[Pawulu do i bexundaano]
10
Nke Pawulu ken ke, xaaxanten ya ni in ŋa axa jon ŋa mene, n do axa ga nta me kanma, n na saako katta axa yi. Xa in na fo baane ken muuru axa maxa ti Sugandiyenmen nooxaaxun do a siroyen ŋa. 2 N gaa ke be muurunu axa maxa, ken ni ya : axa n maxa sigi n ga na ri in gaa saakono katta axa yi. Ku be gaa tini o biremoxo ke ni haadamarenbiremoxon ya yi, n na a mulla na sefe xoton ko kun ya da. 3 Tonŋu, haadamarenmun ya ni o yi, xa o nta haadamarengajanŋa. 4 Baawo gajanyokku be gaa o maxa, serandabaru fe. Alla yinme ya n da senben ro i ya, i ra ga hari tagayinbinnen gurujana. O wa daliilu xafun su buruxana, 5 ken do dundaraaxunsinmaye su gaa seron kabana Alla tuunu. O na seren sinmayun su komonraga, i na bati do Sugandiyenmen ŋa. 6 Axa batiyen ga na xalasi bire be, o moxosironten ya ni na kutayen su yanganxata.7 Xa da fiinun moxon faayi ke. Sere be saxunten gaa a yi nan ti ike ni Sugandiyenmen ya foyaaxun ŋa, a nan saxu a yi xa nan ti oku xa ni Sugandiyenmen foyaaxun ya yi xoyi a moxo. 8 N ga na in kunkun wutu ti Kamanen ga da kanda ke be kini o yi, n ga na hari dangi haqen ŋa fonne, a yaagun nta in ŋa. A da a kini in ŋa kuudo in na axa taga ya, a ma a kini in ŋa kuudo in na axa guruja. 9 N ramuuriye fe na axa hawujandi ti in bataaxun ŋa. 10 Xo i ga da a ko nan ti : « Pawulu bataaxen sefon nan xaraxasu, i ɲanŋun ni. Xa a yinme ga na ɲi o noxon ŋa, senben nta a yi, seron nexunton ya na a sefen su yi. » 11 Ku be gaa kun sefo koono, i na a tu nan ti o do axa ga nta me kanma, o gaa sefene o bataaxu ku noxon ŋa moxo be yi de, o ga na ɲi me kanma, o gollun xa na ken moxo baane ya yi.
12 Sero yogo wa a yi, kun na i yinmenu baane ya maxankutunu seron da. Oku kun ra nta hari sinmene du katta ikun ŋa, sigaali o do i na ɲokko ken mene ! Ikun yinmenu ya na du xiimana, na du ɲokkondi i yinmenu yi. Yinkaranto ! 13 Xa oku, o nta fo kapa o xiiman ŋa ti duukonŋe yi de ! Alla ga da golle ke be xaliifa o yi na o xenpendi noqu be, o xenpene non ya yi. A da o kiɲa axa xa yi. 14 O ga daga axa kaara, o ma dangi Alla ga da o xenpendi ke be yi. Seri fano xa be do Sugandiyenmen Xibaari Liŋen nan kiɲe axa yi, oku ya ni. 15 Ken ŋa, o ma dangi o gollen xenpan ŋa, nan daga sere tana gollen wutu na o du ko ti ken ŋa. Xa o jikken wa a yi nan ti : axa danqanaaxun ga na xooro, xiima wa roono o xa gollen ŋa axa kaara yi, a na tallan xooro nan gemu Alla ga da dingiro be xaliifa o yi. 16 Ken moxo, o na katu telle Xibaari Liŋen kiɲandi jamaanu be gaa axa falle yi. O nta a mulla na du ko ti wandi gollu yi. 17 Safandi Sennun ti :
« Sere be gaa du koono, a na du ko ti Tunka Duumanten ŋa.* »
18 Sere be gaa du maxankutunu, ken nta jaatene, xa Kamanen gaa sere be maxankutunu, ken ya n jaatene.