, n Alla nan maxa in yinmen jimindi axa jon ŋa xadi. N wa kanna in nan maxa wu na a sababun ɲa gabe ga junuubu ɲaŋi nan xaso, i ga ma du rasaaga bakka i sobintaaxun do i jeeniyen ŋa, a do i fuyanŋaaxu dangi haqe.