[Pawulu do duuxayifaaru]
11
N waaxinu, n wa a mulla axa n katu ke tuurintaaxu lamaane muɲini in da. Yabo, xa da in muɲi. 2 Baawo, suuxuyi xooren ya na in maxa axa da, ken suuxuye giri Alla ya yi, baawo in da axa tanman raga yugu baane ya da, ken ga ni Sugandiyenmen ŋa. Ken ŋa, n na axa kini a yi xo xusundunbu senne. 3 Xa in wa kanna i n maxa axa xa sinmayun faraaxunu sinmayi burun ŋa, na axa laatondini bakka Sugandiyenmen killi xullu teleŋonten ŋa xo samaqen ga da Hawa sankundi* ti i feera buren ŋa moxo be. 4 Sabu, sere yogo ga na ri na axa waaju ti Isa tana fin ŋa, a ga ma ɲa o ga da ke be ko, ma axa ga na ruuhu tana kita, a ga ma ɲa Alla Fanka Senne ke be axa ga da a kita, ma walla axa ga na Xibaari Liŋe tana mugu, a ga ma ɲa axa ga da ke be mugu, axa wa ken ken muɲini de ! 5 N da a sinma in nta neqe du yi ti fo wo fo su yi axa faari xooro ku kaaran ŋa. 6 Seferansire ga feti in ŋa do i fi su, fintuwaaxun wa in maxa allanfiinu kun kanma. O da ken koyi axa yi moxon su yi do fin su yi.7 N ga da du maxayanqa na axa wurugi na Alla Xibaari Liŋen waaju axa da, axa da in xa tuga ya ba ? Ayiwa ken ni junuubun ya yi ba ? 8 N da isanjamo tananu du ya naaburen raga i ya, kuudo in nan bire ti a yi na in sigan dabari axa danŋa. 9 N korinten ga ɲi axa noqu, n likke ma ɲi sere su kanma. Waaxinu yogo ya n giri Maxidoona, n haajun gaa fo be, nan ri na a kini in ŋa. N ma duŋe in likke su gaa roono axa kanma. A nta roono axa kanma xa. 10 N na a ko axa da ti tonŋu ke be gaa in sondomen ŋa Sugandiyenmen kanma, nan ti in ga da kunkuwutte ke be kita, sere su ra nta ken kabana Haaxe maran su yi. 11 N da ken ko ti manne ? Nan ti in nta axa mulla ba ? Alla wa a tu nan ti in wa axa mulla ! 12 Xa in gaa ke su dabarini, n na a dabarini ya, kuudo ku be gaa du koono ti i xa ni faarun ya yi xoyi o moxo, i nan maxa sefemoxo ya kita. 13 Gaarantanfaarun ya ni, golliɲaŋaana nanbaranton ya ni, i gaa du ɲaana xo Sugandiyenmen faarun ya na i ya. 14 Ken nta o lasamana, baawo Ibiliisa yinme na du ɲaana xo Alla maliikan nooronten ya ga ni i ya. 15 Ibiliisa golliɲaŋaanon xa ga na du ɲa xo Alla golliɲaŋaana teleŋonto, ken nta o juunu. I gollen muson ga n xawa ke be, i na ken kitta ya fiinun lagarun ŋa.
[Pawulu tanpiyu]
16 N na saage a yi nan ti : sere su nan maxa a sinma ti in tuurinten ya ni. Xa hari axa ga na a sinma, xa duŋe in do ken tuuri yi, kuudo in xa na du ko fonne. 17 N gaa du koono ti sefo ku be yi, n nta sefene xo moxo be ga n liŋi Kamanen da, n sefene xo tuurinte ya yi. 18 Xoyi seren fo gaben gaa du koono haadamarenmoxon ya yi, ayiwa in xa na du koono ya ! 19 Ayiwa, fontuwaanon kun ya ni axa yi mene, axa xa ɲaxalinton ya na tuurinton kun muɲini de ! 20 Sero ku be gaa axa ragana xo komo, na axa toni, na axa xaaxa, nan wasu axa yi, na axa fentellun kara, axa wa kun kun muɲini de ! 21 A konŋen yaagun ya na in ŋa mene nan ti ku fiinu ɲanŋen senben nta in ŋa !
Nke ken tuurintan sefene ya mene, xa seron gaa wakkilene ke be koono, n xa wakkilene ken ya koono. 22 Habaraaninun ya fe ba ? N xa ni ken ya yi. Isirayilagankon ya fe ba ? N xa ni ken ya yi. Ibirahiima bonsonŋun ya fe ba ? N xa ni ken ya yi. 23 Sugandiyenmen xidimaanon ya fe ba ? Nke ken tuurintan sefene ya mene, xa in xa ni ken ya yi diinanta i ya. N ya n da golli xoton dabari diinanta i ya. N ro kason ŋa diinanta i ya. N kati diinanta i ya. N ro in karafin ŋa ta gabe. 24 Yehuudiyanun da in katu ta karago, ta su tanjikke do gaɲa fakko kabi. 25 N kati ti guman ŋa ta sikko. N gididunware ta baane. Fuuren yoole ti in ŋa ta sikko. N da wuro do kiye ɲa geeji naxaanen ŋa. 26 N da terendi gabe dabari in tan ŋa, na xotan gaben kita, kun gaa xo : fanŋun kasaara, killimaxasaqaanon kasaara, n xabiilan do xabiila tana seron kasaara, kafiini debi xooron do gunnun kasaaran ŋa, ken do geejin kanma kasaara, a do duuwaaxinun kasaara, 27 gollen do tanpiye, bire su wuyanyaaxo, dullen do daqu, bire su suume, mullen do feeto. 28 Ken xa baane fe, isanjamon xa abadanhanmi. 29 Ko lanpunten ni, nke ga nta lanpunu do a kaman ŋa ? I na ko jaarabini, ken ga nta in buyini in sondomen ŋa ?
30 Duukonŋe ga n ɲi, n na du ko ti in lanpuntaaxun ŋa. 31 N nta gaarana, Alla wa a tu, aken be ga ni Kamane Isa Faaba yi, o gaa a be tiigana ma abada. 32 Hari in ga ɲi Damaasidebe yi, tunka Hareeta fankama yogo da seron wara ti i na deben roraqun koroosi, i na in raga. 33 Xa i da in ro kacingolla xoore ya noxon ŋa, na in yanqandi ti palanteerin ŋa deben tageyen falle, n ga katu kisiini* a yi.