[Deemande katta waaxinun ŋa]
9
Ayiwa, fi be gaa taŋene waaxinun deemanden ŋa, a ma jare in nan safandi katta axa yi. 2 N wa axa ŋanniyisirigumaaxun tu, ken saabu da, n ga da in kunkun wutu na axa tiiga Maxidoona seron da. N ti i da : « Gelli yeeru, Haaxe maran isanjaman moxosironten ya ni allankuyen da. » Axa duruxotonton ga ni moxo be, ken ya n da duruxotoyen kini seren fo gaben ŋa. 3 Ken do i fi su, n faayi ga da ku waaxinu wara katta axa yi, kuudo in ga da axa tiiga ku sero da moxo be, a nan maxa ɲa xafu. Ken kuŋa, i na a ɲi axa moxosironton ga ni, xo in ga da a ko i da moxo be. 4 Ken ga fe, n ga da saxiiraaxu ke be ro axa kanma, n do Maxidoonanko ga na daga axa kaara na a ɲi axa moxosironto fe, ken na yaagun ya yi oku da, sakkati axa ku ! 5 Ken ya saabu da, n ga da a sinma nan ti in nan xawa waaxinu ku walla dagana o kaane, axa ga da fonnansiraaxu be laayidun wutu ti kuyun ŋa, i na i kafu me yi saado in gaa riini. Ken wa a koyini nan ti axa da kuyun bagandi ti fonnansiraaxun ya yi, sere ma axa waajibi.6 Axa na a tu nan ti : sere be ga na fo lamaane tifi, an na fo lamaane ya fatana. Sere be ga na fo gabe tifi, an na fo gabe ya fatana. 7 Baane su ga da ke be ŋanniya i sondomen ŋa, a na ken kini. A nan maxa a butuntankini, a nan maxa ɲa waajibi xa yi. Baawo sere be sewonten gaa kuyindini, Alla na ken kaman ya mulla. 8 Seyen wa Alla da, a ra gaa neema guujinten kinni axa yi ti fon su yi kuudo axa kitefon na gabo biren su yi, axa na katu deemandi moxo sire ke danben su dabarini. 9 Xo a safanten gaa Jabuurin noxon ŋa nan ti :
« A taxandindi, a da misikiinun ku, a teleŋontaaxun nta ɲameene*. »
10 Alla ke be gaa soxoodin kinni soxaanan ŋa na a logoman kini a yi*, aken ya na soxoodi ke su kinni na a jiidi axa da, na axa siroyen tonon xoorondi. 11 Ken moxo, Alla na axa bannaaxundi moxo ke danben su yi, kuudo axa na axa fonnansiraaxun koyi moxo ke danben su yi. Ken ŋa, gabe na Alla tiiga ti axa ga da kuye ke be ɲa i da ti o yi. 12 Baawo axa gaa deemandigolle ke be kanma, a wa isanjaman haajunun sirono de, xa a nta xenpene ken baane yi, a wa ɲaana sababu xa yi sere gabe gaa Alla kuufana. 13 Ke deemande wa axa xa ŋanniyi siren koyini. A wa ɲaana sababu xa yi toŋondinton gaa Alla tiigana na a sababun ɲa axa ga saxu Sugandiyenmen Xibaari Liŋen ŋa na a daro. I na Alla tiiga ti axa ga da fonnansiraaxu be ɲa ti kapanlenmaaxun ŋa ikun do seren kutten su da. 14 I wa Alla ɲaagana axa da, ti xanuyi xoore be gaa i maxa katta axa yi, na a sababun ɲa Alla ga da neema xooro xoore be kini axa yi. 15 Tiigeyen wa Alla da ti a ga da kuye kini o yi, katanlenma ga nta kuye be yi.